مينيستر ءوز سوزىندە جاڭعىرۋدىڭ جاڭا كەزەڭىندەگى مەملەكەت پەن ءدىننىڭ ءوزارا ارەكەت ەتۋىنىڭ قازاقستاندىق ۇلگىسىن جاساقتاۋ ۆەدومستۆونىڭ الدا تۇرعان نەگىزگى باسىمدىقتارىنىڭ ءبىرى ەكەندىگىن ايتتى. سونىمەن قاتار, بۇل ۇلگى ۇلتتىق ءداستۇرلەرگە, زاماناۋي تالاپتارعا جانە مەيىرىمدىلىك, ادامگەرشىلىك, بەيبىتشىلىك قاعيدالارىنا نەگىزدەلۋ قاجەتتىگىن تىلگە تيەك ەتتى.
«وسى ماقساتتاردى جۇزەگە اسىرۋ ءۇشىن مينيسترلىك زاڭنامالىق ارنايى باستامالار ازىرلەگەن بولاتىن. ولاردىڭ اراسىندا ەلىمىزدەگى ءدىن سالاسىنىڭ 2017-2020 جىلدارعا ارنالعان مەملەكەتتىك تۇجىرىمداماسى دا بار. بۇل قۇجات ارقىلى ءدىني كەرتارتپالىق پەن ەكسترەميزمگە دەگەن قوعامنىڭ يممۋنيتەتىن نىعايتۋعا باعىتتالعان ناقتى شارالار ۇسىنىلادى. سونىمەن قاتار, تاعى ءبىر ماڭىزدى باستاما رەتىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەۋ ۇستىندەمىز. ونىڭ نەگىزگى ەرەجەلەرىندە ءدىني ادەبيەت پەن ءدىني ساراپتامانى ءوتكىزۋ تاجىريبەسىن جەتىلدىرۋى قاراستىرىلۋدا», – دەدى ن.ەرمەكباەۆ.
بۇگىندە مينيسترلىك ماماندارىنىڭ باستاماسىمەن ءدىني ەكسترەميزمنىڭ الدىن الۋ بويىنشا جۇمىستار جالعاسۋ ۇستىندە. اتاپ ايتقاندا, ءدىندى دەسترۋكتيۆتى ماقساتتا قولدانۋدى بولدىرماس ءۇشىن زاڭسىز ءدىني ماتەريالداردى تاراتۋدى باقىلاۋ مەن راديكالدى كوزقاراستى ۇستاناتىن توپ وكىلدەرىمەن جۇمىس جۇرگىزىلىپ, ازاماتتاردىڭ ءدىني ساۋاتتىلىعى ارتتىرىلۋدا.
«ءبىز زايىرلى مەملەكەتتە ءومىر سۇرەمىز. سوندىقتان دا, مەملەكەت تالاپتارىن ساقتاۋ – نەگىزگى ماقساتىمىز. زايىرلى مەملەكەت – كوپكونفەسسيالى ورتادا تۇراقتىلىقتى ساقتاۋدىڭ جالعىز جولى بولىپ تابىلادى. قازىرگى تاڭدا مەملەكەت بويىنشا 306 ارنايى تەولوگيالىق جانە اقپاراتتىق توپتار جۇمىس ىستەۋدە. ولاردىڭ قۇرامىندا – 3,5 مىڭنان استام ءدىنتانۋشىلار مەن ءدىني ۇيىمداردىڭ وكىلدەرى بار. جالپى, جۇزەگە اسىرىلىپ وتىرعان شارالار ءدىني سالاداعى جاعدايدى جاقسارتۋعا سەپتىگىن تيگىزەدى», – دەدى مينيستر ن.ەرمەكباەۆ.
القا كەڭەسىندە مينيسترلىكتىڭ ۇكىمەتتىك ەمەس ۇيىمدارمەن ءبىرلەسە وتىرىپ, ازاماتتىق قوعام سالاسىندا زاڭنامانى جەتىلدىرۋ بويىنشا جۇمىستاردى اتقارىپ كەلە جاتقانى دا نازاردان تىس قالمادى. سول ماقساتتا «كوممەرتسيالىق ەمەس ۇيىمدار قىزمەتىنىڭ ماسەلەلەرى بويىنشا زاڭنامالىق اكتىلەرگە وزگەرىستەر ەنگىزۋ تۋرالى» زاڭدى جەتىلدىرىپ, سونىڭ اياسىندا ۇكىمەتتىك ەمەس ۇيىمدارعا گرانت بەرۋ ەرەجەسىن قايتا قاراۋ كوزدەلىپ جاتقانى ءمالىم بولدى. ونداعى ماقسات – ءتارتىپتىڭ اشىقتىعىن قامتاماسىز ەتۋ.
ءىس-شارا بارىسىندا پارلامەنت سەناتىنىڭ دەپۋتاتى ج.ەرعاليەۆ, قوعامدىق كەڭەستىڭ ءتوراعاسى ت.سۇلەيمەنوۆ, ءدىنتانۋشىلار كونگرەسىنىڭ مۇشەسى, مادەنيەتتەر مەن دىندەردىڭ حالىقارالىق ورتالىعىنىڭ ديرەكتورى ا.ءابۋوۆ, «قاھارمان ۇرپاق» قق توراعاسى ك.ەلۋباەۆ, رەسپۋبليكالىق بىرىڭعاي «جاس ۇلان» بالالار جانە ءجاسوسپىرىمدەر ۇيىمىنىڭ توراعاسى د.سادۋاقاسوۆا سىندى سالا ماماندارى ءسوز الىپ, ءمينيستردىڭ بايانداماسىندا ايتىلعان ماسەلەلەردى قىزۋ تالقىلادى.
جيىندا مينيسترلىك ماماندارى وسى جىل ىشىندە جاستار ۇيىمدارىمەن ديالوگ قۇرۋ ارقىلى ۇرپاقتىڭ پاتريوتتىق ءتاربيەسى, الەۋمەتتەنۋى مەن شىعارماشىلىق دامۋى بويىنشا جاڭا جالپىۇلتتىق جوبا ءازىرلەيتىندىگى ايتىلدى. ال ۆەدومستۆو باسشىسى بۇل كونكۋرسقا ازاماتتاردى بەلسەندى قاتىسۋعا شاقىردى.
نۇرلىبەك دوسىباي,
«ەگەمەن قازاقستان»
