سەنات توراعاسى قازاقستان تاراپى بۇل ماڭىزدى شارانى جوعارى دەڭگەيدە ۇيىمداستىرۋعا نيەتتەنىپ وتىرعانىن حابارلادى. 1957 جىلى قۇرىلعان پاگۋوش قوزعالىسى جاھاندىق اۋقىمدا بەيبىتشىلىكتى, قارۋسىزدانۋدى, بەيبىتشىلىكتى جانە عىلىمي ىنتىماقتاستىقتى جاقتايتىن عالىمداردى, ساياسي جانە قوعام قايراتكەرلەرىن بىرىكتىرەدى. بۇل قوزعالىس قارۋسىزدانۋ جانە قاۋىپسىزدىك سالاسىنداعى: يادرولىق قارۋدى اۋادا, عارىش كەڭىستىگىندە جانە سۋ استىندا سىناۋعا تىيىم سالۋ تۋرالى شارت, زىمىرانعا قارسى قورعانىس جۇيەسىن شەكتەۋ تۋرالى شارت, بيولوگيالىق جانە حيميالىق قارۋ تۇرلەرىنە تىيىم سالۋ تۋرالى كونۆەنتسيا, ەۋروپاداعى جاي قارۋ-جاراقتار تۋرالى شارت جانە باسقا دا كوپتاراپتى كەلىسىمدەردى ازىرلەۋ مەن قابىلداۋدا ماڭىزدى ءرول اتقاردى. ۇيىم 1995 جىلى بەيبىتشىلىك سالاسىنداعى نوبەل سىيلىعىنا يە بولدى.
ق. توقاەۆتىڭ ايتۋىنشا, قازاقستان پاگۋوش قوزعالىسىنىڭ يدەيالارى مەن قۇندىلىقتارىن جاقتايدى, قارۋسىزدانۋ مەن قاۋىپسىزدىك سالاسىنداعى حالىقارالىق كەلىسىمدەردى ازىرلەۋ مەن قابىلداۋداعى ءرولىن جوعارى باعالايدى. قوزعالىس مۇشەلەرىنىڭ استانادا وسىنداي كەزدەسۋ وتكىزۋگە نيەت ءبىلدىرۋى ءبىزدىڭ ەلىمىزدىڭ جانە سەمەي يادرولىق پوليگونىن جاۋىپ, الەمدەگى ءتورتىنشى ورىنعا يە بولعان يادرولىق قارۋدان باس تارتقان ءارى ادامزاتتى يادرولىق قاۋىپتەن قۇتقارۋ ىسىنە زور ۇلەس قوسقان پرەزيدەنت نۇرسۇلتان نازارباەۆتىڭ حالىقارالىق بەدەلىنىڭ كورىنىسى بولىپ تابىلادى.
