قۇستارعا, تابيعاتقا دەگەن جاناشىرلىق شاراسى وبلىس ورتالىعىنداعى ۆورۋشين ساياباعىندا باستالدى. بۇل ساياباقتى جازدا جاقسى وزگەرىستەر كۇتىپ تۇر. ERG مەن وبلىس اكىمدىگى اراسىندا جاسالعان الەۋمەتتىك جوبالار جونىندەگى مەموراندۋم اياسىندا اعىمداعى جىلى اباتتاندىرۋ جۇمىستارى جالعاسادى. سونداي-اق, اليۋميني زاۋىتى ۇجىمىنىڭ ۇسىنىسىمەن «مەتاللۋرگتەر اللەياسى» اشىلماق. ال قۇستارعا ارنالعان ۇيالار – اباتتاندىرۋدىڭ العاشقى باستاماسى دەۋگە بولادى.
– ساياباقتى مەتاللۋرگتەردىڭ قامقورلىققا العانىنا ءبىراز جىل بولدى. ءار كوكتەم مەن كۇزدە وسى باقتى زاۋىت جۇمىسشىلارى, قىزمەتكەرلەرى رەتكە كەلتىرىپ, جينالىپ قالاتىن قوقىستى شىعارادى. بۇگىن ءبىز ساياباقتا قۇستاردىڭ دا تۇراقتاپ, قالالىقتاردىڭ كوڭىلىن اسەم اۋەنىمەن قۋانتىپ تۇرسىن دەگەن نيەتپەن ۇيالار جاساپ, ىلدىك, – دەيدى «قازاقستان ءاليۋمينيى» اق وندىرىستىك قاۋىپسىزدىك, ەكولوگيا جانە ەڭبەكتى قورعاۋ دەپارتامەنتى باستىعىنىڭ ورىنباسارى رەنات سارلىباەۆ.
وبلىس ورتالىعىنداعى № 33 مەكتەپتىڭ جاس تابيعات زەرتتەۋشىلەرى تابيعات قورعاۋعا ارنالعان ۇرانسوزدەر جازىپ, قولونەر بۇيىمدارىن جاساپ اكەلىپتى.
– ەشقانداي ءجىپ پەن شەگەنى پايدالانباي, ۇيالاردىڭ كولدەنەڭ اعاشىن بۇتاقتار اراسىنا بەكىتتىك. جەل مەن تۋرا تۇسەتىن كۇن ساۋلەسىنەن قورعاۋ ءۇشىن ءسال ەڭكىش ورنالاستىردىق. ۇيالاردى قالاي بەكىتۋ كەرەكتىگىن ەكولوگيا جانە تۋريزم ورتالىعىندا وقىپ, بىلدىك. قىستا ۇيا جانىنا جەم-سالعىش ورناتامىز. قۇستاردى ايالاپ, قامقور بولۋ كەرەك, – دەيدى وقۋشى قانات جامانوۆ.
– ساۋىردە قۇستار ءوز جۇپتارىمەن ۇيا سالاتىن ورىن ىزدەيدى. قالالىق ساياباققا ۇيا ورناتۋ – وتە وزەكتى شارا. سەبەبى, مۇندا قۇستار ۇيا سالاتىن اعاشتار از, – دەيدى ەكولوگيا جانە تۋريزم ورتالىعىنىڭ مەڭگەرۋشىسى ۆالەنتينا شوروحوۆا.
پاۆلودار وبلىسى
فاريدا بىقاي,
«ەگەمەن قازاقستان»
سۋرەتتى تۇسىرگەن ۆيكتوريا ماشكارينا
