اقمولا وبلىسىنىڭ اكىمى شۇعىل تۇردە اتباسار قالاسىنا باردى

ايماق باسشىسى م.مىرزالينگە اتباسارداعى  جاعداي تۋرالى اۋماقتىق تجد باستىعىنىڭ ورىنباسارى قانات دوسپاەۆ  ايتىپ بەردى.

ونىڭ سوزىنشە, جاباي وزەنىن بويلاي ورناتىلعان سۋ بوگەتىنىڭ بويىندا اقاۋ شىققان. ينەرتتى ماتەريال سالىنعان قاپتارمەن نىعايتىلعان, ودان وڭ نəتيجە شىقپادى. سول سەبەپتى قوسىمشا كوتلوۆان قازىلعان. قازىرگى كەزدە مۇنداعى جاعدايدى تۇراقتى دەپ ايتۋعا بولادى. 

ايتا كەتەيىك, قازىرگى كەزدە اتباسار قالاسىندا سۋ العان ۇيلەر جوق. قاۋىپتى اۋماقتا ورنالاسقان 20 ۇيدەگى 12 وتباسى  (41 ادام) مەن ءۇي جانۋارلارى قاۋىپسىز جەرگە كوشىرىلدى.

جالپى, سۋ تاسقىنىنىڭ الدىن الۋ شارالارىنا تجد, جەرگىلىكتى اتقارۋشى ورگاندار, جەرگىلىكتى پوليتسيا قىزمەتى, ازاماتتىق قورعانىس قىزمەتكەرلەرى مەن ۇلتتىق گۆارديا ساربازدارى جəنە كوكشەتاۋ تەحنيكالىق ينستيتۋتىنىڭ كۋرسانتتارىنان قۇرالعان 300 ادام جəنە 50 ارنايى تەحنيكاسى, سونداي-اق 16 قۇتقارۋ جəنە سۋ سورعىش تەحنيكاسى جۇمىلدىرىلاتىن. 

ايماق باسشىسى سۋ تاسقىنىنا شارالاردى جوعارى دەڭگەيدە ۇيىمداستىرۋدى, بارلىق كۇشتى جۇمىلدىرا وتىرىپ, جاعدايدى تۇراقتى باقىلاۋدا ۇستاپ وتىرۋدى تاپسىردى.

ەسكە سالا كەتەيىك, وتكەن جىلى اتباسار قالاسىندا سۋ تاسقىنىنا جول بەرمەۋ ماقساتىندا جاباي وزەنىن بويلاي ۇزىندىعى 9 شاقىرىم سۋ بوگەتى تۇرعىزىلعان بولاتىن. 

ايماق باسشىسى اتباسارداعى جاعدايعا قانىققان سوڭ, ارشالى اۋدانىنا اتتاندى. وسى كۇنى اتباساردان بولەك ارشالى اۋدانىنداعى ەلدى مەكەندەرگە دە قاۋىپ ءتونىپ تۇر.