قوستاناي وبلىسىندا تاسقىن سۋدان بولعان شىعىنداردى انىقتاپ, زارداپ شەككەندەرگە كومەك كورسەتۋ ماقساتىندا ەكى كوميسسيا قۇرىلدى. ونىڭ ءبىرى مال شىعىنىن, ەكىنشىسى سۋدا قالعان باسپانالاردىڭ جاعدايىن انىقتادى. قارعىن سۋدان بارلىعى 17 ءىرى قارا, 74 ۋاق مال, 200 شاماسىندا شوشقا, 600-دەن ارتىق قۇس شىعىن بولعان. ول بارلىعى 7 ميلليون 300 مىڭ تەڭگەنى قۇرادى. وبلىس اكىمى ارحيمەد مۇحامبەتوۆ مالى ولگەن تۇرعىندارعا اقشالاي كومەك جاقىن كۇندەرى بەرىلە باستايتىنىن ايتتى.
كوميسسيا سۋ باسقان 10 ەلدى مەكەندى ارالاپ, 4 كۇننىڭ ىشىندە 12 ۇيگە جوندەۋ جۇمىستارى جۇرگىزۋدى, 5 ءۇي بۇزىپ, قايتادان سالۋدى كەرەك ەتەتىنىن انىقتادى. بۇل جۇمىستاردىڭ بارلىعى دا ورنىنا كەلتىرىلەتىن بولدى. قازىر وبلىستا تاسقىن سۋدان زارداپ شەككەندەرگە كومەك ءۇشىن ارنايى قور قۇرىلدى. وعان قازىردىڭ وزىندە 10 ميلليون تەڭگە اۋدارىلدى.
«شىعىننىڭ جالپى كولەمى اسا كوپ دەۋگە بولمايدى, بارلىعى 200 ميلليون تەڭگەدەن ءسال اسادى. ءبىز رەسپۋبليكالىق بيۋدجەتكە سالماق سالمايمىز, قاجەتتى قارجىنى ءوزىمىز تابامىز. سۋدان زارداپ شەككەندەردىڭ ەشقايسىسى كومەكسىز, نازاردان تىس قالمايدى. جاعدايدى باقىلاپ وتىرمىز. قازىر ادامدار ءوز ۇيلەرىنە قايتىپ كەلىپ جاتىر. سۋدا قالعان اۋىلدارداعى قارعىن سۋ سورىلىپ, تازارتۋ جۇمىستارى جۇرگىزىلۋدە» دەدى وبلىستىق ءماسليحاتتىڭ كەزەكتەن تىس سەسسياسىندا ارحيمەد بەگەجان ۇلى.
سونىمەن قاتار, ءساۋىردىڭ 15 جانە 16-سى كۇندەرى قاردىڭ كۇرت ەرۋى سەبەبىنەن جولدار دا بۇزىلدى.
«نەگىزىنەن ويپاتتا, وزەن جاعاسىندا ورنالاسقان ەلدى مەكەندەر سۋدا قالدى. جولداردى 12 جەردەن سۋ ورىپ كەتتى. وعان جولدار استىنداعى سۋ وتكىزگىش قۇبىرلار قۋاتىنىڭ ازدىعى, جىڭىشكە بولعاندىعى,توزعاندىعى سەبەپ بولدى. قارجى ءبولىندى, كوپ ۇزاتپاي جولدار دا جوندەلەدى, ول جەرلەردەگى جانە جالپى سۋ ورماعان جولدار استىنداعى سۋ وتكىزگىش قۇبىرلاردىڭ دا ەنى 4-5 ەسەگە دەيىن كەڭەيتىلەدى» دەدى ارحيمەد بەگەجان ۇلى.
سونىمەن قاتار, وبلىس اكىمى سۋ تاسقىنى تازا تابيعي اپات, وعان ەشكىمنىڭ دە كىناسى جوق ەكەنىن ەسكەرتتى. كۇننىڭ تەز جىلىنۋى, قاردىڭ كۇرت ەرۋى جانە جاڭبىردىڭ كوپ جاۋى سەبەپ بولعان. تاسقىننىڭ العاشقى كۇنىنەن باستاپ بارلىق جاعداي وبلىس باسشىلىعىنىڭ باقىلاۋىندا بولدى. قار سۋىنان زارداپ شەككەن ەلدى مەكەندەردە وبلىس اكىمىنىڭ ءوزى, ونىڭ ورىنباسارلارى بولىپ, جاعدايدى كوزىمەن كوردى. ۋاقىتىلى قۇتقارۋ جۇمىستارى جۇرگىزىلدى. الايدا الەۋمەتتىك جەلىلەردە كەيبىر بلوگەرلەر قوستاناي وبلىسىنداعى سۋ تاسقىنى تۋرالى انىقتالماعان, ارتىق اقپاراتتار بەردى. ادام ءولىمىنىڭ تاسقىن سۋعا ەشقانداي قاتىسى بولماعان. اكىم ونىڭ بارلىعى دا ءجىتى تەكسەرىلگەنىن, بىراق الەۋمەتتىك جەلىدەگى الىپ-قاشپا سوزدەردىڭ ەشقايسىسى دالەلدەنبەگەنىن ايتتى.
ءنازيرا جارىمبەتوۆا
«ەگەمەن قازاقستان»
قوستاناي
