مەملەكەت باسشىسى ۇسىنىپ وتىرعان مادەني رەفورما وتە دەر كەزىندە ۇسىنىلۋىمەن ماڭىزدى. مۇنسىز ەكونوميكالىق جانە باسقا دا سالالىق وزگەرىستەر ءبارىبىر ءتيىمسىز بولار ەدى. 2017 قازاقستان دامۋى ءۇشىن وزگەرىسكە تولى جىل بولماق. ەكونوميكالىق جاڭعىرۋ مەن كونستيتۋتسيالىق رەفورمامەن بىرگە پرەزيدەنت وتە وزەكتى ماسەلەنى – ادام كاپيتالى ماسەلەسىن العا تارتىپ وتىر. باسەكەلەستىكتە جەتىستىككە جانە كوشباسشىلىققا جەتكىسى كەلەتىن حالىق ۇلتتىڭ باسەكەلەستىككە قابىلەتتىلىگىن ارتتىرا وتىرىپ, بۇگىنگى كۇننىڭ جانە بولاشاقتىڭ ازاماتىن قالىپتاستىرۋدا ونى كوپ ءتىل بىلەتىن, مادەنيەتتى, ءوزىن عانا ەمەس, جاقىن ءارى الىس كورشىسىنە قۇرمەتپەن قارايتىن جان-جاقتى ءبىلىمدى, ساۋاتتى تۇلعاعا اينالدىرۋدى كوزدەيدى.
مەن ەل پرەزيدەنتىنىڭ باستاماسىمەن قۇرىلعان مادەنيەتتەردى جاقىنداستىرۋ ورتالىعىنا جەتەكشىلىك جاسايمىن. بۇل ورتالىقتىڭ قىزمەتى مەن مىندەتى ءبىزدىڭ ازاماتتارىمىزدى كەلىسىم رۋحىنا, بۇكىل الەم جانە قازاقستان ازاماتتارى ۇستاناتىن ءوزىنىڭ جانە وزگەنىڭ دىنىنە, مادەنيەتىنە قۇرمەتپەن قاراۋ ىسىنە ۇيلەستىرىلگەن. بۇل قاسيەتتەر ءبىزدىڭ اتا-بابامىزعا دا, حالقىمىزعا دا ەشكىم سىرتتان اكەپ تاڭباسا دا, تابيعاتىنا ءتان بولىپ كەلەدى. بۇكىل ءمادەنيەتتەر مەن ءدىننىڭ سۇحبات الماسۋ سوقپاعى بولىپ ءبىزدىڭ دالامىزدى كولدەنەڭىنەن كەسىپ وتكەن ۇلى جىبەك جولىن ەسكە الايىقشى. جەتىسۋدىڭ ەڭ ءىرى ساۋدا جانە قولونەر ورتالىعى بولعان قويلىق قالاسىندا مۇسىلمان دا, حريستيان دا, بۋددا وكىلدەرى دە قويان-قولتىق ءومىر سۇرگەن. بۇل جونىندە ءحىىى عاسىردىڭ ورتاسىندا فرانتسۋز كورولى ءىح ليۋدوۆيكتىڭ موڭكە حانعا جولىعۋعا جىبەرگەن وكىلى گيلوم دە رۋبرۋك جازىپ قالدىرعان. ول قويلىق قالاسىندا بولىپ, كورگەنىن سۋرەتتەپ جازعان. رۋبرۋك قالادان مەشىتتى دە, بۋددا حرامىن دا, حريستيان شىركەۋىن دە, مانيحەي عيباداتحاناسىن دا كورگەنىن ايتادى. قويلىق قالاسىن قازعان ارحەولوگتار وسى اتالعان نىسانداردىڭ قالدىقتارىن تاپقاندا, ەرىكسىز باس شايقادى.
ءاربىر قازاقستاندىق ءوز ەلىنىڭ پاتريوتى بولۋعا مىندەتتى دەپ ەسەپتەيمىن. مەملەكەت باسشىسى «تۋعان جەر» باعدارلاماسى مەن «قازاقستاننىڭ كيەلى جەرلەرىنىڭ گەوگرافياسى» جوباسىن جاساۋدى بەكەر تاپسىرىپ وتىرعان جوق. پاتريوتيزم ءوز تاريحى مەن تامىرىن بىلۋمەن تىكەلەي بايلانىستى. ءبىزدىڭ حالقىمىزدىڭ تاريحى وتە باي. وتىرار مەن تۇركىستان, تاراز بەن ساۋران قالالارى تاريحتىڭ عاجايىپ اۋەنىنە تۇنىپ تۇر. قازاق حاندىعىنىڭ بايتاق جەرىن تۇتاسىمەن ساقتاپ قالۋ ءۇشىن كۇرەسىپ, قازاقستاننىڭ ازاتتىعى جولىندا ارپالىسىپ, بار ءومىرى ات ۇستىندە وتكەن باتىرلارىمىزدىڭ ەسىمى بىزگە ءمالىم. بەلگىلى تاريحي ورىنداردى تانىپ, ولاردى قاستەرلەي ءبىلۋ وسكەلەڭ ۇرپاقتى پاتريوتتىق رۋحتا تاربيەلەۋدە ماڭىزى زور. ءوزىنىڭ تۋعان جەرىنە, ءوز حالقى مەن باباسىنا سۇيىسپەنشىلىگى, قۇرمەتى جوق ادامنىڭ جەر بەتىندەگى ىزگىلىك ءۇشىن ءبىر ۇلى ءىس جاسايدى دەگەنگە ءوز باسىم سەنە المايمىن.
قازاقستان بار بولعانى 25 جىلدا الەمدىك ساياسي ارەنادا مويىندالىپ, دامىعان تاۋەلسىز مەملەكەتكە اينالۋىنا كوپتەگەن كورنەكتى زامانداستارىمىز قول ۇشىن سوزدى. ءبىز ولاردى ءبىلۋىمىز كەرەك جانە ول ادامداردىڭ ورەسىمەن تەڭەسۋىمىز كەرەك.
جالپى العاندا, پرەزيدەنتتىڭ بۇل جاڭا ماقالاسى – قازاقستان جاڭعىرۋىنا زامانمەن ۇندەس ادامنىڭ كوزقاراسى تۇرعىسىنان جاڭاشا قاراۋ. ەل مەن قوعامدى قۇرىپ جاتقان ءبىزدىڭ ارقايسىمىز ءدال وسى مەملەكەتتە ءومىر ءسۇرۋ مەن ەڭبەكتەنۋگە قولايلى جاعداي تۋعىزۋعا ءمۇددەلى بولۋىمىز كەرەك.
كارل بايپاقوۆ,
اكادەميك
الماتى
