«Smart zholy» باعدارلاماسى وڭتۇستىك ازياداعى «Echelon Asia Summit» جەتەكشى ستارتاپ-الاڭىمەن بىرگە جۇزەگە اسىرىلاتىنىن ايتا كەتكەن ءجون. ونىڭ باستى ەلەمەنتى كونكۋرستىق نەگىزدە ىرىكتەلگەن ون جاستار كومانداسى الەمنىڭ جەتەكشى تەحنولوگيالىق حابىنىڭ ءبىرى – سينگاپۋردەگى ەكى اپتالىق باعدارلاما شەڭبەرىندە ءوز جوبالارىن الەمدىك دەڭگەيدەگى مەنتورلاردىڭ تىكەلەي باسشىلىعىمەن باستاپقى ءونىمىن شىعارعانعا دەيىنگى جولدان ءوتىپ, ءىرى ازيالىق كورپوراتسيالارعا ۇسىنا الادى.
جيىندى اشىپ ءسوز سويلەگەن قوردىڭ اتقارۋشى ديرەكتورى قانات جۇماباەۆ زاماناۋي باعدارلامانىڭ پايداسىن سالماقتاپ, ونىڭ قازىرگى تاڭداعى وزەكتىلىگىن اڭگىمەلەدى. «Smart zholy» جوباسىن ىسكە اسىرۋ جاستاردىڭ ستارتاپتارىن تەك قازاقستانعا ەمەس, عالامدىق نارىققا شىعارادى. سونىمەن قاتار, مەملەكەت باسشىسىنىڭ جولداۋىندا جۇكتەلگەن ەكونوميكانى جەدەل جاڭعىرتۋ جانە تسيفرلىق ەكونوميكانى قۇرۋ ءمىندەتىن ورىنداپ, استانانى تەحنولوگيالىق كارتاداعى جاڭا نۇكتە رەتىندە كورسەتەدى», دەپ سەندىردى ول.
باسقوسۋدا اقپارات جانە كوممۋنيكاتسيالار ءمينيسترى ءداۋرەن اباەۆ اتالعان جوبانى پرەزيدەنت باستامالارىمەن ءۇندەسكەن ماڭىزدى ىستەردىڭ قاتارىنا جاتقىزدى. «بارشاڭىزعا ءمالىم, قازىرگى كەزدە قازاقستاننىڭ ءۇشىنشى جاڭعىرۋى اياسىنداعى كەشەندى شارالار باستالدى. مەملەكەت باسشىسىنىڭ تاپسىرمالارىنا ساي, اقپارات جانە كوممۋنيكاتسيالار مينيسترلىگى دە تەحنولوگيالىق جاڭعىرۋدى قامتاماسىز ەتەتىن جوبالاردى, ونىڭ ىشىندە «تسيفرلى قازاقستان» مەملەكەتتىك باعدارلاماسىن ازىرلەۋدە. وسى ءىرگەلى ىستەردى جۇزەگە اسىرۋدا ەلىمىز جاڭا بۋىن جاستارعا ۇلكەن ءۇمىت ارتادى. سوندىقتان دا «Smart zholy» جوباسىنىڭ باستالۋى جاس ستارتاپشىلارعا شىنايى قولداۋ بولاتىنى ءسوزسىز. جوباعا قاتىسۋشىلار وتاندىق يننوۆاتسيالىق ءونىمدەر قاتارىن ارتتىرىپ قانا قويماي, اقپاراتتىق تەحنولوگياداعى تاجىريبەلەرىن ەل يگىلىگىنە جاراتادى دەپ سەنەمىز», دەدى مينيستر.
تۇساۋكەسەردە باسقا قاتىسۋشىلار دا سويلەپ, وي-پىكىرلەرىن ورتاعا سالدى.
اسحات رايقۇل,
«ەگەمەن قازاقستان»
