– قازاقستان حالقى اسسامبلەياسىنىڭ ححV سەسسياسىنان نە كۇتەسىزدەر؟
لەو شيك,
قازاقستان حالقى اسسامبلەياسىنىڭ ءمۇشەسى, قوعامدىق كەلىسىم جونىندەگى وبلىستىق كەڭەستىڭ ءتوراعاسى, سەسسيا دەلەگاتى:
– بۇل جيىننان ءبىزدىڭ كۇتەرىمىز كوپ. بۇل باسقوسۋدىڭ بۇرىنعى باسقوسۋلاردان ءمانى ءوزگەرەك بولارىنا كۇمانىمىز جوق. ەلباسىمىز, قازاقستان حالقى اسسامبلەياسىنىڭ ءتوراعاسى نۇرسۇلتان نازارباەۆ جاقىندا عانا بارشا قازاقستاندىقتاردى رۋحاني جاڭعىرۋعا باستايتىن, تاعىلىمدى تاريحىمىزدى تارازىلاۋعا, ەل مەن جەردى قادىرلەپ, قاستەرلەۋگە شاقىراتىن, ءححى عاسىرداعى رۋحاني بەت-بەينەمىزدى ايقىندايتىن باعدارلامالىق ماقالاسىن جاريا ەتتى. الداعى القالى جيىندا پرەزيدەنت الەمنىڭ دامىعان 30 ەلىنىڭ قاتارىنا ەنۋگە جول اشاتىن ستراتەگيالىق قۇجاتتى جۇزەگە اسىرۋدىڭ ناقتى جولدارىن نۇسقاپ, اسسامبلەيا مۇشەلەرىنە تىڭ ءمىندەتتەر جۇكتەيدى دەپ ويلايمىن.
راۆيل يۋنۋسوۆ,
شىعىس قازاقستان وبلىسى قازاقستان حالقى اسسامبلەياسىنىڭ جاستار ليگاسى ءتوراعاسىنىڭ ورىنباسارى, تاتار ەتنومادەني ءبىرلەستىگىنىڭ مۇشەسى, سەسسيا دەلەگاتى:
– قازاقستان حالقى اسسامبلەياسىنىڭ ءار باسقوسۋىنىڭ ءوزىندىك ورنى بار. سەسسيانىڭ ءار جيىنى ءوزگەشە وتەدى. القالى جيىندى اسىعا, تاعاتسىزدانا كۇتەتىنىمىز سودان بولسا كەرەك. بيىلعى باسقوسۋ, ءسوز جوق, ەلباسىنىڭ جۋىقتا باسپاسوز بەتىندە جارىق كورگەن «بولاشاققا باعدار: رۋحاني جاڭعىرۋ» اتتى ماقالاسىن كەڭ كولەمدە تالقىلاۋعا ارنالادى دەپ ويلايمىن.
– مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ ءمان-ماڭىزى نەدە دەپ ويلايسىزدار؟
لەو شيك:
– اتالعان ماقالادا ەلباسى پراگماتيزم ماسەلەسىنە ەرەكشە ەكپىن بەرەدى. «پراگماتيزم – ءوزىڭنىڭ ۇلتتىق جانە جەكە بايلىعىڭدى ناقتى ءبىلۋ, ونى ۇنەمدى پايدالانىپ, سوعان سايكەس بولاشاعىڭدى جوسپارلاي الۋ, ىسىراپشىلدىق پەن استامشىلىققا, داڭعويلىق پەن كەردەڭدىككە جول بەرمەۋ دەگەن ءسوز», دەدى. مەن ايتار ەدىم, ناعىز پراگماتيك ول – ءبىزدىڭ پرەزيدەنت. ول كىسىنىڭ ەرەكشە قاسيەتى, بولاشاقتى بولجاي بىلەدى. «اۋەلى – ەكونوميكا, سودان كەيىن ساياسات», دەدى. ەكونوميكانى كوتەردى, ەلدىڭ ءال-اۋقاتىن جاقسارتتى. ودان كەيىن ساياساتقا دا كەزەك كەلىپ, ەلدىڭ باس قۇجاتى – كونستيتۋتسياعا وزگەرىستەر ەنگىزىلىپ, پارلامەنت پەن ۇكىمەتتىڭ قۇزىرەتى كەڭەيتىلدى.
ەندى, مىنە, رۋحاني جاڭعىرۋ ماسەلەسى حالىقتىڭ نازارىنا ۇسىنىلىپ وتىر. رۋحاني, ۇلتتىق قۇندىلىقتارىن قاستەرلەگەن ەلدىڭ قاي كەزدە دە مەرەيى ءۇستەم. ەلباسى ۇلى دالانىڭ ۇلى تاريحىن ۇلىقتاۋعا, تۋعان جەرگە تۋ ءتىگۋگە شاقىرىپ وتىر بارشامىزدى. پرەزيدەنتتىڭ: «وتكەن حح عاسىر حالقىمىز ءۇشىن قاسىرەتكە تولى, زوبالاڭ دا زۇلمات عاسىر بولدى», دەۋىندە ۇلكەن ءمان جاتىر. راسىندا, قيىندىقتار كوپ بولدى. ءبىر عانا سوعىس جىلدارىن الىپ قاراڭىز. قانشاما ۇلتتار تۋعان مەكەنىنەن اجىراپ, قازاقستانعا كۇشتەپ جەر اۋدارىلدى.
الايدا, باۋىرمال قازاق حالقى ءبوتەنسىڭ دەپ ەشقايسىسىنىڭ كەۋدەسىنەن يتەرگەن جوق. بارىمەن ءبولىستى. قامقورلىعىن كورسەتتى. سونىڭ ناتيجەسىندە ولار اياقتارىنان قاز تۇرىپ, ءوسىپ, وركەندەدى. ءبىز قازاق حالقىنىڭ بۇل قامقورلىعىن ۇمىتۋعا ءتيىستى ەمەسپىز. العىس ايتۋعا ءتيىسپىز. وسىدان ءبىر-ەكى جىل بۇرىن كورەي ۇلتى وكىلدەرىنىڭ باستاماسىمەن قازاق جەرىنە دەپورتاتسيالانعان ۇلتتار مەن ۇلىستار اتىنان «قازاق حالقىنا مىڭ العىس» اتتى ەسكەرتكىش اشىلدى. بۇل – ۇرپاققا ۇلگى بولارلىق دۇنيە, قيىن كەزدە پانا, سايا بولعان ۇلتقا دەگەن قۇرمەت.
راۆيل يۋنۋسوۆ:
– پرەزيدەنت ماقالاسى مەن سەكىلدى جاستاردىڭ عانا ەمەس, بۇكىل حالىقتىڭ كوڭىلىندەگى دۇنيەلەردى ءدوپ باسقان سەكىلدى. ءاسىرەسە, جاستاردىڭ ءبىلىم كوكجيەگىن كەڭەيتۋگە قاتىستى ايتقان ءسوزدەرى زامانداستارىمدى بەي-جاي قالدىرمايتىنى انىق. «تابىستى بولۋدىڭ ەڭ ىرگەلى, باستى فاكتورى ءبىلىم ەكەنىن ءاركىم تەرەڭ ءتۇسىنۋى كەرەك. جاستارىمىز باسىمدىق بەرەتىن مەجەلەردىڭ قاتارىندا ءبىلىم ءاردايىم ءبىرىنشى ورىندا تۇرۋى شارت. سەبەبى, قۇندىلىقتار جۇيەسىندە ءبىلىمدى بارىنەن بيىك قوياتىن ۇلت قانا تابىسقا جەتەدى», – دەدى ەلباسى.
راسىندا دا, ءبىز, جاستار ءبىلىمدى بولماساق, كوپ ءتىل بىلمەسەك, باسەكەگە قابىلەتتى بولا المايمىز.
جازىپ العان ازامات قاسىم,
«ەگەمەن قازاقستان»
وسكەمەن
