«مەن جاڭا عانا سالىنىپ جاتقان نىسانداردى كورىپ كەلدىم. دايىندىق جوعارى دەڭگەيدە, قۇرىلىس جاقىن ارادا اياقتالعالى تۇر. نىسانداردى اباتتاندىرۋ, تولىقتىرۋ جۇمىستارى جۇرۋدە. كورمە وتكىزۋدى لايىقتى ۇيىمداستىرۋ الەمدىك قاۋىمداستىققا تاۋەلسىز قازاقستاننىڭ جەتىستىكتەرىن كورسەتەدى», - دەدى نۇرسۇلتان نازارباەۆ كورمەگە دايىندىق جانە استانانىڭ دامۋ ماسەلەلەرى بويىنشا وتكەن جينالىستا.
مەملەكەت باسشىسى سوڭعى 5 جىلدا ايماقتىق ءونىمنىڭ ءۇش ەسەگە وسكەنىن, بۇل كەزەڭدە ەلورداعا شامامەن 4,5 تريلليون تەڭگە ينۆەستيتسيا قۇيىلعانىن اتاپ ءوتتى. ەل ەكونوميكاسىنداعى استانا ۇلەسى 12% دەيىن كوتەرىلدى.
«ياعني, ءبىز قازاقستاندى تاعى ءبىر قالامەن - وزىنە سالىنعان قاراجاتتى مەملەكەت قازىناسىنا قايتارا باستاعان ۇلكەن اكتيۆپەن بايىتتىق. قالا ەكونوميكاسىنداعى شاعىن جانە ورتا بيزنەس ۇلەسى 46% قۇرايدى - بۇل ەلدىڭ وزگە ايماقتارى اراسىنداعى ەڭ جوعارى دەڭگەيدى قۇرايدى. استانا ميلليونەر قالاعا اينالدى. وتكەن جىلى ەل اۋماعىندا 10,8 ميلليون شارشى مەتر باسپانا پايدالانۋعا بەرىلسە, سونىڭ 2,3 ميلليون شارشى مەترى نەمەسە 20%-دان استامى استاناعا تيەسىلى. قالا ماڭىزدى ءارى جاھاندىق شارالار مەن كەزدەسۋلەردى ۇيىمداستىراتىن ءداستۇرلى ورىنعا اينالدى», - دەپ تولىقتىردى ن.نازارباەۆ.
ءوز كەزەگىندە "استانا ەكسپو-2017" ۇلتتىق كومپانياسىنىڭ باسشىسى احمەتجان ەسىموۆ كورمەگە دايىندىق بارىسى تۋرالى بايانداما جاسادى.
"قازىرگى ۋاقىتتا ەكسپو-نىڭ 20 نىسانىنىڭ 18-ءى اياقتالدى. ەكى نىسان سالىنۋ ۇستىندە, ولار - كونگرەسس ورتالىق (جاڭا كونگرەسس حولل سارايى - رەد.) پەن قوناقۇي. كونگرەسس ورتالىق ءسىزدىڭ تاپسىرماڭىزبەن قايتا جوبالاندى. قوناقۇي دە بەرگەن ەسكەرتۋلەرىڭىزدىڭ نەگىزىندە وزگەرتىلدى. سونىمەن قاتار ينۆەستورلار تارتىلدى. ناتيجەسىندە ونىڭ قۇنى 20 ملرد. تەڭگەگە قىسقاردى. ينۆەستورلاردىڭ سالعان قاراجاتىن ەسكەرسەك, مەملەكەتتىك بيۋدجەت قارجىسىنىڭ شىعىنى 30 ملرد. تەڭگەگە دەيىن قىسقارادى. كونگرەسس ورتالىق تا قايتا جوبالاندى, سونىڭ ارقاسىندا ونىڭ فۋنكتسيونالدىق مۇمكىندىگى كەڭەيدى جانە ودان 9 ملرد تەڭگە ۇنەمدەۋگە مۇمكىندىك تۋدى. بۇل ەكى نىساننىڭ قۇرىلىسى مامىر ايىنىڭ سوڭىندا اياقتالۋى ءتيىس. شەتەل پرەزيدەنتتەرىن وسى جەردە قارسى الامىز, ەكسپو-نىڭ اشىلۋى وسىندا بولادى", - دەپ اتاپ ءوتتى ا. ەسىموۆ.
ونىڭ سوزىنشە, ەكسپو-نىڭ 115 قاتىسۋشى مەملەكەتتىڭ 110-ى ءوز پاۆيلوندارىن الدى, 90-ى - بەزەندىرۋگە كىرىستى.
ەڭ باستى - "نۇر الەم" پاۆيلونىن بەزەندىرۋگە يتاليا, يسپانيا جانە شۆەيتساريا ارىپتەستەرىمەن بىرگە "Cembol" كومپانياسى اينالىسۋدا. قاتىسۋشىلارعا قىزمەت كورسەتۋ ورتالىعى ىسكە قوسىلدى. ول ءبىر تەرەزە ءپرينتسيپى بويىنشا جۇمىس ىستەيدى.
بۇگىنگى تاڭدا 28 مىڭنان استام ادام اككرەديتاتسيادان ءوتتى. 500 باق وكىلىنە ارنالعان ءباسپاسوز ورتالىعى قۇرىلدى. كورمەنىڭ قاۋىپسىزدىگىن قامتاماسىز ەتۋ ورتالىعى دا اشىلدى. سونىمەن قاتار كەدەندىك قىزمەتى بار لوگيستيكالىق ورتالىق ۇيىمداستىرىلدى.
"استاناعا ەكسپو كەزىندە 2,3 ميلليون تۋريست كەلەدى. كورمەگە كەلۋشىلەر سانى 5 ملن. ادامدى قۇرايتىنى جوسپارلانۋدا. قازىرگى تاڭدا 930 مىڭ بيلەت ساتىلدى. بيلەتتەردى 44 شەت مەملەكەتتەر دە ساتىپ الدى", - دەدى ەسىموۆ.
