«مەن ەلىمىز مىقتى, ءارى جاۋاپكەرشىلىگى جوعارى ءبىرتۇتاس ۇلت بولۋى ءۇشىن بولاشاققا قالاي قادام باساتىنىمىز ءجانە بۇقارالىق سانانى قالاي ءوزگەرتەتىنىمىز تۋرالى كوزقاراستارىمدى ورتاعا سالۋدى ءجون كوردىم», – دەپ باستالعان ەلباسىنىڭ ءسوزى تۇتاستاي ەلىمىزدىڭ عانا ەمەس, ۇرپاقتارىنىڭ ەرتەڭى ءۇشىن الاڭدايتىن كەز كەلگەن وتانداسىمىزدى ەلەڭ ەتكىزبەي قويماسى انىق. وقىپ شىقتىق, شىنىندا دا, تالايىمىزعا وي سالاتىن كوزقاراستار ايتىلعان ەكەن. اسىرەسە, ەلباسىنىڭ ەل دامۋىن, جاڭعىرۋ اتاۋلىنى ۇلتتىق سانامەن, ۇلتتىق ءمۇددەلەرمەن تىعىز بايلانىستىرۋ قاجەتتىگىن ايتقانى قاتتى ۇنادى. «جاڭعىرۋ اتاۋلى بۇرىنعىداي تاريحي تاجىريبە مەن ۇلتتىق ءداستۇرلەرگە شەكەدەن قاراماۋعا ءتيىس. كەرىسىنشە, زامانا سىنىنان سۇرىنبەي وتكەن وزىق داستۇرلەردى تابىستى جاڭعىرۋدىڭ ماڭىزدى العىشارتتارىنا اينالدىرا ءبىلۋ قاجەت. ەگەر جاڭعىرۋ ەلدىڭ ۇلتتىق-رۋحاني تامىرىنان ءنار الا الماسا, ول اداسۋعا باستايدى. مەن حالقىمنىڭ تاعىلىمى مول تاريحى مەن ىقىلىم زاماننان ارقاۋى ۇزىلمەگەن ۇلتتىق سالت-داستۇرلەرىن الداعى وركەندەۋدىڭ بەرىك ءدىڭى ەتە وتىرىپ, ءاربىر قادامىن نىق باسۋىن, بولاشاققا سەنىممەن بەت الۋىن قالايمىن», دەيدى پرەزيدەنت. ناعىز ۇلت كەلەشەگىن ويلاعان تۇلعانىڭ ءسوزى.
ءبىز, ەلباسى تاۋىپ ايتقانداي, ۇلتتىق بىرەگەيلىكتى ساقتاي وتىرىپ, العا ۇمتىلۋىمىز كەرەك. «ءداستۇردىڭ وزىعى بار, توزىعى بار» دەگەن ءسوز بار حالقىمىزدا. كەز كەلگەن ۇلتتىڭ سالت-سانا, ادەت-عۇرپىندا ساقتاپ, ودان ءارى دامىتاتىن ادەمى تۇستار, زاماننىڭ اعىمىنا قاراي ەسكىرىپ, ەندىگىدە پايداسىنان زيانى كوپ بولاتىن كەرتارتپا تۇستار بار. ياعني, جاقسىسىن الىپ, جامانىنان ارىلعانىمىز ابزال. جاڭعىرۋ ۇعىمىنىڭ ءوزى مەيلىنشە كونەرگەن, جاھاندىق الەممەن قابىسپايتىن كەيبىر داعدىلار مەن ادەتتەردەن ارىلۋ دەگەندى بىلدىرەدى.
ەلباسى قاي سوزىندە دە ءبىلىم ءماسەلەسىن اۋزىنان تاستامايدى. بۇل ول كىسىنىڭ كەلەشەكتىڭ قامىن, ەلىمىزدىڭ الەمدەگى ابىرويىن ويلاعانىنان ەكەنى داۋسىز. «ءبىلىمنىڭ سالتاناتى جالپىعا ورتاق بولۋعا ءتيىس. ونىڭ ايقىن دا, بۇلتارتپاس سەبەپتەرى بار. تەحنولوگيالىق رەۆوليۋتسيانىڭ بەتالىسىنا قاراساق, تاياۋ ونجىلدىق ۋاقىتتا قازىرگى كاسىپتەردىڭ جارتىسى جويىلىپ كەتەدى. ەكونوميكانىڭ كاسىپتىك سيپاتى بۇرىن-سوڭدى ەشبىر ءداۋىردە مۇنشاما جەدەل وزگەرمەگەن. ءبىز بۇگىنگى جاڭا اتاۋلى ەرتەڭ-اق ەسكىگە اينالاتىن, ءجۇرىسى جىلدام داۋىرگە اياق باستىق. بۇل جاعدايدا كاسىبىن نەعۇرلىم قينالماي, جەڭىل ءوزگەرتۋگە قابىلەتتى, اسا ءبىلىمدار ادامدار عانا تابىسقا جەتەدى», دەيدى ەلباسى. اسىرەسە, ءبىلىم بەرۋ سالاسىنداعى ماماندار مەن ءوسكەلەڭ ۇرپاق, مىنە, وسى ماسەلەنى جاقسى ءتۇسىنۋىمىز كەرەك. قازىرگىدەي زاماندا بارىنەن دە ءبىلىمدى جوعارى قوياتىن ۇلت قانا تابىسقا جەتەدى.
ەلباسى ماقالاسىنداعى سانانىڭ اشىقتىعى, لاتىن الىپبيىنە كوشۋ جايلى ماسەلەلەر مەن «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى, «تۋعان جەر» باعدارلاماسى تۋرالى ۇسىنىستار دا كوپتىڭ كوكەيىندە جۇرگەن جايتتار ەدى.
«ەكى ءداۋىر تۇيىسكەن ءولارا شاقتا قازاقستانعا تۇبەگەيلى جاڭعىرۋ جانە جاڭا يدەيالار ارقىلى بولاشاعىن باياندى ەتە ءتۇسۋدىڭ تەڭدەسسىز تاريحي مۇمكىندىگى بەرىلىپ وتىر. جاڭا جاعدايدا جاڭعىرۋعا دەگەن ىشكى ۇمتىلىس – ءبىزدىڭ دامۋىمىزدىڭ ەڭ باستى قاعيداسى. ءومىر ءسۇرۋ ءۇشىن وزگەرە ءبىلۋ كەرەك», دەپ تۇيگەن ەكەن ءسوزىن نۇرسۇلتان ءابىش ۇلى. وتە قۇپتارلىق, ابىز ادامنىڭ دۋالى اۋزىنان شىققان اڭگىمە.
بەكزات التىنبەكوۆ,
جەزقازعان قالالىق قوعامدىق كەلىسىم كەڭەسىنىڭ توراعاسى, قالالىق ءماسليحات دەپۋتاتى
جەزقازعان
