1/8 فينالدا پسج-دان سىرت الاڭدا 0:4 ەسەبىمەن ۇتىلىپ, كەيىننەن قارىمتا ويىندا كامبەك جاساعان «بارسەلونا» بۇل جولى تۋريندە توسىلىپ قالدى.
وسىنىڭ الدىندا «مالاگا» قاقپاسىنا گول سوعا الماعان نەيمار-سۋارەس-مەسسي ۇشتىگى اپەننين تۇبەگىندە تاعى دا بىلگەندەرىنەن جاڭىلدى. ال اللەگري شاكىرتتەرى كاتالونيا كومانداسىن اياعان جوق.
ارگەنتينادان الەمدى اۋزىنا قاراتقان تالانتتى ويىنشىلار كوپ شىققانى بەلگىلى. وتكەن عاسىردىڭ 80-90-شى جىلدارى مارادونانىڭ داۋرەنى جۇرسە, كەيىنگى جىلدارى مەسسي بەس مارتە «التىن دوپتىڭ» يەگەرى اتاندى. ەندى, ءمىنە, «يۋۆەنتۋستا» تاعى ءبىر تالانتتى فۋتبولشى ءوسىپ كەلەدى. ونىڭ ەسىمى – پاۋلو ديبالا. فۋتبولشى جانكۇيەرلەر مەن فۋتبول ماماندارىنان ءوزىن مەسسيمەن سالىستىرماۋدى سۇرادى. مۇنىسى دا دۇرىس شىعار. قالاي دەگەنمەن اركىمنىڭ ءوز جولى بولۋ كەرەك قوي.
ديبالادان ءبولەك, ءبىر گولدى قورعاۋشى دجوردجو كەلليني سوقتى. «بارسەلونا» باپكەرى لۋيس ەنريكە قارىمتا ويىندا بارلىق كۇشتى سالىپ, جارتىلاي فينالعا شىعۋعا تىرىسامىز دەپ وتىر. وعان «يۋۆەنتۋس» جول بەرە قويار ما ەكەن؟
ال گەرمانيانىڭ ۇكىلەپ قوسقان ەكى كومانداسى دا ءوز الاڭىندا جەڭىلدى. «بورۋسسيا دورتمۋند» پەن «موناكو» ويىنى جوسپارلانعان ۋاقىتتان ءبىر كۇن كەش ءوتتى. سەبەبى, دورتمۋندتا فۋتبولشىلار مىنگەن اۆتوبۋستا جارىلىس بولدى. «بورۋسسيا» كومانداسىنىڭ ورتالىق قورعاۋشىسى مارك بارترا اۋىر جاراقات الدى. وعان شۇعىل وپەراتسيا جاسالدى. ءسويتىپ, ۋەفا ماتچتى ءبىر كۇنگە شەگەردى.
كەزدەسۋگە كەلەتىن بولساق, «موناكونىڭ» جاس تالانتتى ويىنشىلارى نەمىس كومانداسىنىڭ قاقپاسىنا ءۇش گول سوقتى. ماتچتىڭ 17-مينۋتىندا «بورۋسسيا» قورعاۋشىسى سوكراتيس جاس جۇلدىز كيليان مباپپەنى ءوز ايىپ الاڭىندا ءتارتىپ بۇزۋ ارقىلى توقتاتقان ەدى. تورەشى بىردەن پەنالتي بەلگىلەدى. بىراق فابينو بۇل ءمۇمكىندىكتى پايدالانا المادى. دەگەنمەن, «موناكو» ويىنشىلارى شابۋىلدى مۇنىمەن توقتاتقان جوق. ارادا ەكى مينۋت وتكەندە, مباپپە ءبارىبىر ەسەپتى اشتى. ۇزىلىسكە دەيىن سۆەن بەندەر ءوز قاقپاسىنا ەكىنشى گولدى سوعىپ الدى.
ەكىنشى تايمدا دەمبەلە قاقپاشى دانيەل ءسۋباشيچتىڭ وسال تۇسىن تاۋىپ, تارتىستى قىزدىرا تۇسكەن ەدى. دەگەنمەن, مباپپە 79-مينۋتتا ەسەپتى 3:1-گە جەتكىزدى. ويىننىڭ سوڭعى جاعىندا «بورۋسسيانىڭ» جاپونيالىق لەگيونەرى سيندزي كاگاۆا ەسەپ ايىرماشىلىعىن ءبىر دوپقا قىسقارتا الدى. بىراق, ودان ارىگە شامالارى جەتپەدى. وسىلايشا, «موناكو» جارتىلاي فينالعا ءبىر قادام جاسادى.
ال ميۋنحەننىڭ «باۆاريا» كومانداسى وزىندە تۇرعان باسىمدىقتى پايدالانا المادى. «اليانتس-ارەنادا» مادريدتىڭ «رەالىن» قابىلداعان نەمىستەر 1:2 ەسەبىمەن ۇتىلىپ قالدى.
العاشقى گولدى 25-مينۋتتا ارتۋرو ۆيدال سوققان ەدى. چيليلىك فۋتبولشى ۇزىلىسكە شىعاتىن تۇستا پەنالتيدەن ءمۇلت كەتتى.
ەكىنشى تايمدا مادريد فۋتبولشىلارىنىڭ ويىنى قۇلپىرىپ شىعا كەلدى. اۋەلى پورتۋگاليالىق سۋپەرجۇلدىز كريشتيانۋ رونالدۋ تارازى باسىن تەڭەستىردى. سونان سوڭ, «باۆاريا» قورعاۋشىسى حاۆي مارتينەس ماتچتاعى ەكىنشى سارى قاعازىن الىپ, الاڭنان قۋىلعان بولاتىن. بۇل ءمۇمكىندىكتى قوناقتار ءتيىمدى پايدالاندى. ويىننىڭ 77-مينۋتىندا اسەنسيودان پاس العان رونالدۋ ماتچتاعى جەڭىس گولىن سوقتى. وسىلايشا, كريشتيانۋ ەۋروكۋبوكتاردا 100 گول سوققان العاشقى فۋتبولشى اتاندى.
– «باۆارياعا» قارسى ويناۋ وڭاي ەمەس. ءبىز 0:1 ەسەبىمەن جەڭىلىپ جاتتىق. بىراق, دەر كەزىندە قاتەلىكتەن قورىتىندى شىعارىپ, جينالا بىلدىك. ەكىنشى تايمنىڭ باسىندا ەسەپتى تەڭەستىرگەنىمىز قانداي جاقسى بولدى. جەڭىسكە جەتتىك. الايدا ءالى الدا ءبىر ويىن بار. سوندىقتان, قورىتىندى شىعارۋعا ءالى ەرتە. نەگىزى بۇل ماتچتا تاعى دا بىرنەشە گول سوعۋعا بولار ەدى. وعان قاقپاشى نويەر ءمۇمكىندىك بەرمەدى. ەگەر ۆيدال پەنالتيدى ەنگىزگەندە, قارسىلاسقا وڭاي بولار ەدى. ارينە, بۇل – فۋتبول. ءبارى دە بولۋى مۇمكىن. كەيىننەن ءبىز سوقتىق, ولار 10 اداممەن قالدى, – دەيدى كريشتيانۋ رونالدۋ.
«اتلەتيكو» مەن «لەستەر» كەزدەسۋىندە توپىرلاعان گولداردى كورە قويمادىق. مادريد كومانداسى انتۋان گريزماننىڭ پەنالتيدەن سوققان ءبىر دوبىنىڭ ارقاسىندا جەڭىسكە جەتتى. چەمپيوندار ليگاسىندا قالعان انگليانىڭ جالعىز كومانداسىنىڭ جارتىلاي فينالعا شىعۋعا ءالى دە ءمۇمكىندىگى بار. ول ءۇشىن قارىمتا ويىندا ەكى دوپ ايىرماشىلىعىمەن جەڭىسكە جەتۋى كەرەك.
بەك تولەۋوۆ,
جۋرناليست
استانا
