ءبىلىم بەرۋ ستاندارتتارىنىڭ جوعارى دەڭگەيىن جەتىلدىرۋ ءۇشىن ساپالى عىلىمي پلاتفورما بولىپ وتىرعان كونفەرەنتسيا تۇراقتى دامۋ ماقساتىندا ءارتۇرلى ەلدەردىڭ عىلىمي قوعامداستىعى مەن حالىقارالىق ۇيىمداردىڭ اراسىنداعى ءوزارا قىزمەت پەن ديالوگتى ۇيىمداستىرۋعا باعىتتالدى. عىلىمي پىكىرتالاستىڭ سەسسيالارى مەن نەگىزگى باعىتتارى مىنا ءۇش ماسەلە بويىنشا ءوربىدى. جۋرناليستىك ءبىلىم بەرۋدىڭ حالىقارالىق ترەندتتەرى, جانە ونىڭ ىشىندە جۋرناليستىك ءبىلىم بەرۋدىڭ جاھاندىق باعىتتارى; قازاقستاندىق مەديا-مەكتەپ, يننوۆاتسيالىق مودەلدەر. ەكىنشى باعىت حالىقارالىق جۋرناليستيكانىڭ – دامۋ باعىتتارىنا ارنالىپ, ماماندىقتىڭ جاڭا ستاندارتتارى, ورتالىق ازياداعى جۋرناليست مارتەبەسى, رەتتەۋ قۇرالدارى جانە باق-تاعى ءوزىن ءوزى رەتتەۋ, جۋرناليستىك شەبەرلىك جانە بۇقارالىق مادەنيەت نىسانىنداعى كاسىبيلىك, تۇراقتى دامۋ جانە جۋرناليستيكا: ءوزارا قارىم-قاتىناس اسپەكتىلەرى, ازاماتتىق جۋرناليستيكا كونتەنتى سىندى ماسەلەلەرگە ارنالدى. ءۇشىنشى باعىت بويىنشا حالىقارالىق جۋرناليستيكانى دامىتۋ سالاسىنداعى MTIJ كونفەرەنتسياسىنىڭ مۇمكىندىكتەرى; جۋرناليستيكا پەداگوگتارىنىڭ كورپاراتسياسىن قۇرۋ مەن ۇيىمداستىرۋ ماسەلەلەرى بويىنشا ۇسىنىستار تەرەڭ تالقىلاندى. شارا اياسىندا حالىقارالىق جۋرناليستيكا سالاسىنىڭ جەتەكشى ماماندارىمەن شەبەرلىك سىنىپتارى وتكىزىلىپ, قاتىسۋشىلارعا سەرتيفيكاتتار تابىستالدى.
جيىنعا ءال-فارابي اتىنداعى قازۇۋ جۋرناليستيكا فاكۋلتەتىنىڭ دەكانى ساعاتبەك مەدەۋبەك, يۋنەسكو, حالىقارالىق جۋرناليستيكا جانە قوعامدىق مەديا كافەدراسىنىڭ مەڭگەرۋشىسى نازگۇل شىڭعىسوۆا, الماتىداعى يۋنەسكو كلاستەرلىك بيۋروسىنىڭ كوممۋنيكاتسيا جانە اقپارات ءبولىمىنىڭ باسشىسى سەرگەي كارپوۆ, «قازاق گازەتتەرى» جشس باس ديرەكتورى جۇمابەك كەنجالين, پولشاداعى ادام ميتسكەەۆيچ ۋنيۆەرسيتەتىنىڭ كادر جانە قارجى جونىندەگى پرورەكتورى تاداۋەش ۆاللاس, MDP باعدارلاماسىنىڭ ديرەكتورى , كولۋمبيا ۋنيۆەرسيتەتىنىڭ اديۋنك-پروفەسسورى رافيس ابازوۆ سىندى بىلىكتى ماماندارمەن قاتار ەلىمىزدەگى باق باسشىلارى, قازاقستانداعى بۇۇ قوعامدىق اقپارات دەپارتامەنتىنىڭ وكىلدەرى, شەتەلدىك مەملەكەتتەر ەلشىلىكتەرى مەن كونسۋلدىقتارىنىڭ وكىلدەرى, اقش, ۇلىبريتانيا, پولشا, تۇركيا, رەسەي بۇقارالىق كوممۋنيكاتسيا عالىمدارى مەن زەرتەۋشىلەرى, وقىتۋشىلار, ماگيسترانتتار مەن دوكتارانتتار قاتىستى. جوعارىدا ايتىلعان ماڭىزدى ماسەلەلەرگە بايلانىستى باياندامالار وقىلىپ, ەركىن پىكىرتالاس جۇرگىزىلدى.
– قازىرگى جاھاندانۋ كەزەڭىندە ەڭ ماڭىزدى تاقىرىپتىڭ ءبىرى – تۇراقتى دامۋ. ال جۋرناليستيكاداعى وزەكتى ماسەلە – ساندىق, مۋلتيمەديالىق ينتەراكتيۆتى كوممۋنيكاتسيالىق تەحنولوگيالار داۋىرىندە حالىقارالىق دەڭگەيدە جۋرناليستەر دايىنداۋ ساپاسى, قازاقستانداعى قازىرگى جۋرناليستىك ءبىلىم بەرۋدىڭ دەڭگەيى. بۇۇ اكادەميالىق ىقپال حاب باعدارلاماسىنىڭ اياسىندا وتكىزىلۋى ماڭىزىن ودان دا ارتتىرا تۇسەدى. ءبىز قازاقستاندا وتىرىپ, الەمنىڭ تۇكپىر-تۇكپىرىندە وبەكتيۆتى, تولىققاندا جان-جاقتى ماقالا جاريالايتىن, حالىقارالىق ەڭبەك نارىعىندا باسەكەگە قابىلەتتى جۋرناليستكە ءتان قۇزىرەتتىلىكتەر قالىپتاستىرۋىمىز قاجەت. بۇنداي كونۆەرگەنتسيا قازاقستاننىڭ اقپارات نارىعىن ساقتاۋعا مۇمكىندىك بەرەدى – دەيدى, يۋنەسكو, حالىقارالىق جۋرناليستيكا جانە قوعامدىق مەديا كافەدراسىنىڭ مەڭگەرۋشىسى نازگۇل شىڭعىسوۆا. سونداي-اق, ءىس-شارادا وتاندىق جۋرناليستيكانى جان-جاقتى دامىتۋدىڭ جاڭا باعىتتارىنا بايلانىستى كوپتەگەن ۇسىنىستار ايتىلدى.
ارمان وكتيابر,
«ەگەمەن قازاقستان»
الماتى
