− ەسكى سۋرەتتەر بولسا, ولاردى وڭدەپ, كوبەيتىپ, ۇلكەيتىپ, پورترەت جاساتامىز. استىنا مايدانگەردىڭ اتى-ءجونىن, تۋعان, قازا تاپقان جىلىن كورسەتەمىز. وسىعان كەتكەن قارجىنىڭ بارلىعىن پارتيا فيليالى ءوزى كوتەرەدى, − دەيدى «نۇر وتان» پارتياسىنىڭ وبلىستىق فيليالى ساياسي جۇمىستار ءبولىمىنىڭ مەڭگەرۋشىسى ولجاس دۇيسەكوۆ.
قوستانايلىقتار تەك ءومىردەن وتكەن اتالارىنىڭ عانا ەمەس, قازىر ارامىزدا سەلەۋدەي سەلدىرەپ, سىرتقا شىعا الماي ۇيدە وتىرىپ قالعان سوعىس ارداگەرلەرىنىڭ دە سۋرەتتەرىن اكەلەدى. قارت مايدانگەر ءوزىن ءالى قاتاردا سانايدى, شەرۋگە شىققىسى, ماڭگىلىك الاۋ قاسىندا جەڭىس كۇنىنە جەتە الماعان قاندى كويلەك دوستارىنىڭ رۋحىنا باس ءيىپ, گۇل شوقتارىن قويعىسى كەلەدى. سوندىقتان ولاردىڭ پورترەتتەرىن مەرەكەلىك شەرۋ كەزىندە پارتيا فيليالىنىڭ ۆولونتەرلەرى نەمەسە الەۋمەتتىك قىزمەتكەرلەر ۇستاپ شىعاتىن بولادى.
جىل سايىن اكتسيا جاڭالىقتارمەن, قىزىقتى ىستەرمەن تولىعىپ كەلەدى.
− وسىدان ەكى جىل بۇرىن بىرنەشە ادام ءبىر ارداگەردىڭ سۋرەتىن اكەلدى. سويتسەك, سوعىستا قازا تاپقان بوزداق الگى كىسىلەردىڭ بارلىعىنا ورتاق تۋىس ەكەن, ولار ءبىر قالادا تۇرىپ, ءبىرىن-ءبىرى بىلمەگەن. ولار اكتسيا ارقىلى تۋىستارىن تاۋىپ, ارقا-جارقا بولدى. ال بيىل ءبىر اجەي سوعىستان قايتپاعان, حابارسىز كەتكەن اعاسىنىڭ حاتىن اكەلدى. كومەك سۇرادى. ءبىز اسكەري كوميسسارياتتار, ارحيۆتەر ارقىلى اجەيدىڭ اعاسىنىڭ باتىس ەۋروپادا جەرلەنگەنىن انىقتادىق, − دەيدى ولجاس دۇيسەكوۆ.
قوستانايلىق نۇروتاندىقتار اكتسيا باستالعالى بەرى ءبىر مىڭنان اسا سوعىس ارداگەرىنىڭ پورترەتتەرىن جاساپتى. جەڭىس كۇنى مەرەكەلىك شەرۋگە قارتتار, جاستار – بارلىعى قاتىسادى. بىرەۋ اكەسىنىڭ, بىرەۋ اعاسىنىڭ, ناعاشىسىنىڭ, اتاسىنىڭ, باباسىنىڭ پورترەتتەرىن الىپ شىعادى. جەڭىس تۋىنىڭ جەلبىرەگەنىنە 70 جىلدان اسسا دا, ەرلىككە تاعزىم ەسكىرگەن جوق, اتالار رۋحى اسقاقتاپ, تۋعان ەلگە, تۋعان جەرگە دەگەن پەرزەنتتىك سەزىم ءار ءجۇرەكتى اتشا تۋلاتادى. قوستانايلىقتار جەڭىس كۇنىن قاسيەتتەپ, قادىرلەپ قارسى الادى.
ءنازيرا جارىمبەتوۆا,
«ەگەمەن قازاقستان»
قوستاناي
