تاريح عىلىمدارىنىڭ كانديداتى بولات نىعمەتوۆ ەل بولاشاعىن ويلاعاندا الدىمەن جاستاردى نازارعا الۋىمىز كەرەك دەيدى. «ۇيالى تەلەفوندارعا لاتىن ءالىپبيىن ۇيرەتەتىن ارنايى قوسىمشالار جاسالسا, جاستار تەز مەڭگەرىپ الار ەدى. ەلباسىنىڭ ءۇش تۇعىرلى ءتىل ساياساتى دا وسى رەتتە ءوز تيىمدىلىگىن كورسەتەدى, اعىلشىن ءتىلىن وقىعاندار ءۇشىن جاڭا الىپبيدە جازۋ قيىندىق كەلتىرمەيدى. سونداي-اق, بالاباقشادان باستاپ لاتىن قارىپىن ۇيرەتۋدى قولعا العان دۇرىس. ال ۇلكەن ادامدارعا قىسقا مەرزىمدى كۋرستار تەگىن ۇيىمداستىرىلسا, وقۋ-ادىستەمەلىك قۇرالدار تاراتىلسا, الىنبايتىن قامال جوق», - دەيدى عالىم.
فيلولوگيا عىلىمدارىنىڭ كانديداتى جۇمازيا ءابدىراحمانوۆانىڭ ويىنشا, جاڭا الىپبيگە كوزىمىزدى تەز ۇيرەتۋ ءۇشىن قازىردەن باستاپ كوشە اتاۋلارىن, جارنامالار مەن تەلەديدارداعى جۇگىرتپە جولداردى لاتىن ارپىمەن جازا بەرۋ كەرەك. گازەتتەرگە قوسىمشا ءبىر بەت سول الىپپەمەن بەرىلسە, ۇيرەنۋ قيىن ەمەس. كۇندەلىكتى الەۋمەتتىك جەلىدە دە لاتىنشا جازۋ ارقىلى بەيىمدەلۋىمىزگە بولادى.
دوڭگەلەك ۇستەلگە قاتىسقان «قازاق ءتىلى» قوعامى وبلىستىق بولىمشەسىنىڭ توراعاسى ءابىلحان تولەۋىشوۆ پەن وبلىستىق تىلدەردى دامىتۋ باسقارماسىنىڭ ءبولىم باسشىسى مانشۇك مۇقانبەتقاليەۆالار لاتىن گرافيكاسىنا كوشۋدىڭ ماڭىزدىلىعى جايىندا ايتتى. «بۇل ىستە تۇركيا, ازەربايجان, وزبەكستان ەلدەرىنىڭ تاجىريبەلەرىن نەگىزگە العان دۇرىس» دەيدى ماماندار.
باقىتگۇل باباش,
«ەگەمەن قازاقستان»
اتىراۋ
