ءسوز سايىسىنا «ايتىس اقىندارى مەن جىرشى-تەرمەشىلەر وداعىنىڭ» باسقارما توراعاسى ءجۇرسىن ەرمان توراعالىق ەتىپ, فيلولوگيا عىلىمدارىنىڭ دوكتورى, پروفەسسور امانجول ءالتاي, بەلگىلى ايتىسكەر اقىن داۋلەتكەرەي كاپ ۇلى, اقىن قالقامان سارين, كاسىپكەر ورالبەك بوتباي قازىلىق جاسادى. ايتىستى ۇيىمداستىرىپ, ءجۇرگىزگەن – ايتىسكەر اقىن, ەۇۋ قازاق ادەبيەتى كافەدراسىنىڭ دوتسەنتى سەرىكزات دۇيسەنعازى. ۇيىمداستىرۋ جۇمىستارىن ۇيلەستىرگەن ۋنيۆەرسيتەتتىڭ الەۋمەتتىك جانە ازاماتتىق دامۋ دەپارتامەنتى ەكەنىن دە ايتا كەتسەك دەيمىز.
ءتورت ساعاتقا سوزىلعان جىر جارىسىنداعى جۇيرىكتەردىڭ اياق الىسى دا ءارتۇرلى بولدى. كوسىلىپ شاپقاندارى دا, توسىلىپ جاتقاندارى دا كەزدەستى. دەگەنمەن, ەلگە ەندى كورىنىپ كەلە جاتقان جاستاردىڭ قارىم-قابىلەتى الىسقا جەتەرىنە وسى ايتىستىڭ كوشىن وتىز جىلعا جۋىق سۇيرەپ كەلە جاتقان ءجۇرسىن ەرمان سەنىم ءبىلدىردى.
«ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا ۇلتتىق سانامىزدى وياتۋ ماسەلەسى كوتەرىلسە, سونىڭ ءبىر جارقىن مىسالىن ءبىزدىڭ قانىمىزعا سىڭگەن ايتىسىمىزدان ايقىن اڭعارۋعا بولادى. ايتىسقا قۇمارتاتىن, قازاق ءتىلىنىڭ ءدامىن تالعايتىن بالالاردىڭ قاۋلاپ ءوسىپ كەلە جاتقانى قۋانتادى», دەدى ول.
الامان ايتىستىڭ قورىتىندىسى بويىنشا باس ءبايگەنى ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ ستۋدەنتى ءاليحان جاقسىلىق جەڭىپ الدى. ءبىرىنشى ورىن ەۇۋ-ءدىڭ ستۋدەنتى نۇرعانات قايراتقا بۇيىرسا, ەكىنشى ورىندى قىزىلورداداعى «بولاشاق» ۋنيۆەرسيتەتىنىڭ ستۋدەنتى بەگجان ەرجىگىت پەن قازاق گۋمانيتارلىق زاڭ ۋنيۆەرسيتەتىنىڭ ماگيسترانتى دانيار الدابەرگەن ءوزارا ءبولىستى. ال جۇلدەلى ءۇشىنشى ورىنعا قازاق ۇلتتىق ونەر ۋنيۆەرسيتەتىنىڭ ستۋدەنتى ارۋنا كەرىمبەك پەن ءتاتتىمبەت اتىنداعى ونەر كوللەدجىنىڭ ستۋدەنتى نۇرمۇxامەد بايسۇگىروۆ لايىق دەپ تانىلدى.
بايگەگە قاتىسقان اقىنداردىڭ بارلىعىنا دا العىس حاتتار مەن اقشالاي سىيلىقتار تابىس ەتىلدى.
راۋان قايدار,
«ەگەمەن قازاقستان»
