قۇنى 300 ميلليون اقش دوللارى بولاتىن كاسىپورىن قۇرىلىسى كەزىندە 500-گە جۋىق قازاقستاندىق جۇمىسپەن قامتىلادى دەپ جوسپارلانۋدا. بارلىق قارجىلىق سالىمداردى قىتايلىق تاراپ ينۆەستيتسيالايدى. ال كومپانيانىڭ قازاقستانعا قويىپ وتىرعان تالابى – جىلىنا 500 مىڭ توننا شيكىزاتپەن, ياعني سابانمەن قامتاماسىز ەتۋ.
اتالعان كاسىپورىن جوباسىنىڭ قۋاتتىلىعى جىلىنا 10 ميلليون توننا سۇيىق جانە قاتتى ورگانيكالىق تىڭايتقىشتاردى وندىرەدى. سونىمەن قوسا, زاۋىتتا كولەمى 5 مىڭ كۋب/مەتر بولاتىن مەتان گازىن وندىرسە, سول ارقىلى 120 ملن كۆت ەلەكتر قۋاتىن, 70 مىڭ توننا بيولوگيالىق ليگنيندى قىتاي, ەۋروپا ەلدەرىنە ەكسپورتتاۋ مۇمكىندىگى پايدا بولادى. زاۋىت كۇندەلىكتى 20 مىڭ توننا ساپالى قاعاز وڭدەۋگە قاجەتتى تسەلليۋلوزا شيكىزاتىن شىعارا الادى.
ا.مىرزاحمەتوۆ جاقىندا قىتاي ەلىنە جۇمىس ساپارىمەن بارىپ, بىرنەشە كەلىسىمدەرگە قول جەتكىزىپ, بيزنەس قاۋىمداستىق وكىلدەرىمەن كەزدەسكەن بولاتىن. سول كەزدەسۋدە Macau Legend Development Ltd كومپانيا باسشىلارىمەن الدىن-الا كەلىسسوزدەر جۇرگىزىلگەن. ەندى اراعا ۋاقىت ۇزاتپاي, قىتاي تاراپىنان ءىرى كومپانيانىڭ كەلىپ, ينۆەستيتسيا سالۋعا نيەت ءبىلدىرۋى ەكىجاقتى كەلىسىمنىڭ ناقتى ناتيجەسىن كورسەتىپ وتىر.
