كەزدەسۋلەر بارىسىندا مادەنيەت, سپورت جانە تۋريزم سالاسىنداعى ەكى ەلدىڭ ءوزارا ىنتىماقتاستىعىن كەڭەيتۋ ماسەلەلەرى قاراستىرىلدى.
وزبەكستان رەسپۋبليكاسىنىڭ ءتۋريزمدى دامىتۋ بويىنشا مەملەكەتتىك كوميتەتىنىڭ توراعاسى انۆار شاراپوۆپەن كەزدەسۋ بارىسىندا قازاقستاندىق ۆەدومستۆا باسشىسى ءتۋريزمدى دامىتۋ قازاقستاننىڭ مەملەكەتتىك ساياساتىنداعى باسىم باعىتتاردىڭ ءبىرى ەكەندىگىن اتاپ ءوتتى.
كەزدەسۋ قاتىسۋشىلارى ستراتەگيالىق سەرىكتەستىك پەن تاتۋ كورشىلەستىك قاتىناستى نىعايتۋ ەكى ەلدىڭ تۋريستىك سالاسىنىڭ تۇراقتى دامۋىنا اسەر ەتەتىندىگىن اتاپ ءوتتى.
قازاقستاندىق ۆەدومستۆا باسشىسى قازاقستان مەن وزبەكستان شەكاراسىنداعى تۋريستەر اعىنىن ۇلعايتۋ ءۇشىن, ەكى جاڭا وتكىزۋ پۋنكتى اشىلىپ, قازىرگى ۇشەۋى – تاۋلىكتىك رەجيمگە كوشەتىندىگىن اتاپ ءوتتى.
ەكى ەل اراسىنداعى تەمىرجول جانە اۆتوبۋس باعىتتارىنىڭ اشىلۋى ەكى ەلگە دە تۋريستىك اعىننىڭ وسىمىنە اسەر ەتەدى. الماتى – تاشكەنت, تاشكەنت – الماتى باعىتى بويىنشا جۇردەك پويىزى ىسكە قوسىلدى. استانا – تاشكەنت قوسىمشا رەيستەرى اشىلدى. استانادان 6 رەيس كۇندەلىكتى قاتىنايتىن بولادى. ەكى ەلدىڭ تۋريستىك اعىنى ۆيزاسىز رەجيمنىڭ اسەرىنەن تۇراقتى دەڭگەيدە.
سوڭعى ۋاقىتتا وزبەكستانعا بارىپ-كەلەتىن قازاقستاندىقتاردىڭ سانى وسۋدە. وزبەكستاندىق تۋريستەردىڭ باسىم كوپشىلىگى بۋرابايعا, بالحاش پەن الاكول كولدەرىنە, «شىمبۇلاق» شاڭعى كۋرورت بازاسىنا, استانا مەن الماتى قالالارىنا كەلسە, قازاقستاندىق تۋريستەر تاشكەنت, سامارقاند, بۇحارا مەن حيۆانى تاڭدايدى. بۇل قالالار وزبەكستاننىڭ كونە تاريحي مۇراسى ءارى ۇلى جىبەك جولىنىڭ ماڭىزدى باعىتى بولىپ تابىلادى. وسى جىلى «استانا – ەكسپو2017» حالىقارالىق مامانداندىرىلعان كورمەسىن وتكىزۋگە بايلانىستى وزبەك تۋريستەرى تاراپىنان قىزىعۋشىلىق بايقالۋدا.
«ءبىزدىڭ بۇگىنگى كەزدەسۋىمىز – ءبىزدىڭ پرەزيدەنت شاۆكات ميرزيەەۆتىڭ استاناعا جاساعان تاريحي ساپارىنىڭ زاڭدى جالعاسى. قازاقستان كورمەدەگى قۇرمەتتى قوناعىمىز بولىپ تابىلادى, وسى ءىس-شارا بارىسىندا ەكى ەل اراسىنداعى تۋريزم سالاسىنداعى كەلىسىمگە قول قويىلاتىن بولادى. بۇل وبەكستان ەكونوميكاسىنىڭ دامۋىنا قوسىلاتىن ۇلكەن ۇلەس» - دەپ اتاپ ءوتتى انۆار شاراپوۆ.
ۆەدومستۆا باسشىلارى ۇلى جىبەك جولى بويىنشا ارالاس تۋرلاردى ىسكە اسىرۋ مۇمكىندىكتەرىن قاراستىردى. ەكى ەلدىڭ تۋريستىك الەۋەتىن ەسكەرسەك, تاراپتار تۋريزم سالاسىنداعى ىنتىماقتاستى دامىتۋ كەرەك دەگەن ورتاق پىكىرگە كەلدى.
ا. مۇحامەدي ۇلىنىڭ پىكىرىنشە, تۋريزم سالاسىنداعى ىنتىماقتاستىق ەكونوميكالىق قاتىناستاردىڭ نىعايتىپ قانا قويماي, مادەني, الەۋمەتتىك جانە ەكولوگويالىق سالالارداعى ەكى ەل ىنتىماقتاستىعىن دامىتۋعا اسەر ەتەدى.
وزبەكستان رەسپۋبليكاسىنىڭ مادەنيەت ءمينيسترى ماحمۋد مۋراتوۆپەن كەزدەسۋ بارىسىندا قازاقستاندىق ۆەدومستۆا باسشىسى تەاتر ونەرى, كينو جانە مادەني مۇرا سالاسىنداعى ىنتىماقتاستىقتارعا قاتىستى ماسەلەلەردى تالقىلادى.
وسى كۇنى ا. مۇحامەدي ۇلى وزبەكستان رەسپۋبليكاسىنىڭ دەنە شىنىقتىرۋ جانە سپورت جونىندەگى مەملەكەتتىك كوميتەتى توراعاسى ءرۇستام قۇربانوۆپەن كەزدەستى. سپورت سالاسىنداعى ىنتىماقتاستىقتى دامىتۋ ماسەلەلەرى بويىنشا پىكىر الماسۋ ءوتتى.
قازاقستان رەسپۋبليكاسىنىڭ وزبەكستان رەسپۋبليكاسىنداعى توتەنشە جانە وكىلەتتى ەلشىسى ەرىك وتەمباەۆ «مادەني-گۋمانيتارلىق ىنتىماقتاستىق قازاقستان مەن وزبەكستاننىڭ ءوزارا قارىم-قاتىناسىنىڭ ماڭىزدى ءبىر تارماعى بولىپ تابىلادى. ارىستانبەك مۇحامەدي ۇلىنىڭ ساپارى ەكسپو-2017 مامانداندىرىلعان كورمەسى اياسىندا عانا ەمەس, ءتۋريزمدى دامىتۋ شەڭبەرىندە ءبىزدىڭ ورتاق جوبالارعا جاڭا سەرپىن بەردى. ءبىز ورتا ازيا اۋماعىنداعى قوزعاۋشى كۇش بولىپ الاتىن تۋريستىك سالاداعى ءوسىمدى دامىتۋعا تىرىسامىز. وزبەكستاندا قازاقستاندىقتار ءۇشىن قىزىعۋشىلىق تۋدىراتىن بىرەگەي تاريحي جانە مادەني ەسكەرتكىشتەر بار. ال, وزبەك تۋريستەرى استانا, تۇركىستان, الماتى, بۋراباي سياقتى جەرلەرگە قىزىعۋشىلىق بىلدىرۋدە. سوندىقتان, جاڭا باعىتتاردى اشۋ تۋريستىك سالاداعى سەرپىن بولادى» - دەپ اتاپ ءوتتى.
