«ءبىزدىڭ كەزدەسۋىمىز قازاقستان-قىتاي ىنتىماقتاستىعىنىڭ جوعارى دەڭگەيىن راستايدى. بيىل ەكىجاقتى ديپلوماتيالىق قارىم-قاتىناستاردىڭ ورناعانىنا 25 جىل تولدى. وسى ۋاقىت ىشىندە ەلدەرىمىز اراسىنداعى ىنتىماقتاستىق ۇدايى ءوسۋ جانە نىعايۋ جولىمەن دامىپ كەلەدى. بۇل, كوبىنەسە, ءبىزدىڭ مەملەكەت باسشىلارىمىزدىڭ تۇراقتى بايلانىستارى ارقىسىندا مۇمكىن بولىپ وتىر», – دەدى ق. ءابدىراحمانوۆ.
كەلىسسوزدەر بارىسىندا تاراپتار ساياسي جانە ساۋدا-ەكونوميكالىق سالالارداعى, ونىڭ ىشىندە ترانسشەكارالىق سۋ رەسۋرستارىن پايدالانۋ, سونداي-اق كونسۋلدىق ماسەلەلەر بويىنشا ءىس-قيمىل جاساۋ سالاسىنداعى ىنتىماقتاستىق ماسەلەلەرىن قارادى. وزەكتى ماسەلەلەر بويىنشا ديالوگتى ستراتەگيالىق ارىپتەستىك رۋحىندا دامىتۋ ماڭىزدىلىعى اتاپ كورسەتىلدى.
سونداي-اق مينيسترلەر پرەزيدەنت نۇرسۇلتان نازارباەۆتىڭ بيىلعى 14-15 مامىردا بەيجىڭدە وتەتىن «ءبىر بەلدەۋ, ءبىر جول» اتتى حالىقارالىق فورۋمعا قاتىسۋىنا, سونداي-اق قحر توراعاسى سي ءتسزينپيننىڭ 7-9 ماۋسىمدا استاناعا رەسمي ساپارىنا دايىندىق ماسەلەلەرىن تالقىلادى. ەكى مەملەكەت باسشىسىنىڭ قاتىسۋىمەن 8-9 ماۋسىمدا استانادا وتەتىن شانحاي ىنتىماقتاستىق ۇيىمىنىڭ ءسامميتى دە ءىرى حالىقارالىق وقيعاعا اينالماق.
قحر سىرتقى ىستەر ءمينيسترى قازاقستان مەن قىتاي اراسىنداعى ەگجەي-تەگجەيلى ستراتەگيالىق ارىپتەستىك جاڭا سيپاتتا داميتىنىنا سەنىم ءبىلدىردى. ونىڭ پىكىرىنشە, ىنتىماقتاستىقتى كۇشەيتۋدە ەكى ەل ليدەرلەرى اراسىنداعى جەكە دوستىق, ءجيى بايلانىستار مەن ءوزارا سەنىم ەرەكشە رولگە يە.
«پرەزيدەنت نۇرسۇلتان نازارباەۆتىڭ باسشىلىعىمەن قازاقستان حالقى قارىشتى ءوسۋ مەن تۇراقتى دامۋ جولىنا كوشتى. ەل ماڭىزدى رەفورمالاردى ىسكە اسىرا وتىرىپ, زاماناۋي قادامدار جاساۋدا», – دەدى قىتايلىق مينيستر.
كەلىسسوزدەر قورىتىندىسى بويىنشا تاراپتار قازاقستان مەن قىتاي سىرتقى ىستەر مينيسترلىكتەرى اراسىنداعى 2017-2019 جىلدارعا ارنالعان ىنتىماقتاستىق تۋرالى مەموراندۋمعا قول قويدى. بۇل – الداعى ۇشجىلدىق كەزەڭگە ارنالعان سىرتقى ىستەر مينيسترلىكتەرى اراسىنداعى ەكىجاقتى ءوزارا ءىس-قيمىل جاساۋدىڭ «جول كارتاسىنا» اينالاتىن قۇجات.
مينيسترلەر قازاقستان-قىتاي ەكىجاقتى ىنتىماقتاستىعىنىڭ وزەكتى ماسەلەلەرى مەن حالىقارالىق ىستەر بويىنشا, ونىڭ ىشىندە قازاقستان رەسپۋبليكاسىنىڭ بۇۇ قاۋىپسىزدىك كەڭەسىندە 2017-2018 جىلدارداعى تۇراقتى ەمەس مۇشەلىگى شەڭبەرىندە كەزدەسۋلەر مەن كونسۋلتاتسيالار وتكىزىپ تۇرۋعا ۋاعدالاستى.
تاراپتار ازياداعى سەنىم شارالارىن نىعايتۋ ماڭىزدىلىعىن اتاپ ءوتتى. سونداي-اق ازياداعى ءوزارا ىقپالداستىق جانە سەنىم شارالارى جونىندەگى كەڭەس شەڭبەرىندە ىنتىماقتاستىقتى دامىتۋعا ۋاعدالاستى.
«بۇگىن ۇيىمعا قاتىسۋشىلار اراسىنداعى ىنتىماقتاستىق پەن سەنىمدى نىعايتۋعا ىقپال ەتەتىن كوپجاقتى ديپلوماتيانىڭ ءتيىمدى قۇرالى رەتىندە اوسشك-گە قاتىستى وڭ كوزقاراس قالىپتاستى», – دەلىنگەن قۇجاتتا.
ايدار ورىسباەۆ,
«ەگەمەن قازاقستان».
