كورمەگە قوستانايلىق 14 فوتوگراف قاتىستى. ءار جىلدارى تۇسىرىلگەن سۋرەتتەردەن كورەرمەندەر ۇلتتىق ويىنداردى, سالت-داستۇرلەردى, تابيعاتتىڭ اسەم كورىنىستەرىن, حالقىمىز ونەرىن, اۋىل ءومىرىن تاماشالادى.
«كورمە تاقىرىبى الۋان ءتۇرلى. ءوز فوتورەپورتاجدارىندا ءبىزدىڭ فوتوگرافتار كوشپەلىلەر ۇرپاعىنىڭ ءومىرىن بەينەلەيدى. قازىر فوتواپپاراتپەن تۇسىرگەن سۋرەتتەر وتە كوپ ەكەنىن بىلەمىز. الايدا, كانىگى فوتوگرافتاردىڭ قولتاڭباسى ءتىپتى, وزگەشە ەكەنىن مويىندايمىز. ولار سۋرەتكە ءوزىنىڭ جان جىلۋىن سالادى, سۋرەت كادىمگىدەي ءتىرى ءومىر سەكىلدى اسەر بەرەدى. ال مۇنداي سۋرەت تۇسىرۋگە ءبىلىم مەن تالانت, ەرىنبەيتىن ەڭبەك كەرەك», - دەدى كوركەمسۋرەت گالەرەياسىنىڭ مەڭگەرۋشىسى سايا قاليەۆا.
كورمەنىڭ اشىلۋىنا سۋرەتشىلەر, جۋرناليستەر, اقىندار مەن عالىمدار قاتىستى. وندا سويلەگەندەر وزدەرىنە ۇناعان سۋرەتتەر جونىندە پىكىرىن ىركە المادى. «ماعان 3 سۋرەت ەرەكشە اسەر قالدىردى. سەرگەي ميرونوۆتىڭ «قوناقجايلىلىق» جانە «ارمان», ولەگ يابلوچكيننىڭ «اقشام الدىنداعى سايگ ۇلىكتەر» اتتى سۋرەتتەر وتە ءساتتى, شىنايى شىققان. اۋىلداعى ساماۋرىن قويىپ جاتقان قازاق ايەلدەرى, جىلقى مالىنىڭ سۇلۋلىعىن تابيعاتپەن قالاي استاستىرعانى, سونىمەن قاتار اۋىلداعى ەسكى ءۇي الدىندا ويىنشىق ماشينەمەن ويناپ وتىرعان ۇلدىڭ سۋرەتى كورەرمەندى وزىنە بىردەن تارتادى», - دەدى بەلگىلى قىلقالام شەبەرى ولەگ كۋسكوۆ.
كورمەگە بارلىعى 29 سۋرەت قويىلدى. كورەرمەنگە رۋحاني سىيلىق جاساعان كورمە اۆتورلارىنىڭ اتىن اتاپ وتكەندى ءجون كوردىك. ولاردىڭ بارلىعى دا جۋرناليستەردىڭ ارىپتەستەرى: گەورگي شاپوۆالوۆ, يگور ۆالتەر, ەرمۇرات بەكمۇحامەدوۆ, ولەگ يابلوچكين, سەرگەي ميرونوۆ, ۆلاديمير موتوريكو, نيكولاي كۋدينوۆ, ايبەك ءجۇزباي, باعدات احمەتبەكوۆ, سەرگەي فەلدمان, مۋحتار سيبانباەۆ, يۆان مارماليدي, نيكولاي ساۆچەنكو, نيكولاي سولوۆەۆ.
ءنازيرا جارىمبەتوۆا
«ەگەمەن قازاقستان»
قوستاناي
