كەزدەسۋ بارىسىندا مەملەكەت باسشىسىنا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋدى ىسكە اسىرۋ باعىتىندا ۇكىمەتتىڭ اتقارىپ جاتقان جۇمىسى تۋرالى ەسەپ بەرىلدى, سونداي-اق 2017 جىلعى ءبىرىنشى توقساننىڭ قورىتىندىسى بويىنشا مەملەكەتتىك جانە سالالىق باعدارلامالاردىڭ ورىندالۋى جونىندە مالىمەت ۇسىنىلدى.
نۇرسۇلتان نازارباەۆ بۇعان دەيىن بەكىتىلگەن دامۋ باعدارلامالارىن ىسكە اسىرۋدىڭ ماڭىزدىلىعىن, ولاردىڭ ورىندالۋىنا ساپالى باقىلاۋ جاساۋ قاجەت ەكەنىن اتاپ ءوتتى.
– ءبىرىنشى توقساننىڭ قورىتىندىسى بويىنشا ەلىمىزدىڭ ەكونوميكاسى 3%-عا ءوستى. بۇل – باعدارلامالارىمىزدىڭ جۇزەگە اسىرىلۋ ناتيجەسى. وسى باعىتتاعى جۇمىستاردى جالعاستىرۋ قاجەت جانە جىل سوڭىنا دەيىن كورسەتكىشتەردى ارتتىرىپ, ولاردى ءتيىمدى دەڭگەيدە ساقتاپ قالۋ كەرەك. بۇعان قاجەتتى العىشارتتار بار, – دەدى قازاقستان پرەزيدەنتى.
سونداي-اق, ەلباسى الداعى ءىس-شارالار جايىنا توقتالىپ, ولاردى ويداعىداي وتكىزۋ ءۇشىن جان-جاقتى دايىندىق پەن باقىلاۋ جۇرگىزۋ قاجەت ەكەنىن ايتتى.
– تاياۋدا قازاقستانعا تۇرىكمەنستان باسشىلىعىنىڭ ساپارمەن كەلۋى جوسپارلانۋدا. الدىمىزدا استانادا وتەتىن شانحاي ىنتىماقتاستىق ۇيىمىنىڭ ءسامميتى, «ەكسپو-2017» حالىقارالىق كورمەسى بار. سونىمەن قاتار, ەلىمىزدىڭ ودان ءارى دامۋىنىڭ باستى ماقساتتارى تۋرالى دا ۇمىتپاۋ كەرەك, – دەدى مەملەكەت باسشىسى.
بۇدان بولەك, نۇرسۇلتان نازارباەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالادا قويىلعان مىندەتتەردى ىسكە اسىرۋدىڭ ماڭىزدىلىعىن اتاپ ءوتتى.
قازاقستان پرەزيدەنتى الداعى جۇمىستار اياسىندا ۇكىمەتكە جۇكتەلگەن جاۋاپكەرشىلىكتىڭ جوعارى ەكەنىنە توقتالىپ, بۇل ۇدەرىسكە جۇرتشىلىقتى, سونىڭ ىشىندە زيالى قاۋىم, جاستار, ۇكىمەتتىك ەمەس سەكتور وكىلدەرىن تارتۋ قاجەت ەكەنىن ايتتى.
– «بولاشاققا باعدار: رۋحاني جاڭعىرۋ» اتتى ماقالا كوپ جىلدان بەرى ويدا جۇرگەن بولاتىن. قازىرگى ۋاقىتتا ماقالادا قويىلعان مىندەتتەردى ناقتى ىسكە اسىرۋ جونىندەگى جوسپار ازىرلەنۋدە. قاراجات قاجەت ەتەتىن جوبالار دا بار. الايدا, ولاردىڭ كوبى رەسپۋبليكالىق بيۋدجەتتەن قوسىمشا قارجى ءبولۋدى قاجەت ەتپەيدى, – دەدى ەلباسى.
مەملەكەت باسشىسى كوپتەگەن قازاقستاندىقتاردىڭ ايتىلعان باستامالاردى قىزۋ قولداپ وتىرعانىنا نازار اۋداردى.
– كۇن سايىن ماعان ەلىمىزدىڭ ءار وڭىرىندەگى جۇرتشىلىق وكىلدەرىنەن ماقالاداعى ۇسىنىلعان شەشىمدەرگە قولداۋ بىلدىرگەن كوپتەگەن جەدەلحاتتار كەلىپ جاتىر. ولاردىڭ قاتارىندا ءتۇرلى شىعارماشىلىق ۇجىمدار, زيالى قاۋىم وكىلدەرى جانە جاستار دا بار, – دەدى نۇرسۇلتان نازارباەۆ.
قازاقستان پرەزيدەنتى رۋحاني جاڭعىرۋدىڭ بەلگىلەنگەن باعىتتارى بويىنشا جۇرگىزىلەتىن جۇمىستار جوعارى ساپالى دەڭگەيدە ورىندالۋعا ءتيىس ەكەنىن اتاپ ءوتتى.
ب.ساعىنتاەۆ ەلباسىعا ءبىرىنشى توقساننىڭ قورىتىندىسى بويىنشا قىسقا مەرزىمدى ەكونوميكالىق كورسەتكىشتەردىڭ ءوسىپ كەلە جاتقانى تۋرالى باياندادى. پرەمەر-ءمينيستردىڭ مالىمەتىنە سايكەس, ونەركاسىپتىڭ تاۋ-كەن سالاسىنداعى جانە قايتا وڭدەۋ سەكتورلارىنداعى كورسەتكىشتەر جوعارى دەڭگەيگە جەتتى.
سونداي-اق, ب.ساعىنتاەۆ مەملەكەت باسشىسىنا ۇكىمەت اكىمدىكتەرمەن, ءىرى حولدينگتەرمەن جانە كومپانيالارمەن بىرلەسىپ قولعا العان تەحنولوگيالىق جاڭعىرۋ جونىندەگى جول قارتاسىنىڭ ازىرلەنۋ بارىسى تۋرالى مالىمدەدى.
كەزدەسۋ سوڭىندا نۇرسۇلتان نازارباەۆ بىرقاتار ناقتى تاپسىرما بەردى.
