ەلباسى ءوز ماقالاسىندا «حح عاسىرداعى باتىستىق جاڭعىرۋ ۇلگىسىنىڭ بۇگىنگى زاماننىڭ بولمىسىنا ساي كەلمەۋىنىڭ سىرى نەدە؟ مەنىڭشە, باستى كەمشىلىگى – ولاردىڭ وزدەرىنە عانا ءتان قالىبى مەن تاجىريبەسىن باسقا حالىقتار مەن وركەنيەتتەردىڭ ەرەكشەلىكتەرىن ەسكەرمەي, بارىنە جاپپاي ەرىكسىز تاڭۋىندا», – دەيدى. كونەنى قيا الماي, جاڭانى جيا الماي جۇرگەن تالايلار ءۇشىن اسا باتىل بايلام. كوپتەن كۇتكەنىمىز دە وسى ءسوز! ويتكەنى, وي وزات تا ازات بولماي تولىق ەركىندىك جوق.
وزگەنىڭ تاسى ورگە دومالاعانداي كورىپ كەلگەنىمىز راس. بالكىم سوعىس كورمەگەن, وتقا كۇيمەگەن كەيبىر وركەنيەتتى ەلدەردە دامۋ قارقىنى جوعارى شىعار. سول سەبەپتى وزگە دامۋشى مەملەكەتتەرگە ۇستەم كوزقاراستا دا بولار. اق سويلەۋ پارىز, دەسە دە ولاردا رۋحانياتتىڭ ءرولى تىم تومەن. مورال مەن ادامگەرشىلىك احۋال جىل وتكەن سايىن قۇلدىراۋ ۇستىندە. اقشا ماتەريالدىق يگىلىك. ال, ماتەريالدىق يگىلىك ەشقاشان كۋلتكە اينالماۋى كەرەك. رۋحاني يگىلىكتى كۋلت دارەجەسىنە كوتەرگەن ەلدىڭ عانا مەرەيى ۇستەم, باعى زور.
نۇرسۇلتان نازارباەۆ وسىنىڭ ءبارىن اقىل تارازىسىنا سالىپ, ەلىمىزدىڭ ءۇشىنشى ياعني رۋحاني جاڭعىرۋى مەن ءبىلىمدى ۇلت, بوياۋ-بولمىسىن جوعالتپاعان جۇرت اتانۋىنىڭ سارا جولىن كورسەتىپ بەردى. جاھاندانۋدىڭ كۇماندى تۇستارى باسىم. وعان ەرىپ ءوڭىر تيەگىمىزدى اعىتا قويساق سالت, ءداستۇر, ۇلتتىق ناقىش سىندى قىمبات قازىنامىزدىڭ بوياۋىن سولعىن تارتتىرىپ الامىز. قاي عاسىردىڭ بەلەسىنە شىقساق تا يمانى مەن جيعانى بۇيىرعان, يبا-ادەبى ۇزىلمەگەن, اۋزىندا دۋا, ساقالىنا كيە دارىعان قازاق بولىپ قالعانعا نە جەتسىن! ويتكەنى, ءبىز وزگەگە تابىنىپ تا, تاڭىرقاپ تا بولعان تاۋەلسىز ەلمىز! ەلباسى بىزگە وسىنى مەڭزەپ وتىر. نۇرلى بولاشاققا الىپ شىقپاسام ماعان سەرت, ەرە الماساڭ ساعان سەرت دەپ وتىر!
سونىمەن بىرگە, ماقالادا ايتىلعانداي, «تۋعان جەر» باعدارلاماسى جالپىۇلتتىق پاتريوتيزمنىڭ ناعىز وزەگىنە اينالادى. تۋعان جەرگە دەگەن ءسۇيىسپەنشىلىك تۋعان ەلگە – قازاقستانعا دەگەن پاتريوتتىق سەزىمگە ۇلاسادى», – دەگەن جولدار ەلدى ەرەكشە جىگەرلەندىردى. ءتۇرلى كۇمان-قاۋىپتى سەيىلتتى.
ءيا, قازاق قاشاندا تۋعان جەرگە كىندىگىنەن بايلانىپ قالعان. الەمنىڭ قاي تۇكپىرىنە وكشەمىز تيسە دە, اتاكۇلدىكتى اڭساپ ورالاتىنىمىز سوندىقتان. باياعى بابالارىمىز الىس ساپار شەككەندە, بەلىنە تۋعان جەردىڭ ءبىر ۋىس توپىراعىن تۇيە كەتەتىنى سول قاسيەتىنەن شىعار؟ ويتكەنى, وعان نەبىر ارىستارىمىزدىڭ تەرى مەن قانى, ارمانى مەن مۇڭى, قۋانىشى سىڭگەن. تۋعان جەر تۋىپ, ءوسىپ-وركەندەسەڭ دە كەرەك, ولسەڭ دە كەرەك. اسىرەسە, قازاق ءۇشىن!
ادامنىڭ كويلەگى توزار, كوڭىلى توزباۋى ابزال. ول ءۇشىن پرەزيدەنت ايتقانداي, تاريحي جادىنى وياتىپ, تۋعان ەلدەگى كيەلى عيماراتتار مەن قاسيەتتى قورىم, قونىستارعا باسا نازار اۋدارۋ ءلازىم. بۇل كەشەگى قىرسىق قاشىپ, قىدىر اينالدىرعان ەلدىڭ ەنشىسىندەگى ءىس. راسىندا دا, ول ءۇشىن عىلىم اكادەمياسى مەن جازۋشىلار وداعىنىڭ ءرولىن بارىنشا ارتتىرعان ءجون. سوڭعى جىلدارى ەتەك الىپ كەتكەن قولدان باتىر, بي جاساۋ, جوق جەردەن اۋليە, امبيە تابۋ, كۇماندى جەرگە تابىنۋ سىندى كەلەڭسىز كورىنىستەرگە توقتام بولار ەدى. اسىل مەن جاسىقتى ايىرا بىلەتىن حالقىمىزدىڭ ساحي دا سارابدال كوڭىلىنەن اينالايىن!
بۇل – رۋح جىرى!
بۇل – رۋحاني جاڭعىرۋ مەن جاڭاشا تۇلەۋ تۋرالى تولعاۋ.
راحىمجان وتارباەۆ,
جازۋشى-دراماتۋرگ, اتىراۋ قالاسىنىڭ قۇرمەتتى ازاماتى
