موتوتسيكلدى ءومىرىنىڭ ءمانى دەپ بىلەتىن 100 شاقتى بايكەر كەزەكتى ماۋسىمنىڭ اشىلۋىن «ەكسپو-2017» حالىقارالىق كورمەسىنە ارنادى. شىمكەنت قالاسىنىڭ كوشەلەرىن ارالاپ, «ەكسپو-2017» كورمەسىن ناسيحاتتاعان اۆتوشاباندوزدار وزدەرىنە ءتان ەرەجەلەر مەن قاعيدالاردى جۇرت نازارىنا ۇسىندى. سونداي-اق شىمكەنت قالاسىنداعى №3 جەتىم بالالار ۇيىنە ارنايى بارىپ, قايىرىمدىلىق شاراسىنا اتسالىستى.
وڭتۇستىك قازاستان بايكەرلەر فەدەراتسياسىنىڭ پرەزيدەنتى رۇستەم بازاربەكوۆتىڭ ايتۋىنشا, 29 مامىر كۇنى وڭتۇستىكقازاقستاندىق 10 بايكەر ەكسپو-2017 كورمەسىنىڭ قۇرمەتىنە رەسپۋبليكالىق موتوشەرۋ ۇيىمداستىرماق. شىمكەنت قالاسىنان باستاۋ الاتىن موتوشەرۋدىڭ ماقساتى – ەكسپو كورمەسىن رەسپۋبليكا جۇرتىنا كەڭىنەن ناسيحاتتاۋ.
«موتوشەرۋ 29 – مامىردا شىمكەنتتەن باستاۋ الادى. ءبىزدىڭ بۇل يدەيامىزعا وڭتۇستىك قازاقستان وبلىسىنىڭ اكىمدىگى قولداۋ ءبىلدىرىپ وتىر. ەڭ الدىمەن ءبىز رۋحاني استانامىز-تۇركىستان قالاسىنا سوسىن قىزىلوردا, اقتوبە, قوستاناي, پەتروپاۆل, كوكشەتاۋ قالالارى ارقىلى ەلوردا دا ءوتىپ جاتقان «ەكسپو-2017» حالىقارالىق كورمەسىنىڭ اشىلۋ سالتاناتىنا كىرىپ بارعالى وتىرمىز», - دەيدى وڭتۇستىك قازاستان وبلىستىق موتوتسيكليستەر فەدەراتسياسىنىڭ پرەزيدەنتى رۇستەم بازاربەكوۆ.
ەستەرىڭىزگە سالا كەتەيىك, بۇگىندە وڭتۇستىك قازاقستان وبلىسىندا موتوسپورتقا قىزىعۋشىلىق تانىتىپ, بايكەر اتانعانداردىڭ سانى 300-گە جۋىقتايدى. ولار جىل سايىن وبلىسىمىزداعى قوعامدىق ءىس-شارالارعا بەلسەنە قاتىسىپ, جاستاردى سپورتقا باۋلۋعا, سالاۋاتتى ءومىر سالتىن ۇستانۋعا اتسالىسىپ كەلەدى.
