كەزدەسۋگە قازاقستان رەسپۋبليكاسىنىڭ سىرتقى ىستەر ءمينيسترى ق.ءابدىراحمانوۆ, قىتاي حالىق رەسپۋبليكاسىنىڭ سىرتقى ىستەر ءمينيسترى ۆان ي, قىرعىز رەسپۋبليكاسىنىڭ سىرتقى ىستەر ءمينيسترى ە.ابدىلداەۆ, رەسەي فەدەراتسياسىنىڭ سىرتقى ىستەر ءمينيسترى س.لاۆروۆ, تاجىكستان رەسپۋبليكاسىنىڭ سىرتقى ىستەر ءمينيسترى س.اسلوۆ, وزبەكستان رەسپۋبليكاسىنىڭ سىرتقى ىستەر ءمينيسترى ا.كاميلوۆ, شانحاي ىنتىماقتاستىق ۇيىمىنىڭ باس حاتشىسى ر.اليموۆ, شانحاي ىنتىماقتاستىق ۇيىمىنىڭ وڭىرلىك انتيتەررورلىق قۇرىلىمىنىڭ اتقارۋ كوميتەتىنىڭ ديرەكتورى ە.سىسوەۆ, قازاقستان رەسپۋبليكاسى پرەزيدەنتىنىڭ حالىقارالىق ماسەلەلەر جونىندەگى كومەكشىسى ن.ونجانوۆ قاتىستى.
قازاقستان پرەزيدەنتى قۇتتىقتاۋ سوزىندە ۇيىمنىڭ استاناداعى ءسامميتى قارساڭىندا شانحاي ىنتىماقتاستىق ۇيىمىنا مۇشە مەملەكەتتەردىڭ سىرتقى ىستەر مينيسترلەرى كەزدەسۋى ءوتۋىنىڭ ماڭىزدىلىعىن اتاپ ءوتتى.
– شانحاي ىنتىماقتاستىق ۇيىمىنا توراعالىق ەتۋشى ەل رەتىندە ءبىز بيىلعى ماۋسىم ايىندا وتەتىن سامميتكە زور ءمان بەرىپ وتىرمىز. ۇيىمعا ءبىزدىڭ توراعالىعىمىز وڭىردەگى جانە الەمدەگى قيىن ۇدەرىستەر كەزەڭىمەن تۇسپا-تۇس كەلدى, – دەدى مەملەكەت باسشىسى.
نۇرسۇلتان نازارباەۆ شانحاي ىنتىماقتاستىق ۇيىمىنىڭ كۇن تارتىبىندەگى بىرقاتار ماسەلەگە توقتالىپ ءوتتى. بۇل رەتتە شانحاي ىنتىماقتاستىق ۇيىمىنىڭ قورشاعان ورتانى قورعاۋ سالاسىنداعى ىنتىماقتاستىعى تۇجىرىمداماسىن بەكىتۋ جۇمىستارىن جانداندىرۋ, ۇيىمنىڭ ەكسترەميزمگە قارسى تۇرۋ جونىندەگى كونۆەنتسياسىنا قول قويۋ جانە وسى تۋرالى مالىمدەمە مەن ۇيىمعا مۇشە مەملەكەتتەردىڭ ناشاقورلىققا قارسى كۇرەس ستراتەگياسىن قابىلداۋ ماسەلەلەرى قامتىلدى.
– شانحاي ىنتىماقتاستىق ۇيىمى اياسىنداعى ەكونوميكالىق جانە مادەني-گۋمانيتارلىق ىنتىماقتاستىقتىڭ ماڭىزى زور. الداعى سامميتتىڭ كۇن تارتىبىندەگى وزەكتى ماسەلەلەردىڭ ءبىرى رەتىندە ءۇندىستان مەن پاكىستاندى شانحاي ىنتىماقتاستىق ۇيىمىنىڭ تولىققاندى مۇشەلىگىنە قابىلداۋ ءۇردىسىن اياقتاۋ تۋرالى شەشىم جونىندە دە ايتىپ وتكەن ءجون. سونداي-اق, كەلەشەكتەگى جوسپارلارىمىزدى ايقىندايتىن استانا دەكلاراتسياسىن قابىلداۋدى كوزدەپ وتىرمىز, – دەدى قازاقستان پرەزيدەنتى.
