كەڭەس باراسىندا مەملەكەت باسشىسى ەلوردا اۋماعىنداعى بىرقاتار كوشەلەردىڭ بويىندا قالانىڭ كوركىن بۇزىپ تۇرعان نىساندار مەن جەكە تۇرعىن ۇيلەردىڭ سۋرەتىن كورسەتتى.
«ەسكى ۇيلەردى ءسۇرىپ تاستاۋ بويىنشا جۇمىستاردى جانداندىرۋ قاجەت. ءدال وسى جەرلەرگە تۋريستەر بارىپ, سۋرەتكە ءتۇسىرىپ, بارشا الەمگە كورسەتەدى», - دەپ ەسكەرتتى پرەزيدەنت.
وسى ورايدا مەملەكەت باسشىسى كوشەنىڭ كەلبەتىن اسەمدەگەنىمەن, نىسانداردىڭ ارتقى جاقتارىندا كەمشىلىكتەر بار ەكەنىن قاداپ ايتتى.
«جۇمىستاردى تىڭعىلىقتى اتقارىڭىزدار. قاجەت بولسا, ارنايى قارجىنى ءبولۋ كەرەك. ەكسپو اياسىندا بارلىعىن تارتىپكە كەلتىرۋ مۇمكىندىگى بار. وسى جەرلەردە تۇرعىن ۇيلەر سالىناتىن بولسا, قۇرىلىسشىلارعا ارزانعا تۇسەدى. سەبەبى ورتالىقتا كوممۋنيكاتسيالار, جىلۋ جۇيەسى تارتىلعان. اتاپ ايتقاندا, قالانىڭ ورتالىق اۋداندارىن ەسكى ۇيلەردەن بوساتۋ كەرەك», - دەدى ن. نازارباەۆ.
بۇل تۇرعىدا پرەزيدەنت ەگەر دە پارلامەنتتە ارنايى زاڭنامانى قابىلداۋ قاجەت بولسا, قۇجاتتى تەزدەتىپ ەنگىزۋدى تاپسىردى.
«ويتكەنى بۇل ماسەلەلەر ەلوردانىڭ, جالپى ەلدىڭ مۇددەسىن قامتيدى. ەشكىم دە الىپ-ساتارلىقپەن اينالىسىپ, بۇل ەسكى ۇيلەر ەسەبىنەن تابىسقا كەنەلەمىن دەپ ويلاماۋى ءتيىس», - دەدى ەلباسى.
ءوز كەزەگىندە استانا اكىمى اسەت يسەكەشەۆ وسى باعىتتا اتقارىلىپ جاتقان جۇمىستار تۋرالى ايتتى.
«قازىرگى كەزدە 117 ەكى قاباتتى ءۇي بۇزىلدى. جىل سوڭىنا دەيىن 228-ءى ءسۇرىلىپ تاستالادى جانە تۇرعىنداردى جاڭا ۇيلەرگە كوشىرۋ جولىمەن 6 700 پاتەر سالىنادى. جيناقتالعان تاجىريبەنى, سونداي-اق بۇل باعدارلامانىڭ بيىل اياقتالاتىنىن ەسكەرە وتىرىپ, ونى قالالىق ورتانى قايتا جاڭارتۋ باعدارلاماسىنا ەكى باعىت بويىنشا ماسشتابتاۋدى ۇسىنامىز», - دەدى اكىم.
بۇل باعىتتاعى ۇسىنىستار ماقۇلدانعان جاعدايدا, باعدارلاماعا سايكەس, جەكە تۇرعىن ۇيلەر مەن ساياجايلار سۇرىلەتىن بولادى. ولاردىڭ ورنىنا قازىرگى زامانعى جايلى ۇيلەر سالىنادى دەپ جوسپارلانۋدا.
وسى ورايدا, مەملەكەت باسشىسى استانا اكىمىنە ەلوردادا جيناقى قۇرىلىس جۇرگىزۋدىڭ ۇسىنىسىن ەنگىزۋدى جۇكتەدى.
«اتاپ ايتقاندا, قالانىڭ ورتالىق اۋداندارىن ەسكى ۇيلەردەن بوساتۋ كەرەك. ەگەر دە پارلامەنتتە ارنايى زاڭنامانى قابىلداۋ قاجەت بولسا, قۇجاتتى تەزدەتىپ ەنگىزىڭىزدەر. ويتكەنى بۇل ماسەلەلەر ەلوردانىڭ, جالپى ەلدىڭ مۇددەسىن قامتيدى. ەشكىم دە الىپ-ساتارلىقپەن اينالىسىپ, بۇل ەسكى ۇيلەر ەسەبىنەن تابىسقا كەنەلەمىن دەپ ويلاماۋى ءتيىس. ءبىرىنشى كەزەكتە ينفراقۇرىلىمى بار اۋماقتاردى يگەرۋ كەرەك. سوندىقتان دا جازىقتاعى الىس اۋداندارعا قىمبات ينفراقۇرىلىمدى تارتۋ قاجەت بولمايدى. بارلىعى سىرتقا قاراي ۇمتىلادى. جاڭا الاڭداردا قۇرىلىس جۇرگىزۋگە تىيىم سالۋ كەرەك. الدىمەن قالانىڭ ءىشىن يگەرىڭىزدەر, تەك سودان كەيىن عانا بۇل تاقىرىپتى قاراستىراتىن بولامىز», - دەدى ن. نازارباەۆ.
پرەزيدەنت جيناقى ءارى تىعىز قۇرىلىس جۇرگىزۋ بارلىق قالالارعا ءتان قۇبىلىس ەكەنىن اتاپ ءوتتى. بۇل رەتتە ەسكى ۇيلەر بۇزىلعاننان كەيىن, قالانىڭ ىشىندەگى الاڭداردى يگەرىپ, سودان سوڭ جاڭا بوس الاڭداردا قۇرىلىس جۇرگىزۋ ماسەلەسىن تالقىلاۋعا بولاتىنىن جەتكىزىپ, باسپانا قۇرىلىسى جەكە ينفەستيتسيالار مەن مەملەكەتتىك-جەكە سەرىكتەستىك ەسەبىنەن جۇرگىزىلۋى ءتيىس ەكەنىن اتاپ ءوتتى.
«استانا اكىمىنە ەلورداداعى قۇرىلىستى جيناقى جۇرگىزۋ بويىنشا ۇسىنىس ەنگىزۋدى تاپسىرامىن, سەبەبى جىل سايىن سالىپ جاتقان باسپانامىز ارتىپ كەلەدى. سونىمەن بىرگە مەملەكەتتىك قوردان پاتەر الۋعا كەزەككە تۇرعاندار سانى دا ءوسىپ وتىر. قانداي مەملەكەتتىك قور؟ ءبىز نارىقتىق كەزەڭدە ءومىر ءسۇرىپ جاتىرمىز عوي», - دەپ اتاپ ءوتتى نازارباەۆ.
