2016 جىل قازاقستاندىق اۋىل شارۋاشىلىعى ءونىمىن وندىرۋشىلەر ءۇشىن جەمىستى جىل بولدى. جىل قورىتىندىسى بويىنشا, سالاداعى شاعىن جانە ورتا بيزنەستىڭ سالىق تولەنگەنگە دەيىنگى تازا كىرىسى 84,6 ملرد تەڭگەنى قۇرادى.
2015 جىلى شاعىن جانە ورتا بيزنەستىڭ پايدا تاپپاق تۇگىلى, 25,2 ملرد تەڭگە شىعىنعا ۇشىراعانىن ايتا كەتەيىك.
وتكەن جىلعى شاعىن جانە ورتا بيزنەستىڭ اۋىل شارۋاشىلىعىنداعى تابىسى 2012-2015 جىلدار ارالىعىنداعى كىرىستى قوسا ەسەپتەگەندەگىدەن دە كوپ بولدى. بۇل ۋاقىت ارالىعىندا بيزنەسكە جالپى كولەمى 66,1 ملرد تەڭگە كىرىس كىرگەن ەدى.
وتكەن جىلى ۇلتتىق ەكونوميكانى العا سۇيرەگەن سالالاردىڭ ءبىرى اۋىل شارۋاشىلىعى ەكەنى انىق. رەسپۋبليكالىق ءىجو 1,3% بولعاندا, اۋىل شارۋاشىلىعىنىڭ ءوسىمى 5,5% بولعان ەدى.
جولداۋدا ايتىلعان مىندەتتەمەگە ساي, قازاقستان ەۋرازيا كەڭىستىگىنىڭ «نان سەبەتىنە» اينالۋى ءتيىس. ول ءۇشىن اۋىل شارۋاشىلىق سالاسى شيكىزات ءوندىرۋشى بولىپ قانا شەكتەلمەي, وڭدەۋ ونەركاسىبىن دە دامىتىپ, دايىن ءونىم ەكسپورتىنا قارقىن بەرۋى كەرەك.
وسى ورايدا, ۆەدومستۆولار پەن اكىمدىكتەرگە سۋبسيديا بەرۋ ءتارتىبىن قايتا قاراۋ, اۋىل شارۋاشىلىعىن سۋبسيديالاۋ جۇيەسىنەن ساقتاندىرۋ جۇيەسىنە اۋىسۋ, الداعى بەس جىلدا 500 مىڭ اۋىل شارۋاشىلىق كووپەراتيۆىن قۇرۋ, ءونىمدى وڭدەۋ دەڭگەيىن ارتتىرۋ, ساقتاۋ, تاسىمال مەن ساتۋدىڭ ءتيىمدى جۇيەسىن قۇرۋ, ەڭبەك ونىمدىلىگىن ارتتىرۋ مەن وندىرىستىك شىعىنداردى ازايتۋ, جەردى پايدالانۋ تيىمدىلىگىن ارتتىرۋ سەكىلدى مىندەتتەمەلەر جۇكتەلگەن.
