بيىلعى جارىس ەل تاۋەلسىزدىگىنىڭ 25 جىلدىعىنا ارنالدى. ءتورت كۇنگە سوزىلعان تارتىستى تۋرنيردە رەسپۋبليكالىق سپورت كوللەدجىنىڭ كومانداسى, سونداي-اق, كورشىلەس وزبەكستان, قىتاي, تاجىكستان, رەسەي, ماڭعوليا, قىرعىزستان ەلدەرىنەن كەلگەن 100 دەن اسا بوكسشى باق سىنادى. شەبەرلىكتەرى شىڭدالعان جاس بىلعارى قولعاپ شەبەرلەرى جانكۇيەرلەرگە مەرەكە سىيلاپ, ناعىز بوكسشىلارعا ءتان جەكپە-جەك كورسەتە ءبىلدى. ابىلايحان حۋساينوۆ, باتىر دجۋكەمباەۆ سىندى الەمدىك ارەنالاردا ەل نامىسىن اتويلاتىپ جۇرگەن سپورتشىلار تۋرنيرگە تورەلىك ەتتى. شارشالاڭنىڭ شاڭىن شىعارىپ شەبەرلىكتىڭ شىڭىنان كورىنگەن بەكزات سەيل (49كگ), رۋستام مۋراتوۆ (52كگ), اليمجان تۋرسىنوۆ (56كگ), جۇماعالي ابدۋراحمان (60كگ), ارمان سايلاۋ (64كگ), ماقسات كوبەتاي (69كگ), ديلشودبەك رۋزمەتوۆ (75كگ), بەكارىس قويشىعۇلوۆ (81كگ), ەلحان تابىنباەۆ (91كگ) , دامير تويباي (+91كگ) سىندى سپورتشىلار جەڭىس تۇعىرىنان كورىندى.
«جارىس جوعارى دارەجەدە ۇيىمداستىرىلعان. قازاقستان بوكس مەكتەبى دۇنيەجۇزىلىك بوكس الەمىندە ءوزىنىڭ ىرگەتاسىن بەرىك قالاعان كوشباسشى مەكتەپ ەكەنىن الەم مويىندايدى. داڭقتى بوكسشىلاردىڭ سارا جولىن جالعايتىن جالىندى جاستار ءوسىپ كەلە جاتىر. وسىنداي جارىستاردىڭ جيىلەپ ءوتۋى جاس سپورتشىلاردى قاناتتاندىرىپ شەبەرلىكتەرىن شىڭداي تۇسەدى» – دەيدى, قىرعىز ەلىنەن كەلگەن تورەشى يۋري زەلەنكوۆ.
جارىستىڭ سالتاناتتى جابىلۋ راسىمىندە ءسوز سويلەگەن بوكستان كسرو سپورت شەبەرى امالبەك تشانوۆ پەن الماتى قالاسى دەنە شىنىقتىرۋ جانە سپورت باسقارماسىنىڭ باسشىسى ابيل دونباەۆ جارىسقا قاتىسۋشى قوناقتارعا العىسىن ءبىلدىرىپ, اتالعان تۋرنير كورشىلەس ەلدەردىڭ تاتۋلىعى مەن دوستىعىن نىعايتا تۇسەتىنىن ايتتى. سونىمەن قاتار, امالبەك تشانوۆ ايتۋلى ءتۋرنيردىڭ بيىلدان باستاپ رەسمي تۇردە «سپورت شەبەرى» اتاعىن بەرە الاتىن رەسپۋبليكالىق جارىستاردىڭ كۇنتىزبەگىنە ەنگىزىلگەندىگىن حابارلادى.
ارمان وكتيابر,
«ەگەمەن قازاقستان»
الماتى
