ۇشاق جولاۋشىلارىنىڭ ساتىپ العان بيلەتتەرىن كەرى قايتارۋى قالىپتى قۇبىلىس. مۇنداي جاعدايدا كوبىنەسە اۋە كومپانيالارى بيلەتتىڭ اقشاسىن تولىقتاي نەمەسە ءبىر بولىگىن قايتارىپ بەرەدى. ال ۇشاقتاعى ورىننىڭ بوس كەتۋى ولارعا ءتيىمسىز. سول سەبەپتى اۋە كومپانيالارى «وۆەربۋكينگ» ساياساتىن قولدانادى. بۇل – بيلەتتەردىڭ رەيستە بار ورىنداردان كوپ ساتىلۋى, ياعني بيلەتتەردى ارتىعىمەن ساتۋ. وسى ارقىلى اۋە تاسىمالداۋشىلار قايتارىلعان بيلەت شىعىنىنىڭ ورنىن تولتىرىپ وتىرادى.
شۇعىل تۇردە ءتورت قىزمەتكەرىن رەيسكە وتىرعىزۋى كەرەك بولعان United Airlines اۋە كومپانياسى ۇشاق بورتىنان بوس ورىن تاپپادى. بۇل جولى كەرى قايتارىلعان بيلەت بولماعاندىقتان, كومپانياعا رەيستەن ءتورت ادامدى ءتۇسىرىپ تاستاۋ قاجەت بولدى. ولار ەرىك بىلدىرگەن ءتورت جولاۋشىعا كەلەسى رەيسپەن ۇشۋعا ۇسىنىس ءبىلدىرىپ, وتەماقى رەتىندە 400 دوللار تولەيتىندەرىن جانە ءبىر تۇنگە قوناق ۇيدەن ورىن بەرەتىندەرىن ايتقان. الايدا, ەشبىر جولاۋشى ۇسىنىسقا كەلىسپەگەندىكتەن, وتەماقى سوماسىن 800 دوللارعا كوتەرگەن. سوندا دا ەشكىم رەيستەن تۇسۋگە ق ۇلىق تانىتپاپتى.
بۇدان سوڭ اۋە كومپانيا مەنەدجەرى بورتقا كوتەرىلىپ, ۇشاقتان ءتۇسۋى ءتيىس ءتورت ادامدى تاڭداۋعا تۋرا كەلەتىنىن حابارلادى. بۇل ىرىكتەۋ ءتۇرلى فاكتورلاردى ەسكەرە وتىرىپ جاسالادى. الايدا, كومپانيانىڭ ءباسپاسوز حاتشىسى مالىمدەگەندەي, كومپانيا قىزمەتىن ۇنەمى پايدالاناتىن جولاۋشىلاردىڭ, سونداي-اق قىمبات بيلەت يەلەرىنىڭ ىرىكتەۋگە قاتىسپاۋ مۇمكىندىگى جوعارى.
قىزمەتكەرلەر تاڭداعان ءۇش جولاۋشى ءوز ەرىكتەرىمەن ۇشاقتان تۇسۋگە كەلىسكەن. ال تاڭدالعان تاعى ءبىر ادام ءوزىنىڭ دارىگەر ەكەنىن, تاڭەرتەڭ قابىلدايتىن ناۋقاستارى بار ەكەنىن ايتىپ, بورتتان تۇسۋدەن باس تارتادى. ناتيجەسىندە كومپانيا مەنەدجەرى قاۋىپسىزدىك قىزمەتكەرلەرىن شاقىرىپ, جولاۋشىنى ۇشاقتان كۇشتەپ ءتۇسىردى.
ۆيدەودا قاۋىپسىزدىك قىزمەتكەرلەرىنىڭ ونى ۇشاق بورتىنان سۇيرەپ شىعارعانى كورسەتىلگەن.
«اۋە كومپانيانىڭ قىزمەتكەرلەردى تاسىمالداۋ ءۇشىن جولاۋشىلاردى رەيستەن ءتۇسىرۋى – ەرەكشە جاعداي. قىزمەتكەرلەردى تاسىمالداۋ الدىن الا جوسپارلانىپ, برونداۋ جۇيەسىنە ەنگىزىلۋى ءتيىس, – دەپ مالىمدەدى Travelers United جولاۋشىلار قۇقىعىن قورعاۋ جونىندەگى ۇيىمنىڭ نەگىزىن قالاۋشى چارلز ليچا. – اقش-تا جولاۋشىلار رەيس ۋاقىتىنىڭ ۇنەمى كەشىگۋىنە, قىزمەت كورسەتۋ دەڭگەيىنىڭ تومەندىگىنە ۇيرەنىپ قالعان. الايدا, ءوز قىزمەتكەرىنە ورىن بوساتىپ بەرۋى ءۇشىن جولاۋشىنى ۇشاقتان كۇشتەپ شىعارۋى ارتىقتىق. بۇعان توزۋگە بولمايدى».
United Airlines اۋە كومپانياسىنىڭ باسشىسى وسكار مۋنوس بولعان وقيعاعا بايلانىستى كەشىرىم سۇرادى.
«بۇل ءبىز ءۇشىن وكىنىشتى جاعداي. جولاۋشىلاردى كەيىنگى رەيسكە اۋىستىرعانىمىز ءۇشىن كەشىرىم سۇرايمىن», – دەگەن ول قازىرگى ۋاقىتتا وقيعاعا بايلانىستى تەرگەۋ جۇرگىزىلىپ جاتقانىن جەتكىزدى.
ۆيدەوداعا قاراعاندا, ۇشاقتان كۇشتەپ شىعارىلعان ادامنىڭ ۇلتى قىتايعا كەلەدى. قىتايلىق WeChat-تىڭ پايدالانۋشىلارى وقيعاعا بايلانىستى ءتيىستى شارالار قابىلدانباعانشا United Airlines كومپانياسىنا بايكوت جاريالاۋعا شاقىردى.
«كومپانيا بۇل ءۇشىن ءتيىستى جازاسىن الۋى كەرەك. رەيستەن تۇسىرىلگەن ازاماتتىڭ قىتايلىق بولعانى ءۇشىن ەمەس. مۇنداي نەگىزسىز ارەكەتتەرمەن كۇرەسۋگە ءار ادامنىڭ قۇقى بولۋى ءتيىس», – دەپ جازدى چات قولدانۋشىلارىنىڭ ءبىرى.
بايكوتقا شاقىرۋ تۋرالى حابارلامانى قىتايدىڭ تانىمال Weibo الەۋمەتتىك جەلىسىنىڭ 480 ميلليوننان استام پايدالانۋشىسى قارادى.
وقيعادان كەيىن كومپانيانىڭ كاپيتالى 1 ملرد دوللارعا ازايدى. الەۋمەتتىك جەلىلەر مەن اقپارات قۇرالدارىندا تاراعان نارازىلىق تولقىنىنان كەيىن, United Airlines اۋە كومپانياسىنىڭ اكتسيالارى بيرجادا 4,4%-عا تومەندەدى. United Continental حولدينگىنىڭ نارىقتىق باعاسى 250 ملن دوللارعا قۇلادى.
اتالعان وقيعاعا بايلانىستى قىتاي مەملەكەتتىك باق وكىلدەرى دە پىكىر ءبىلدىردى.
«كومپانيا وقيعادان كەيىنگى مالىمدەمەلەرىندە ازيالىق ازاماتقا زورلىق كورسەتىلگەنىن اتاپ وتپەگەندەرى قاتتى قىنجىلتادى», دەپ جازدى قىتاي كوممۋنيستىك پارتياسىنىڭ رەسمي باسىلىمى «جەنمين جيباو».
جولاۋشىمەن بولعان وقيعا كومپانيانىڭ حالىقارالىق بەدەلىنە بۇدان دا ەلەۋلى نۇقسان كەلتىرۋى مۇمكىن. سەبەبى United Airlines – اقش پەن قىتاي اراسىندا ەڭ كوپ اۋە تاسىمالىن جۇرگىزەتىن كومپانيا.
