ۇكىمەت باسشىسى اوك دامىتۋ باعدارلاماسىنىڭ جۇزەگە اسىرىلۋىمەن جانە يننوۆاتسيالىق تەحنولوگيالاردى قولداناتىن شارۋا قوجالىقتارىنىڭ جۇمىسىمەن تانىستى.
وبلىس اكىمىنىڭ ورىنباسارى سەرىكجان بەسكەمپىروۆ وبلىستاعى اوك دامىتۋ جانە قانت قىزىلشاسىن, سۋارمالى ەگىنشىلىكتى دامىتۋ بويىنشا, سونىمەن قاتار سەرۆيستىك-دايىنداۋ تسەحتارىن قۇرۋ بويىنشا قولعا الىنىپ جاتقان شارالار تۋرالى باياندادى.
اتاپ ايتقاندا, باقىتجان ساعىنتاەۆقا «نام گ. ن.» شارۋا قوجالىعىنىڭ ۇلگىسىندە سۋارمالى ەگىنشىلىكتە جاڭا تەحنولوگيالاردىڭ قولدانىلۋى تۋرالى اڭگىمەلەپ بەردى. بۇل شارۋاشىلىقتاعى سۋارمالى جەر كولەمى – 75 گا, ونىڭ ىشىندە 25 گا جەردە قانت قىزىلشاسى, 30 گا جەرگە كارتوپ وسىرىلەدى, قالعان جەرلەرگە سويا جانە كۇزدىك بيداي ەگىلەدى.
الماتى وبلىسىندا قانت قىزىلشاسىن وڭدەيتىن جەتىسۋداعى اسا ءىرى اقسۋ زاۋىتى ىسكە قوسىلعان. 2017 جىلى ايماقتا قانت قىزىلشاسى ەگىلەتىن اۋماقتى 9 مىڭ گا دەيىن ارتتىرىپ, 30 مىڭ توننا قانت الۋ جوسپارلانىپ وتىر. بۇل وبلىس حالقىن 84%-عا ءوز قانتىمەن قامتاماسىز ەتۋگە جانە يمپورتقا تاۋەلدىلىكتى تومەندەتۋگە مۇمكىندىك بەرەدى, بۇل 2017-2020 جىلدارعا ارنالعان اوك دامىتۋدىڭ مەملەكتەتىك باعدارلاماسىنىڭ مىندەتتەرىنە ساي كەلەدى.
سونىمەن قاتار, جۇمىس ساپارى بارىسىندا پرەمەر-مينيستر «تالدىقورعان» اۆتوماتتاندىرىلعان گاز ءبولۋ ستانساسىنا بارىپ, ونداعى تەحنولوگيالىق جابدىقتارمەن جانە ماگيسترالدى گاز قۇبىرىن اۆتوماتتاندىرىلعان باسقارۋ جۇيەسىمەن تانىستى, سونداي-اق ايماق پەن تالدىقورعان قالاسىن گازداندىرۋ بارىسى تۋرالى باياندامانى تىڭدادى.
باقىتجان ساعىنتاەۆقا ۇزىندىعى شامامەن 265 شاقىرىم بولاتىن «الماتى-تالدىقورعان» ماگيسترالدى گاز قۇبىرى قۇرىلىسىنىڭ اياقتالۋى تۋرالى باياندالدى. بۇل جاڭا گاز ءبولۋ ستانساسىن ىسكە قوسۋمەن بىرگە ورتالىقتاندىرىلعان گاز قۇبىرىنا تالدىقورعاننىڭ بىرقاتار ىقشام اۋداندارىن قوسۋعا مۇمكىندىك بەردى.
باقىتجان ساعىنتاەۆ العاش رەت گاز قۇبىرى جەلىسىنە قوسىلعان اۋدانداردىڭ بىرىندە بولىپ, جەرگىلىكتى تۇرعىندارمەن كەزدەستى.
«الماتى-تالدىقورعان» ماگيسترالدى گاز قۇبىرىنىڭ قۇرىلىسى – ايماق ءۇشىن اسا ءىرى ءارى الەۋمەتتىك ماڭىزعا يە جوبالاردىڭ ءبىرى. ونى جۇزەگە اسىرۋ ءۇشىن بيۋدجەت قاراجاتىنان 21,4 ملرد تەڭگە ءبولىندى.
قر ۇكىمەتىنىڭ الدىندا ايماقتاردى گازداندىرۋ دەڭگەيىن 2030 جىلعا قاراي 56% دەيىن جەتكىزۋ مىندەتى تۇر. وسىعان بايلانىستى قازىرگى كەزدە اتالعان ماقساتتارعا قول جەتكىزۋ بويىنشا كەشەندى جۇمىستار جۇرگىزىلىپ جاتىر.
بيىلعى جىلدىڭ ءىى توقسانىندا بيۋدجەت قاراجاتى ەسەبىنەن «تالدىقورعان-تەكەلى» جوباسى بويىنشا جۇرگىزىلەتىن گاز قۇبىرىنىڭ قۇرىلىسىن باستاۋ جوسپارلانىپ وتىر. ونىڭ قۇنى 1,5 ملرد تەڭگە. بۇل 35 مىڭ ادام تۇراتىن تەكەلى قالاسى مەن 23,5 مىڭ ادام تۇرىپ جاتقان ەسكەلدى اۋدانىنىڭ 9 ەلدى مەكەنىن گازداندىرۋعا مۇمكىندىك بەرەدى.
سونداي-اق باقىتجان ساعىنتاەۆ جاڭا ءوندىرىس ورىندارى اشىلىپ جاتقان «تالدىقورعان» يندۋستريالدى ايماعىنىڭ جۇمىسىمەن تانىستى, ايماق تۇرعىندارىن جۇمىسپەن قامتۋ بويىنشا شارالار تۋرالى ەسەپ تىڭدادى.
ۇكىمەت باسشىسىنا «تالدىقورعان», «بەرەكە» يندۋستريالدى ايماقتارىنىڭ اعىمداعى قىزمەتى, «قورعاس – شىعىس قاقپاسى» اەا جۇمىسى تۋرالى مالىمەت بەرىلدى, سونداي-اق پانفيلوۆ اۋدانىنداعى جاڭا نۇركەنت قالاسىنىڭ قۇرىلىس بارىسى جانە Gate Sity سەرىكتەس قالاسىن دامىتۋ تۋرالى باياندالدى.
قازىرگى كەزدە يندۋستريالدى ايماق اۋماعىندا بارلىعى 11 كاسىپورىن جۇمىس ىستەپ تۇر. ونىڭ ىشىندە مەتالل بۇيىمدارىن, جىلىتاتىن ءبازالتتى پليتالاردى, اسفالت, بەتون مەن باسقالارىن وندىرەتىن زاۋىتتار مەن تسەحتەر بار. سونىمەن قاتار الداعى ۋاقىتتا تاعى 9 كاسىپورىن وسى جەرگە ءوز وندىرىستەرىن ورنالاستىرۋدى جوسپارلاۋدا.
جاڭا وندىرىستەردى بىلىكتى ماماندارمەن قامتاماسىز ەتۋ ءۇشىن وڭىردە تۇراقتى تۇردە بوس جۇمىس ورىندارى جارمەڭكەلەرى وتكىزىلىپ تۇرادى. پرەمەر-مينيستر «جاستار» ساياباعىندا وتكەن بوس جۇمىس ورىندار جارمەڭكەسىنە باردى, مۇندا 100-گە جۋىق كاسىپورىن 1500-دەن استام جۇمىس ورنىن ۇسىندى.
