«فلەشموبقا ۋنيۆەرسيتەتىمىزدەگى بارلىق فاكۋلتەتتەردىڭ ستۋدەنتتەرى قاتىسۋدا. ولار ديماشقا وسىلايشا وزدەرىنىڭ تىلەكتەرىن ءبىلدىرىپ, قولداۋ كورسەتكىسى كەلەدى. ديماشقا تابىس تىلەيمىز. قازاقستاننىڭ اتىن الەم ساحنالارىندا تانىتا بەرۋىنە تىلەكتەسپىز", دەدى قازاق ۇلتتىق ونەر ۋنيۆەرسيتەتىنىڭ پرورەكتورى تۇرار الىپباەۆ.
فلەشموب بارىسىندا جۋرناليستەردىڭ سۇراعىنا جاۋاپ بەرگەن مايرا ءىلياسوۆا ديماشتى قازاقستاندا باعالامادى دەگەن پىكىرمەن كەلىسپەيتىنىن ايتتى.
"قىتايدا حالىق كوپ. شەشۋشى كەزەڭدە نە بولاتىنىن ناقتى بولجاپ ايتا المايمىن. دەگەنمەن, ديماش كونكۋرسقا قاتىسقان ءبىرىنشى كۇننەن باستاپ ءوزىن كورسەتىپ, بۇكىل الەمدى باعىندىردى. ديماشتىڭ قىتايدا تانىلعانىنا جارنامانىڭ مىقتىلىعى دا اسەر ەتتى دەۋگە بولادى. ال قازاقستاندا ءبىز بۇعان دەيىن دە ديماشتىڭ ونەرىنە ءتانتى بولىپ, ونى ءتۇرلى كونتسەرتتەرگە قاتىستىرىپ جۇردىك. بىرنەشە جىل بۇرىن ديماش جاس بولعانىن دا ەسكەرۋ كەرەك. وسى ۋاقىتقا دەيىن ول ءوز-ءوزىن دامىتتى. ارينە, سىن پىكىرلەردى دە ەستىدىم. بىراق, ءانشىنى ءانشى, ءتىلشىنى ءتىلشى سىناعانى دۇرىس دەپ ويلايمىن", دەدى قازاقستاننىڭ حالىق ءارتىسى مايرا ءىلياسوۆا.
ەستەرىڭىزگە سالا كەتسەك, ديماش قۇدايبەرگەن 15 ءساۋىر كۇنى I am a singer كونكۋرسىنىڭ فينالىنا قاتىسادى. شەشۋشى سايىس تىكەلەي ەفيردەن كورسەتىلىپ, جەڭىمپازدى سول جەردە وتىرعان كورەرمەن انىقتايدى.
گۇلنۇر قۋانىشبەكقىزى,
"ەگەمەن قازاقستان"
سۋرەتتەردى تۇسىرگەن ورىنباي بالمۇرات,
"ەگەمەن قازاقستان"
