«كەلەسى جەكپە-جەگىم 17-ماۋسىمدا ءوتىپ قالۋى مۇمكىن. سول كۇنى ساۋل الۆارەسپەن جەكپە-جەك وتكىزگىم كەلەدى. مۇمكىن, مەنىڭ كەلەسى قارسىلاسىم سوندەرس بولىپ قالار. كەز كەلگەن ۇسىنىستى قابىلداۋعا دايىنمىن». ءوز كەزەگىندە بيللي دجو سوندەرس تە گولوۆكينمەن قاي جەردە بولماسىن جۇدىرىقتاسقىسى كەلەتىنىن, ءتىپتى قازاقستانعا دا كەلۋگە دايىن ەكەنىن مالىمدەدى.
- كەز كەلگەن جەرگە بارۋعا دايىنمىن. جەكپە-جەكتىڭ قازاقستاندا وتەتىنىنە بايلانىستى ۋايىمىم جوق. اشىق الاڭدا دا جۇدىرىقتاسا بەرەمىن. ەگەر گولوۆكينگە WBO بەلبەۋى قاجەت بولسا, مەن ونى باسكە قويۋعا دايىنمىن. راسىندا گولوۆكين مىقتى, الايدا ول مەن سياقتى بوكسشىمەن ءالى كەزدەسىپ كورگەن ەمەس. ءتىپتى, مەن بابىمدا بولعان كەزدە مەنىڭ دەڭگەيىمە جەتپەيتىن دجەيكوبستىڭ ءوزى وعان قارسى توتەپ بەرە الدى, - دەدى سوندەرس. ەكەۋىنىڭ وسى پىكىرلەرىنەن كەيىن بوكس جانكۇيەرلەرى 17-ماۋسىم كۇنى استانادا گولوۆكين-سوندەرس جەكپە-جەگى وتەتىنىنە سەنە باستاعان ەدى.
الايدا, جۋىردا شەتەلدىك جانە ەلىمىزدىڭ باق وكىلدەرى گەننادي گولوۆكين بريتان بوكسشىسى بيللي دجو سوندەرسپەن ەحرو اياسىندا استانادا وتەدى دەپ جوسپارلانعان جەكپە-جەكتەن باس تارتقانىن حابارلادى.
گولوۆكين-سوندەرس جەكپە-جەگى وتپەۋىنىڭ 2 سەبەبى
بوكس ساراپشىلارىنىڭ ايتۋىنشا, گولوۆكين-سوندەرس جەكپە-جەگى وتپەۋىنىڭ 2 سەبەبى بار. ءبىرىنشى سەبەپ, گەنناديدىڭ دجەيكوبسپەن كەزدەسۋدە جاراقات الىپ قالۋى. GGG باپكەرى ابەل سانچەس شاكىرتىنىڭ جاراقاتى بار ەكەنىن ايتقانىمەن, گولوۆكيننىڭ كومانداسى ءالى ناقتى ءبىر مالىمدەمە جاسامادى. گەنناديدىڭ جاراقاتى تۋرالى ءسوزىمىز جالاڭ بولىپ قالماس ءۇشىن, وسى جەردە ابەل سانچەستىڭ پىكىرىن كەلتىرە كەتەيىك:
«گولوۆكين دجەيكوبسپەن وتكىزگەن كەزدەسۋدەن كەيىن شامالى مازاسى بولماي تۇردى. ادەتتە جاراقات جەكپە-جەكتەن ەكى نە ءۇش كۇن وتكەننەن كەيىن بايقالا باستايدى. ءبىز گولوۆكينمەن بىرگە ۇزاق ۋاقىتتان بەرى جۇمىس ىستەپ كەلەمىز. سوندىقتان, جاراقاتى اۋىر بولسا, ول ماعان ايتار ەدى. الايدا, گولوۆكين شاعىم ايتاتىن بوكسشىلاردىڭ قاتارىنان ەمەس. بۇل جەكپە-جەكتەن كەيىن بولاتىن كىشىگىرىم جاراقاتتار. سەبەبى, جەكپە-جەك قيىن بولدى» دەيدى سانچەس.
وسى پىكىردە ءبىر شيكىلىك بار ەكەنىن اڭعارۋعا بولادى. ويتكەنى, ابەل جەكپە-جەكتەن كەيىن گولوۆكيننىڭ مازاسى بولمادى دەسە, ەكىنشى سوزىندە جاراقاتتار 2-3 كۇننەن كەيىن شىعاتىن ەدى دەيدى. جەكپە-جەكتەن سوڭ گەنناديدىڭ مازاسى بولماي تۇرسا, بەلگىلى ءبىر دەڭگەيدە جاراقاتى بار دەگەن ءسوز. اۋىر جەكپە-جەكتەن كەيىن جاراقات بولاتىنى دا راس. دەمەك, سوندەرسپەن كەزدەسۋ جاراقات سەبەبىمەن باس تارتىپ وتىر جانە ول جەكپە-جەككە گولوۆكين دايىن ەمەس. ءسوزىمىز جالعان بولماس ءۇشىن, مىناداي مىسال كەلتىرە كەتەيىك.
گولوۆكيننىڭ جاراقاتى جەڭىل دەگەننىڭ وزىندە, ونى تولىق ەمدەۋگە شامامەن 1 ايعا جۋىق ۋاقىت كەتەدى دەپ ەسەپتەيىك. ارينە, ءبىز گەنناديدىڭ جاراقاتى بار ەكەنىن, ونىڭ قانشالىق اۋىر ەكەنىن انىق ايتا المايمىز. بۇل تەك جورامال. سونىمەن قاتار, مۇنداي اۋىر كەزدەسۋدەن كەيىن بوكسشى قالپىنا كەلۋ ءۇشىن كەم دەگەندە 2-3 اپتا قاجەت. ال, كەلەسى جەكپە-جەككە دەيىن بابىنا ەنۋ ءۇشىن سپورتشىعا 8-10 اپتالىق جاتتىعۋ جۇمىسى قاجەت بولادى.
ەندى ەسەپتەڭىز, گولوۆكين-سوندەرس جەكپە-جەگى 17-ماۋسىمعا جوسپارلانعان. ال, گەنناديگە ەمدەلۋ مەن قالپىنا كەلۋ ءۇشىن ءبىر جارىم اي قاجەت بولسا, بابىنا ەنۋ ءۇشىن 2 - 2,5 اي جاتتىعۋ كەرەك. ءسويتىپ, جەكپە-جەككە تولىق دايىن بولۋ ءۇشىن 4 ايدان كوپ ۋاقىت كەرەك بولادى. ال, گولوۆكين-سوندەرس جەكپە-جەگىنە 3 ايدان ءسال اساتىن ۋاقىت بار ەدى. وسىنىڭ ءبارىن نازاردا ۇستاعان گەنناديدىڭ كومانداسى سوندەرسكە قارسى وتەتىن جەكپە-جەكتەن مادەنيەتتى تۇردە باس تارتقان بولۋى مۇمكىن.
ەكىنشى سەبەپ
گەننادي گولوۆكيننىڭ بريتاندىق بوكسشىعا قارسى كەزدەسۋ وتكىزۋدەن باس تارتۋىنىڭ ەكىنشى سەبەبى كۇزگە جوسپارلانعان گولوۆكين-الۆارەس جەكپە-جەگى. الەم جانكۇيەرلەرى ەكى بوكسشى اراسىنداعى جۇدىرىقتاسۋدى 2 جىلدان بەرى تاعاتسىزدانا كۇتىپ ءجۇر. جانە بۇل كەزدەسۋدىڭ ءوتۋى بيىل شىرقاۋ شەگىنە جەتتى جانە ەكى تاراپ تا ۇلكەن سوماداعى قارجىعا كەنەلمەك.
ەگەر بۇل جەكپە-جەك بيىل ۇيىمداستىرىلماسا, گولوۆكين سوندەرسپەن شىعىپ, ورتا سالماقتاعى بارلىق بەلبەۋدى يەلەنسە, گولوۆكين-الۆارەس جەكپە-جەگىنىڭ ماڭىزدى بولماي قالۋى مۇمكىن. ارينە, WBO بەلبەۋى ءۇشىن دجو سوندەرس سياقتى ۇستاتپايتىن بوكسشىمەن جۇدىرىقتاسۋ گولوۆكين ءۇشىن تيىمدىرەك. بىراق, مەكسيكالىق بوكسشىنىڭ پروموۋتەرى گولوۆكينمەن جەكپە-جەكتىڭ قۇنى قازىر ەڭ جوعارعى دەڭگەيگە جەتكەنىن ءبىلىپ, وسكار دە لا حويا بۇل كەزدەسۋدى بيىلدان قالماي ۇيىمداستىرعىسى كەلەدى.
كاسىپقوي بوكس بيزنەس بولعان سوڭ ەكى تاراپ تا قوماقتى قارجىدان قاعىلىپ قالعىسى كەلمەيدى. توم لەفللەر دە گولوۆكيننىڭ سوندەرسكە قارسى وتكىزەتىن جەكپە-جەكتە جاراقات الىپ قالۋىنان ەمەس, قىركۇيەكتەگى جەكپە-جەكتىڭ وتپەي قالۋى قاۋپىنەن بريتاندىق بوكسشىمەن كەزدەسۋ وتكىزۋدەن باس تارتقان بولۋى مۇمكىن.
ءتۇيىن
جالپى, گولوۆكين كومانداسىنىڭ سوندەرسكە قارسى جەكپە-جەك وتكىزۋدەن باس تارتۋى گولوۆكين-الۆارەس كەزدەسۋىن ۇيىمداستىرۋعا مۇددەلى ەكەنىن اڭعارتادى. سونداي-اق, ساۋل «كانەلو» الۆارەس 6 مامىر كۇنى وتانداسى حۋليو سەزار چاۆەسپەن جەكپە-جەكتەن كەيىن ورتا سالماققا, ياعني گەننادي گولوۆكيننىڭ سالماعىنا اۋىساتىنىن حابارلادى. دەمەك, گولوۆكين-الۆارەس كەزدەسۋىنىڭ ۇيىمداستىرىلۋى 80 پايىزعا بەلگىلى بولعان سياقتى. دەگەنمەن, بىزدىكى تەك بولجام, ال ناقتى رەسمي حابارلامانى الداعى ۋاقىتتا ەكى بوكسشىنىڭ رەسمي وكىلدەرى جاريالاۋى ءتيىس.
ءالي بيتورە,
«ەگەمەن قازاقستان»
