● جارىستىڭ العاشقى كۇنى ءبىرىنشى بولىپ چەحيا مەن دانيا قۇرامالارى تارتىسقا ءتۇستى. دانيا فۋتبولشىلارى ماتچ بىتۋگە ءۇش ءمينوت قالعاندا 3:2 ەسەبىمەن جەڭىپ جاتقان. باق دەگەندى قويساڭىزشى. چەحيا قۇراماسى قاس-قاعىمدا ەسەپتى تەڭەستىردى دە, تۋرا ءۇش سەكۋند قالعاندا ءتورتىنشى دوپتى سوقتى دا كەتتى – 4:3. قاس-قاعىمدا توڭكەرىپ كەتتى.
قازاق ەلىنىڭ جانكۇيەرلەرى ءزاۋلىم سارايدى دۇبىرگە بولەپ, دۋمانداتىپ, دۋىلداپ وتىر. جانى بولەك جانكۇيەرلەر ىشىندەگى ەرەكشە توپ كوزگە وتتاي باسىلادى. دابىل قاعىپ, قيقۋعا باسىپ تۇر. تۋرا الدارىندا ىلىنگەن «قازاق ەلى» دەگەن جازۋى بار ۇلكەن پلاكات جۇرەگىڭە نۇر قۇيادى.
● ماكەدونيا قاقپاسى تاس قامال, العىزار ەمەس. ءبىزدىڭ شابۋىلشىلار ساڭىلاۋ ىزدەپ جوسىلتىپ ءجۇر. ءبىرىنشى كەزەڭنىڭ بىتۋىنە تۋرا جەتى ءمينوت قالعاندا, لەونىڭ پاركەت باۋى- رىن جالاتا تەپكەن قۋاتتى دوبى قاقپاعا سۇڭگىپ كەتتى – 1:0. سول لەونىڭ وڭ قاپتالدان قالىقتاتا شىعارعان دوبىن سول قاناتتان جۇيتكىپ كەلگەن سەرىك جامانقۇلوۆ قاپىسىز تەپتى – 2:0.
وسى ەسەپپەن قازاق ەلى قۇراماسى ۇزىلىسكە شىقتى. جانكۇيەر جۇزىنە لىپ ەتىپ قان جۇگىردى. ەكىنشى كەزەڭدەگى الما-كەزەك شابۋىل ناتيجە بەرەر ەمەس. ورايلى ءبىر ساتتە دۋگلاس شىعارعان دوپتى سول قاپتالدان ىشقىنا ۇمتىلعان البەرت اقبالىقوۆ سول اياقپەن قاقپا تورىن سولق ەتكىزدى 3:0. «اقتوبە» كلۋبى ويىنشىسىنىڭ پاركەتكە شىققانى دا سول ەدى, جارق ەتىپ كوزگە ءتۇستى.
● جارىستىڭ ەكىنشى كۇنىندە ماكەدونيا مەن چەحيا قۇرامالارى تەكەتىرەسە كەتتى. ءبىراق تاجىريبەسى مول چەحيا قۇراماسى ءتىس باتىرىپ جىبەردى – 7:3.
● بۇل كۇنى قازاق ەلى قۇراماسى دانيا كومانداسىن ءسىلكىلەپ الدى. ءتورتىنشى مينوت وتكەندە جامانقۇلوۆ جارق ەتكىزىپ ەسەپ اشتى – 1:0. ويىننىڭ توعىزىنشى مينوتىندە لەونىڭ قۇيىنداتا تەپكەن دوبىنا قاقپاشى ۇمتىلىپ تا ۇلگەرمەدى – 2:0. تارتىستىڭ 17-مينوتىندە دۋگلاستىڭ سول اياقپەن زاۋلاتقان دوبى قاقپاشىدان كەيىن سەرپىلدى. قايتقان دوپتى ميحايل پەرشين قاقپاعا زۋ ەتكىزدى – 3:0. پەرشين – باسىنان باعى تايعان «تۇلپار» كلۋبىنىڭ ويىنشىسى. قازىر «قايرات» كومانداسىندا. قۋانىشتان اتىپ تۇرعان قالىڭ جانكۇيەر قۇيرىقتارىن باسقانشا دۋگلاس ەسەپتى ۇلعايتىپ ۇلگەردى – 4:0.
ويىن بىتۋگە ءۇش-اق ءمينوت قالدى. باس باپكەر ويىنعا ورازوۆ ءبىرجاندى شىعاردى, دۇرىس شەشىم. وسىنداي جاۋاپتى ويىننىڭ ءساتى كەلگەن تۇسىندا شىڭداپ الۋ كەرەك. «جەتىسۋ» كلۋبىنىڭ بۇل فۋتبولشىسى ەكى كۇن بويى ورىندىقتا كەزەك كۇتىپ وتىرعان.
دانيالىقتار دارمەنسىز كۇيگە ءتۇستى, دىنمۇحامبەت ءسۇلەيمەنوۆ سوققان سوڭعى دوپ ەسەڭگىرەتىپ تاستاعانداي – 5:0. وسىلايشا, قازاق ەلى قۇراماسى ەكىنشى كۇنى دە قالىڭ جانكۇيەردى ۇلكەن جەڭىسىمەن قۋانتتى.
● جارىستىڭ سوڭعى كۇنى ماكەدونيا باعىن اسىردى, دانيانى 4:3 ەسەبىمەن جەڭىپ كوش سوڭىندا قالدىردى.
جانكۇيەر قاۋىمنىڭ فۋتزالعا دەگەن ىقىلاسى ەرەكشە. «الماتى ارەنا» قالانىڭ سولتۇستىك باتىسىندا, اجەپتاۋىر جەر. جەتۋ وڭاي ەمەس. جۇمىس كۇنى بولعانىنا قاراماستان, ەل قۇراماسىنىڭ شەشۋشى ويىنىنا حالىق ىقىلاسى كەرەمەت. ءزاۋلىم سارايدى لىق تولتىرىپ وتىر. وسىنداي تىلەۋقور حالقى بار كوماندا جانكۇيەردى جەرگە قاراتپاۋعا ءتيىس.
● ويىننىڭ 5-مينوتىندە دۋگلاستىڭ اينالدىرا تەپكەن دوبى قاقپاشىدان كەيىن سەرپىلدى. قايتقان دوپتى قاس-قاعىمدا شىرەنە قايتا تەپتى. گول! چەحيا قاقپاسى بۇزىلدى – 1:0.
شىڭعىس ەسەنامانوۆتىڭ شىرقىراتا تەپكەن دوبىن قاقپاشى ارەڭ قايتاردى. اسا تارتىستى ويىن. جەلدەن وزعان جىلدامدىق. ويىن وتە جوعارى ەكپىنمەن وتۋدە. ەكى كوماندا دا بەس-بەس فولدان. ەكى كوماندا دا قىزىل سىزىق ۇستىندە. ەندى ءتارتىپ بۇزىلسا, ايىپ دوبى دايىن تۇر. ءبىرىنشى كەزەڭنىڭ اياقتالۋىنا تۋرا 59 سەكۋند قالدى. لەونىڭ ءساتتى شىعارعان دوبىن پەرشين قاپىسىز سوقتى – 2:0.
ەكىنشى كەزەڭدە ۇدەي سوققان داۋىلداي تولاسسىز شابۋىلدار باستالدى-اي, ءشىركىن. ءبىزدىڭ ويىنشىلار اسا ساۋاتتى قورعانۋدا. تەڭىزدىڭ دۇلەي تولقىندارىنداي ەكىلەنە, تىنىمسىز جاساعان شابۋىلداردىڭ بەتىن قايتارىپ, دوپتى سىرتقا تەۋىپ جاتىر. قاپتالداعى ەكى تورەشى دوپتى ءبىزدىڭ قاقپاعا باعىتتاپ كورسەتۋمەن الەك.
ارا-تۇرا دۋگلاسقا قاقپانى قاراۋىلداتىپ يگيتا ويىنعا قوسىلىپ قويادى. ونىڭ تەپكەن دوبى قاقپا جاقتاۋىن سىندىرارداي, اسا قۋاتتى. ازىرشە دارىماي تۇر. ءبىر كەزدە قاقپاسىن يەسىز تاستاپ چەحيا قاقپاشىسى دا ويىنعا قوسىلدى. وسىنى بايقاپ قالعان دۋگلاس اياعىنا دوپ تيگەن ساتتە قاراۋسىز قالعان قاقپاعا زاۋلاتتى – 3:0.
قازاق ەلى قۇراماسى كەرەمەت ويىن ۇلگىسىن كورسەتتى. قارسىلاس ءۇش كوماندا قاقپاسىن قاقىراتىپ 11 دوپ سوقتى. جالعىز دوپ وتكىزبەدى. بۇل جەردە قاقپاشى يگيتانىڭ كەرەمەت شەبەرلىگىن ايتىپ وتكەن ابزال.
● قازاق ەلى قۇراماسى ەندى 2018 جىلدىڭ 30 قاڭتار مەن 10 اقپان ارالىعىندا سلوۆەنيانىڭ ليۋبليان قالاسىندا وتەتىن ەۋروپا چەمپيوناتىنىڭ فينالىندا ايقاسقا تۇسەدى. قازاق ەلى قۇراماسىن دۇنيەنى دۋىلداتقان نەبىر اتاقتى كوماندالارمەن سايىسقا ءتۇسۋ باقىتى كۇتىپ تۇر.
زەينەل جەكەي ۇلى,
جۋرناليست
الماتى
