ءبىز بۇل ويعا «تۇركى جانە سلاۆيان تىلدەرىنىڭ بىرتەكتىلىگىن ناسيحاتتاۋ ورتالىعىنىڭ» قۇرىلۋىنا وراي وتكەن باسپاسوز ءماسليحاتىنان كەيىن كەلدىك. الماتىداعى «قازاقستاننىڭ ورىس قوعامى» مەن «ازات» ازاماتتىق قوزعالىسىنىڭ ءبىرلەسكەن وتىرىسىندا تۇركى جۇرتى مەن سلاۆيان حالىقتارىنىڭ تىلدەرى ءبىر ارنادان باستاۋ الادى دەگەن پىكىر ايتىلدى. بۇل تاقىرىپتا ولجاس ءسۇلەيمەنوۆتىڭ قىزعىلىقتى ماتەريالدار ۇسىنىپ جۇرگەنى بەلگىلى. وسى تاقىرىپتى ءارى قاراي ىندەتە زەرتتەپ, دامىتپاق ماقساتتا قازاقستاننىڭ «ازات» ازاماتتىق قوزعالىسىنىڭ ءتوراعاسى حاسەن قوجا-احمەت 2014 جىلى «ورىس ءتىلى كونە تۇركى ءتىلى مە؟» ەڭبەگىن كىتاپ ەتىپ باستىرعان. قازاقستاننىڭ ورىس, كازاك جانە سلاۆيان ۇيىمدارى ءۇيلەستىرۋ كەڭەسىنىڭ قارجىلاندىرۋىمەن شىققان زەرتتەۋ ەڭبەك تۇساۋى كەسىلىپ وتىرعان ورتالىقتىڭ نەگىزگى وقىتۋ قۇرالى دەۋگە بولادى.
قازاقستان كازاكتارىنىڭ باس اتامانى يۋري زاحاروۆتىڭ ايتۋىنشا, ۇلتارالىق تاتۋلىق پەن دوستىقتى دامىتۋدىڭ ءبىر جولى وسى ورتالىق بولماق. اتامان تىلدىك بىرتەكتىلىكتى ناسيحاتتايتىن ورتالىق تۇركى جانە سلاۆيان حالىقتارىنىڭ ءوز ۇلتتىق تامىرلارىن تەرەڭنەن تانۋىنا, سول ارقىلى ىنتىماقتاستىقتىڭ ارتۋىنا ۇلەس قوسادى دەگەن سەنىمدە.
ال يدەيا اۆتورى حاسەن قوجا-احمەت «مەملەكەتتىك ءتىلدىڭ ءمارتەبەسىن كوتەرۋ ماسەلەسى كوپتەن بەرى ايتىلىپ كەلە جاتىر. ءبىز بۇل ماسەلەگە عىلىمي تۇرعىدا كەلۋ كەرەك دەپ شەشتىك. سەبەبى, قازاق تىلىنە قاتىستى قانشاما قوعامدىق ۇيىمدار قۇرىلدى, ناتيجە از. الدىمەن, قازاق ءتىلىن وزگە ۇلتتارعا جەڭىل ءارى تەز ۇيرەتۋدىڭ عىلىمي ادىستەمەسى جاسالۋعا ءتيىس. الدارىڭىزداعى كىتاپتى شىعارۋداعى ءبىر ماقساتىمىز سول. ورىس ءتىلىنىڭ كونە تۇركى تىلىمەن تامىرلاس ەكەنىن بەلگىلى دارەجەدە دالەلدەدىك. ەندىگى مىندەت – سونى جالپاق جۇرتقا ۇعىندىرۋ. تىلدىك بىرلىكتەردىڭ تامىرلاستىعىن بىلگەن ادامعا ءتىل ۇيرەنۋ قيىندىق تۋعىزبايدى, كەرىسىنشە, قىزىعۋشىلىعىن ارتتىرا تۇسەدى دەپ ويلايمىن», دەدى.
ناسيحات ورتالىعى الداعى ۋاقىتتا ءتۇرلى مەكەمەلەردە كەزدەسۋلەر مەن دارىستەر ءوتكىزىپ, كۋرستار ۇيىمداستىرۋ سياقتى بىرنەشە سالا بويىنشا جۇمىسىن جالعاستىرماق. ايتا كەتۋ كەرەك, دارىستەر مەن ءتىل ۇيرەتۋگە ارنالعان كۋرستار تەگىن جۇرگىزىلەدى.
الماس ءنۇسىپ,
«ەگەمەن قازاقستان»
الماتى
