فەستيۆالعا قاتىسقان 10 تەاتردىڭ اراسىندا جۇسىپبەك ايماۋىتوۆ اتىنداعى پاۆلودار وبلىستىق قازاق مۋزىكالىق دراما تەاترى دا بولدى. باياناۋىلدىق جۇمات شانين ەلىمىزدىڭ تۇڭعىش ۇلت تەاترىنىڭ نەگىزىن سالدى. شىمكەنتتىڭ قازاق دراما تەاترىنا 1972 جىلى ونىڭ ەسىمى بەرىلگەنىن دە بىلەمىز. فەستيۆال ۇيىمداستىرۋشىلارى دا وسىناۋ تۇعىرى بيىك تۇلعانىڭ جەرلەستەرىنە لايىقتى قۇرمەت ءبىلدىرىپتى. اتاپ وتەرلىك تاعى ءبىر ەرەكشەلىك – بۇل بايگەدە شانين شىعارمالارىن ساحنالاعان دا جالعىز وسى ايماۋىتوۆ تەاترىنىڭ ۇجىمى بولىپ شىقتى. تەاتر ۇجىمى بەلگىلى رەجيسسەر, مارقۇم جانات حادجيەۆ ساحنالاعان ج.شانيننىڭ «ارقالىق باتىر» تاريحي دراماسىن كورسەتتى. جالپى, ءشانيننىڭ حالىق جىرى نەگىزىندە جازىلعان «ارقالىق باتىرى» وتە كۇردەلى قويىلىم, كەزىندە ءشانيننىڭ ءوزى ارقالىق باتىردىڭ ءرولىن ورىنداعانى بەلگىلى.
ايتا كەتەيىك, ارقالىق باتىردىڭ بەينەسىن سومداعان بەكبولات وقاسوۆ قاسىمحان شانين اتىنداعى ارنايى ءجۇلدەنى, جۇماحان دوسپاەۆ «ۇتىمدى بەينە» اتالىمىنداعى سىيلىقتى يەلەندى. تاريحي درامادا ومىرلەرىن ونەرگە ارناعان سەيىتجان ءتاجىباەۆ, بەيبىت ءشانىم, جۇماحان دوسباي, رۋسلان نىعمان, كەنجەعازى قارىمساق, تالجىبەك اتامبەك, تولقىن ءابدىرراحيم سياقتى تالانتتى ارتىستەر وينادى. ال «تەاتر كوكتەمى-2017» حالىقارالىق فەستيۆالىنىڭ باس جۇلدەسى ۋ.شەكسپيردىڭ «اساۋعا تۇساۋ» كومەدياسىن ساحنالاعان استانانىڭ جاستار تەاترىنا بەرىلدى. ايماۋىتوۆ تەاترىنىڭ ارتىستەرى تۇركىستانعا بارىپ-قايتۋلارىنا قولداۋ كورسەتكەن بەلگىلى تەمىرجولشى, تەاتر جاناشىرى ءابي سارقىنشاقوۆ اعالارىنا العىس ايتۋدا.
فاريدا بىقاي,
«ەگەمەن قازاقستان»
پاۆلودار
