قىتايدىڭ Weibo الەۋمەتتىك جەلىسىندەگى اقپاراتتارعا سەنسەك, 12 ءساۋىر كۇنگى دايىندىق بارىسىندا ديماش وزىمەن بىرگە ءان شىرقايتىن قىتايلىق ارىپتەسى شاڭ ۆەنجەمەن مايكل دجەكسوننىڭ «Dangerous» سياقتى الەمدىك حيتكە اينالعان بىرنەشە اندەرىن قوسا شىرقاعان.
ايتا كەتەيىك, بايقاۋدى ۇيىمداستىرىپ وتىرعان حۋنان تەلەارناسىنىڭ باس عيماراتىنا انشىلەردىڭ ۇلكەن سۋرەتتەرى ءىلىنىپ, اقتىق باسەكەگە قىزۋ دايىندىق ءجۇرىپ جاتىر.
ەسكە سالا كەتەيىك, ديماش «Singer» بايقاۋىنداعى ەرەكشە تالانتىمەن كوزگە ءتۇسىپ, قىتايدا ەرەكشە تانىمالدىلىققا يە بولدى. جاس تالانت 23 ناۋرىز كۇنى شاڭحاي قالاسىندا 24-كەزەكتى «China Top music Awards» شاراسىنىڭ «ازيانىڭ ەڭ تانىمال ءانشىسى» (Best Asia popularsinger) نوميناتسياسى بويىنشا, 9 ءساۋىر كۇنى شەنچجەن قالاسىندا وتكەن «17th Top China Music Awards» شاراسىندا «حالىقارالىق دارەجەدەگى تانىمال ءانشى» نوميناتسياسى بويىنشا ماراپاتتالدى.
بۇل شارادا ديماشتىڭ ارىپتەسى جانە BGTalent (黑金经纪) پروديۋسەرلىك كومپانياسىنىڭ نەگىزىن قالاۋشى شاڭ ۆەنجە «جىلدىڭ ەڭ ۇزدىك ايەل ءانشىسى» اتانعان بولاتىن.
