اسىرە اسەرسىز ءسوز – وسى. قىتايدىڭ چانشا قالاسىندا قاڭتاردىڭ ورتا شەنىندە باستالعان «Singer-2017» بايقاۋى سەنبىنىڭ كەشىندە مارەسىنە جەتتى. كۇللى دۇنيە كوز تىككەن بەدەلى بيىك دودادا باق سىناعان قانداسىمىز ديماش قۇدايبەرگەن ەكىنشى تۇعىردان كورىندى. جانكۇيەرلەردىڭ دەنى اتتەگەن-اي دەسە دە, گونكونگتىك ءانشىنىڭ (Sandy Lam) جەرلەسىمىزدەن ءبىر تۇتام ءىلگەرى وزعاندىعى زاڭدى دا. ويتكەنى, جارىستىڭ دا, جۇلدەنىڭ دە يەسى – جەر بەتىندەگى ەڭ كوپ حالىق.
ءسوزىمىز تۇشىمدى بولۋ ءۇشىن, بايقاۋ بارىسىنان از-كەم بايانداساق. ديماشتىڭ داڭقىن اسقاقتاتقان دودانىڭ ون ءتورت كەزەڭىندە دە قازاق بالاسى ۇنەمى ۇزدىكتەردىڭ قاتارىنان كورىندى. شىن دارىن مەن ساف تالانتقا باس يگەن ميلليارد-
تار قانداسىمىزدى «ازيانىڭ ەڭ تانىمال ءانشىسى» اتاعىمەن ماراپاتتادى. بۇعان قوسا, ءانشى «17th China Music Awards» شاراسىندا «حالىقارالىق دەڭگەيدەگى تانىمال ءانشى» ءجۇلدەسىن دە قانجىعاسىنا بايلادى.
ءبىرىنشى كەزەڭ ءبارىمىزدىڭ ەسىمىزدە. فرانتسۋزدىڭ «SOS d’un terrien en détresse» ءانىن ورىنداپ, كورەرمەن قوشەمەتىنە بولەنگەن ديماشتى قىتايلىق مۋزىكا ماماندارى سول كەزدە-اق «ءتاڭىر نازارىنا العان ءانشى» دەگەن. ال ءبىزدىڭ ءانشىمىزگە ەلىتكەن ۇلتتىڭ باقانداي
3 ميلليون تابىنۋشىسى قازاقشا ءۇيرەنە باستادى. ديماشتىڭ العاشقى ءانىنەن كەيىن الەۋمەتتىك ميكروبلوگىنا جازىلۋشىلاردىڭ سانى ءبىر ساعاتتا 35 مىڭنان 118 مىڭعا جەتكەنىن قايتەرسىز.
كەلەسى باسەكەدە ديماش رەسەيلىك ايگىلى ءارتىس ۆيتاستىڭ «وپەرا 2» اتتى شىعارماسىن اسا جوعارى دەڭگەيدە شىرقاپ, مەرەيىمىزدى ۇستەم ەتكەنى ەستە. سول تۇستا عوي كوپشىلىك ونى «ەكىنشى ۆيتاس» اتاعانى. الايدا, تۋعان توپىراعىن كيە تۇتاتىن ء انشى «مەن قازاقتىڭ ديماشىمىن» دەدى.
ءيا, باس جۇلدەنى ەنشىلەمەسە دە ديماشتى الەم تانىدى. ونىڭ ورىنداۋشىلىق شەبەرلىگى مەن ەشكىمگە ۇقسامايتىن ەرەكشە داۋسىنا الەمدىك ساحناداعى ونەر جۇلدىزى لارا فابيان تاڭدانىپ, اتاقتى اكتەر دجەكي چان بەتپە-بەت ءجۇزدەسۋگە كەلدى. ديماش مىقتىلاردىڭ ىعىنا جىعىلماي, ءوز ۇلتىنىڭ نامىسىن بيىك ۇستاعانى دا ابىروي بولدى.
ۇلتتىق نامىس دەگەننەن شىعادى, ءانشىمىزدەن جانكۇيەرلەرى «ءسۇيىكتى كىتابىڭ قانداي؟» دەپ سۇراسا, مۇحتار اۋەزوۆتىڭ «اباي جولى» رومانى تۋرالى ايتىپ بەرىپتى. سودان كەيىن ادەبيەتىمىزدىڭ كلاسسيكالىق تۋىندىسىنىڭ قىتاي ءتىلىندەگى اۋدارماسىنىڭ ساتىلىمى دا كۇرت ارتقان كورىنەدى. «ديماش وقىعان كىتاپتى ءبىز دە وقۋىمىز كەرەك» دەيتىن ءوزگە ۇلت وكىلدەرىنىڭ شوعىرى قالىڭ.
جەتىنشى كەزەڭ شە؟.. جەتىنشى كەزەڭدە ديماش ءوز رەپەرتۋارىنداعى «دايديداۋ» ءانىمەن تىڭدارمانداردىڭ جانىن تەبىرەنتتى. قىتاي جۇرتى قازاقتىڭ ساف ۇلتتىق ونەر ناقىشىنا ءتانتى بولدى. قازاق بالاسىنىڭ ءانىنەن كەيىن ونىڭ جوباداعى ءارىپتەسى, قىتايلىق ءانشى لي جيان: «ديماشتىڭ ءانى اسا شىنايى شىقتى. ونىڭ بۇل ءاندى جانىنا سىڭىرگەنى بايقالادى. ديماشتىڭ كوزىندە ءومىردىڭ سان قىرىن كورگەن ادامنىڭ بەينەسى بار. بۇل ونىڭ ارتىستىك قابىلەتى ەمەس, تالانتى», دەپ ءادىل باعاسىن بەردى.
وسى جوبا ديماشتى قىتاي ەلىنە تانىتسا, ديماش تا اتالعان بايقاۋدى باسقا شەت ەلدەرگە تانىتتى دەۋگە بولادى. سەبەبى, ول اعىلشىن, ورىس, فرانتسۋز, يتاليان تىلدەرىندە اندەر شىرقادى. «قىتايدا ديماش پەن قازاقستان قازىر ەگىز ۇعىمعا اينالدى. مەن مۇنى ءوز كوزىممەن كۇن سايىن كورەمىن. ديماشتى قىتايدىڭ توقسان پايىزى بىلەدى دەسەم, ءوتىرىك بولماس» دەيدى ءانشىنىڭ مەنەدجەرى الپامىس شاريموۆ.
ونىڭ ايتۋىنشا, جانكۇيەرلەرى ديماش ساحناعا كيىپ شىققان كيىمدى كيگىسى, ونىڭ قولىنداعى زاتتاردى ۇستاعىسى كەلەدى ەكەن. ەندى ءبىزدىڭ ۇلدىڭ بەينەسىمەن كومپيۋتەرلىك ويىندار شىقپاق. وندا دا ديماش كورەرمەندەرىمەن «دايديداۋدى» سالعان بەينەسىمەن جۇزدەسەدى.
سوڭعى باسەكە جايىندا بىرەر ءسوز. ديماش وندا ءوزىن «مۋزىكا سالاسىنا توڭكەرىس اكەلگەن تالانتتى ءانشى» دەپ مويىنداعان قىتايلىق تانىمال ونەرپاز شان ۆەنتسزەمەن قوسىلىپ, مايكل دجەكسوننىڭ «Earth Song جانە Dangerous» اندەرىن ورىندادى. قىتايداعى اقپارات قۇرالدارى مەن الەۋمەتتىك جەلىلەرىندە قانداسىمىزدى جوباداعى «سۋپەر ءانشى», «Singer-2017» تەلەجوباسىنىڭ برەندى» دەپ باعالاعاندار دا كەزدەسەدى. ميلليونداعان پىكىرلەردىڭ ىشىندە قىتايداعى تانىمال «Netease» سايتىنىڭ پىكىرى بىلاي ءوربيدى: «ديماش جوبادا جارقىراپ كوزگە ءتۇستى دە, كوكجيەكتى جارىپ شىققان قاناتتى تۇلپارداي الەم كەڭىستىگىنە سامعادى. ول جوبا بارىسىندا ميلليونداعان جانداردى وزىنە ءتانتى ەتىپ, اۋديتورياسىنا تەرەڭ ماحاببات دارىتتى. فينالدىڭ ناتيجەسى قالاي بولسا دا, ديماش بۇل جوبانىڭ جەڭىمپازى».
ايتا كەتەيىك, جۇلدەگەرلەردىڭ تاعدىرىن كورەرمەن زالىندا وتىرعان 500 ادام شەشتى. ولار اقىرعى جەڭىستى تارتىسقا تولى باسەكەدە بارلىق كەزەڭ بويىنشا ديماشپەن ۇزەڭگى قاعىستىرىپ كەلە جاتقان Sandy Lam-عا بەرگەن.
اسحات رايقۇل,
«ەگەمەن قازاقستان»
