م.ح.دۋلاتي اتىنداعى تاراز مەملەكەتتىك ۋنيۆەرستيەتىندە مەملەكەت باسشىسى نۇرسۇلتان نازارباەۆتىڭ باعدارلامالىق ماقالاسىن تالقىلاۋعا ارنالعان «رۋحاني جاڭعىرۋ – مەملەكەتتىڭ ءتىرەگى, حالىقتىڭ جىگەرى» اتتى وبلىستىق فورۋم ءوتتى. فورۋمعا وبلىس اكىمى كارىم كوكىرەكباەۆ قاتىسىپ, بايانداما جاسادى.
– ەلىمىز تاۋەلسىزدىك العان جىلداردىڭ العاشقى ساتتەرىنەن باستاپ ەلباسى سانالى قوعام ورناتۋدى, ونىڭ باستى قاعيداتتارىنا ۇلتتىق قۇندىلىقتارىمىز نەگىز بولاتىنىن شارشاماي, تالماي ۇزدىكسىز ايتىپ كەلەدى.
رۋحاني ورلەۋ ءبىزدىڭ قوعامعا اسا قاجەت جانە ءبىزدىڭ دامۋىمىزدىڭ ەڭ باستى تۇعىرلارىنىڭ ءبىرى. ويتكەنى, بارلىق دۇنيە سانا-سەزىمنەن باستاۋ الادى. بۇل – مازمۇنى تەرەڭ تاريحي ماقالا. ۇلت رۋحانياتىن وركەنيەت بيى-
گىنە شىعاراتىن ۇلكەن باعدارلامالىق قۇجات, – دەدى وبلىس باسشىسى. سونداي-اق, كارىم كوكىرەكباەۆ «مادەني مۇرا», «حالىق – تاريح تولقىنىندا» باعدارلامالارىنىڭ ءوڭىر ءۇشىن دە وركەندى ىستەرگە باستاماشى بولعانىن ايتا كەلىپ, ەلباسى ماقالاسىندا ايتىلعان اعىلشىن ءتىلىن ۇيرەنۋدىڭ ماڭىزدىلىعى, لاتىن الىپبيىنە كوشۋ قاجەتتىگى ءتوڭىرەگىندە دە ءوز ويىن ورتاعا سالدى.
فورۋم بارىسىندا ءسوز العان م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى ماحمەتعالي سارىبەكوۆ رۋحاني جاڭعىرۋدىڭ عىلىمي نەگىزدەرىنە توقتالدى. سونداي-اق, ءبىلىمنىڭ سالتانات قۇرۋى جونىندە دە پىكىر ءبىلدىردى.
ەلباسى ءوزىنىڭ باعدارلامالىق ماقالاسىندا ءححى عاسىرداعى ۇلتتىق سانا تۋرالى كەڭىنەن ءسوز ەتكەنى بەلگىلى. تاراز مەملەكەتتىك پەداگوگيكالىق ينستيتۋتىنىڭ رەكتورى داريا قوجامجاروۆا وتكەن عاسىرداعى قازاق حالقىنىڭ تاعدىرىنا بايلانىستى جايلاردى بايانداي كەلە, ءححى عاسىرداعى ۇلتتىق جانە تاريحي سانا توڭىرەگىندە قالىپتاسقان ويىمەن ءبولىستى. ال جازۋشى-دراماتۋرگ ەلەن ءالىمجان, قازاقستاننىڭ حالىق ءارتىسى ماكەن راحىمجانوۆا ەلىمىزدىڭ مادەني-رۋحاني دامۋى ءتوڭىرەگىندە اڭگىمەلەدى.
ەلباسى اعىلشىن ءتىلىن ءۇيرەنۋدىڭ ماڭىزدىلىعىن ءاردايىم ايتىپ كەلەدى. سوندىقتان دا, جاستاردىڭ ءتىل ۇيرەنۋدە تاباندى بولۋى جارقىن بولاشاقتىڭ كەپىلى بولا الادى. بۇل تۇرعىدا اۋليەاتا وڭىرىندە ءتىل ءبىلەتىن, باسەكەگە قابىلەتتى جاستار بارشىلىق. سونىڭ ايعاعىنداي, م.ح.دۋلاتي اتىنداعى تاراز مەملەكەتتىك ۋني-ۆەرسيتەتىنىڭ ستۋدەنتى ساعي التىنكوپ ەلباسى ماقالاسىنا بايلانىستى ءوز ويىن قازاق, ورىس جانە اعىلشىن تىلدەرىندە جەتكىزدى.
حاميت ەسامان,
«ەگەمەن قازاقستان»
جامبىل وبلىسى
