– بۇل ءبىزدىڭ ماقسات-مۇراتىمىزدىڭ ستراتەگيالىق باعىتىن انىقتايتىن جاڭا باعدارلاما. ولاي بولسا, ءبىزدىڭ ءدال قازىر ماقساتىمىز انىق, مىندەتىمىز ايقىن. قازاقتىڭ قايراتكەر تۇلعاسى, جەرلەسىمىز ءابىش كەكىلباي ۇلى ءبىر ءسوزىندە: «ءداستۇر-ادەپپەن, ادەت-عۇرىپپەن, مىڭ جىلداپ قالىپتاسقان داعدىمەن كۇرەسۋ ەسۋاستىق. بىراق ونىڭ ءبارىن جاڭا جاعدايعا لايىقتاماي, جاڭعىرتپاي, سول قالپىندا ۇستانۋعا تىرىسۋ – ءوز اياعىڭدى ءوزىڭ تۇساپ, ءوز قولىڭدى ءوزىڭ كىسەندەۋمەن بارا-بار» دەگەن ەكەن. ەلباسىنىڭ بۇل ۇسىنعان باعىت-باعدارى حالقىمىزدى رۋحاني جاڭعىرۋعا جەتەلەرى انىق, دەگەن ايماق باسشىسى ەرالى توعجانوۆ ماقالاداعى باستى باعىتتارعا جەكە-جەكە توقتالىپ, ويلاردى جەرگىلىكتى جەردەگى مىسالدارمەن ساباقتاستىرا باياندادى.
ءبىلىم بەرۋ سالاسىنىڭ ارداگەرى ق.قاراجانوۆ, اقتاۋداعى ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتىنىڭ وقىتۋشىسى گ.ادامباەۆا, «قاراجامباسمۇناي» اق كىتاپحاناشىسى گ.نۇرقالي, اقىن ا.وتەگەنوۆ, جاس مۇعالىم م.اعىلاەۆ, «داعىستان» ەتنومادەني ءبىرلەستىگى توراعاسىنىڭ ورىنباسارى ز.قازيەۆا ماقالادا ايتىلعان ماسەلەلەرگە قاتىستى پىكىرلەرىن ورتاعا سالدى.
– ءبىز ەلباسى ۇسىنعان ماقالانى تالقىلامايمىز, كەرىسىنشە ونى جۇزەگە اسىرۋدىڭ ءادىس-تاسىلدەرىن قاراستىرامىز. ءاربىر ادام ەلباسىنىڭ «بولاشاققا باعدار: رۋحاني جاڭعىرۋ» ماقالاسىنان وزىنە قاجەتتى تۇستى تاڭداپ, «مەن وسىنى جۇزەگە اسىرسام قالاي بولادى؟» نەمەسە «مەنىڭ قولىمنان نە كەلەدى؟» دەپ ىرگەلى ىسكە ءوز ۇلەسىن قوسۋعا ۇمتىلۋى قاجەت. سەبەبى, بۇل – ءبىزدىڭ ەلىمىز, ءبىزدىڭ ۇلتىمىز جانە ءبىزدىڭ بولاشاعىمىز ءۇشىن قاجەتتى باستاما, قاجەتتى قۇندىلىقتار, – دەدى گ.نۇرقالي.
– ۇلتجاندىلىقتى ۇران ەتىپ وسكەن قازاقتىڭ ءبىر پەرزەنتى رەتىندە مەنى ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسى ەرەكشە شابىتتاندىردى. ونى وقىپ وتىرىپ, تۋعان حالقىمنىڭ ءتول تاريحىن, ءداستۇرىن, مادەنيەتىن ءدارىپتەۋ جولىندا مۋزەيدە جۇمىس جاساپ ءجۇرگەنىم – شىن مانىندە ءوز ۇلتىما جاساپ ءجۇرگەن قىزمەتىم ەكەنىن ءدال ءبۇگىنگىدەي تەرەڭ سەزىنبەگەن بولارمىن. بۇكىل ادامزاتتىڭ دامۋ تاريحى, تۇپتەپ كەلگەندە, مادەنيەت تاريحىنان باستالاتىنى ءسوزسىز. مۇنىڭ دالەلى – ەلباسىمىزدىڭ 2012 جىلعى جولداۋىنداعى «مادەنيەت پەن ءداستۇر – ۇلتتىڭ گەنەتيكالىق كودى» دەگەن قاناتتى ءسوزى. ادام بالاسى ءوزىنىڭ ءتول مادەنيەتىن تانىماي, الەم مادەنيەتىنە اياق باسا المايدى, تاريحتىڭ كوشىنە ىلەسە المايدى. ەندەشە, الدىمىزداعى جاھاندىق ءۇردىستە ءوز ۇلتتىق ەرەكشەلىگىمىزدى ساقتاپ قالۋدىڭ العىشارتتارىن ۇسىنعان وسى ماقالا ءاربىر قازاقستان ازاماتىنىڭ جۇرەگىنە جول تابادى دەپ ويلايمىن. ۇلتقا ادال قىزمەت ەتۋ, ونىڭ قۇندىلىقتارىنا مۇراگەر بولۋ – ونىڭ تاريحىنا, مادەنيەتىنە, بارشا رۋحاني بايلىقتارىنا مۇرالىق ەتۋ دەگەن ءسوز, – دەدى ماڭعىستاۋ وبلىستىق تاريحي-ءولكەتانۋ مۋزەيىنىڭ مامانى ن.كالكەنباەۆا.
جيىندى قورىتقان وبلىس اكىمى ە.توعجانوۆ ۇسىنىستاردى جۇزەگە اسىرۋ جولدارى قاراستىرىلاتىنىن ايتىپ, ماڭعىستاۋلىقتاردى ەلباسى ماقالاسىنا وراي ءوڭىردى, ەلدى دامىتۋ باعىتىندا بىرلەسە جۇمىس جاساۋعا شاقىردى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
