«مەملەكەت باسشىسىنىڭ بۇل ماقالاسى – ۇلتتىق سانانى جاڭعىرتۋ جوباسى جانە قازاقستان قوعامىن دامىتۋدىڭ يدەولوگيالىق نەگىزى. سوندىقتان, ونى جەتە ءتۇسىنىپ, نەگىزگى مىندەتتەردى ىسكە اسىرۋعا ۇلەس قوسۋ ءاربىر ەل ازاماتىنىڭ قاسيەتتى پارىزى بولۋى ءتيىس», دەدى جيىندا ەڭ الدىمەن ءسوز العان وبلىس اكىمىنىڭ ورىنباسارى اسەم ءنۇسۇپوۆا.
بايانداماشى ماقالادا ءبىلىم سالاسىنا ايرىقشا كوڭىل بولىنگەنىن, بۇگىندە 91 شىعىسقازاقستاندىق جاس شەت ەلدىڭ 11 بەدەلدى وقۋ ورىندارىندا «بولاشاق» باعدارلاماسىمەن ءبىلىم الىپ جاتقانىن, وڭىردەگى 8 جوعا-
رى وقۋ ورنى مەن 82 كوللەدجدە 62 مىڭ جاستىڭ وقىپ جۇرگەنىن اتاپ ءوتتى. وڭىردە مادەنيەت سالاسىنا دا ەرەكشە ءمان بەرىلىپ, بىلتىر ايماقتاعى بەس بىردەي تاريحي ورىنعا الەمنىڭ ۇزدىك ارحەولوگ عالىمدارىنىڭ قاتىسۋىمەن قازبا جۇمىستارى جۇرگىزىلگەنىن, كاتونقاراعاي اۋدانىنداعى بەرەل جازىعىندا اسپان استى مۇراجايى اشىلعانىن, بۇل باعىتتاعى جۇمىستاردىڭ بيىل دا جالعاسىن تاباتىنىن جەتكىزدى.
اسەم ءنۇسۇپوۆا ەلباسى ماقالاسىندا اتاپ ءوتىلگەن «تۋعان جەر» باعدارلاماسىن جۇزەگە اسىرۋعا شىعىس جۇرتشىلىعىنىڭ بەلسەنە قاتىساتىنىنا سەنىم ءبىلدىرىپ, ءوڭىردىڭ بۇل تاراپتا ءوز تاجىريبەسى, ءوز ۇلگىسى بار ەكەندىگىنە توقتالدى.
«شىعىس قازاقستاندا بىرنەشە جىلدان بەرى «تۋعان جەرگە تاعزىم» اكتسياسى جۇزەگە اسىرىلىپ كەلەدى. اكتسيا اياسىندا وسى وڭىردەن قانات قاققان كاسىپكەر, مەتسەنات ازاماتتاردىڭ كومەگىمەن قۇنى 25 ميلليارد تەڭگەنى قۇرايتىن 4 مىڭعا جۋىق جوبا ىسكە اسىرىلدى. مەكتەپ, بالاباقشالار, سپورت كەشەندەرى سالىندى», دەدى وبلىس اكىمىنىڭ ورىنباسارى.
«نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى انۋاربەك مۇحتارحانوۆ ەلباسىنىڭ ماقالاسى كوزى قاراقتى, كوكىرەگى وياۋ جۇرتتى بەيجاي قالدىرمايتىنىن, ۇلتىمىزدىڭ قۇندىلىقتارىن كوزىمىزدىڭ قاراشىعىنداي ساقتاۋعا شاقىراتىنىن تىلگە تيەك ەتتى.
«ماقالادا پراگماتيزم ماسەلەسىنە ەرەكشە كوڭىل بولىنگەن. قانىمىزعا سىڭگەن كوپتەگەن داعدىلار مەن تاپتاۋرىن بولعان قاساڭ قاعيدالاردى وزگەرتپەيىنشە, ءبىزدىڭ تولىققاندى جاڭعىرۋىمىز مۇمكىن ەمەس دەپ انىق ايتتى. پرەزيدەنت ەلىمىزدىڭ ەۆوليۋتسيالىق دامۋى, ۇلتتىق بىرىڭعاي تۇتاستىق, ءبىلىم بەرۋ سالالارىن قامتيتىن رۋحاني جاڭارۋ جولىن ۇسىندى», دەدى ول.
بۇدان كەيىن ءسوز العان قازاقستان حالقى اسسامبلەياسىنىڭ مۇشەسى لەو شيك: «جۇرتشىلىق جىلى قابىلداپ جاتىر. الايدا, الدىمىزدا ۇلكەن مىندەت تۇرعانىن ۇمىتپايىق. ەلباسى ماقالاسىندا جۇكتەلگەن ءمىندەتتەردى ءوڭىردىڭ ءاربىر تۇرعىنىنا جەتكىزۋگە ءتيىسپىز», دەدى.
وبلىستىق ءماسليحاتتىڭ دەپۋتاتى ريزا مولداشەۆا مەملەكەت باسشىسى ءسوز ەتكەن «تۋعان جەر» باعدارلاماسىنىڭ ءمانى تەرەڭ ەكەندىگىن, جاستاردى پاتريوتتىق رۋحتا ءتاربيەلەۋگە ەرەكشە ۇلەس قوساتىنىن اتاپ ءوتىپ, جۋرناليستەر قاۋىمىنا دا ارتىلار جاۋاپكەرشىلىك جۇگى سالماقتى ەكەندىگىن جەتكىزدى.
جيىن سوڭىندا ءسوز سويلەگەن سەمەيدەگى ەلەكترتەحنيكالىق كوللەدجىنىڭ ديرەكتورى ازات سارپەكوۆ شىعىسقازاقستاندىق جاستاردىڭ پرەزيدەنت ماقالاسىن زور ىقىلاسپەن قابىلداعانىن, اسىرەسە, «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى زامانداستارىنىڭ ەرەكشە قىزىعۋشىلىعىن تۋعىزىپ وتىرعانىن ايتتى.
ازامات قاسىم,
«ەگەمەن قازاقستان»
وسكەمەن
