يننوۆاتسيالىق تەحنولوگيالار مەن روبوتتەحنيكاسىن جاساۋ ءۇشىن ءبىلىم جانە عىلىم مينيسترلىگى 2016-2017 وقۋ جىلىندا مەكتەپ باعدارلاماسىنا «روبوت تەحنيكا» ەلەكتيۆتى كۋرسىن ەنگىزگەنى بەلگىلى. ينفورماتيكا ءپانى مۇعالىمدەرى وسى باعىتتا بىلىكتىلىگىن ارتتىرۋ كۋرستارىن وتۋدە. بۇل اۋىل بالالارىنا وتە قاجەت. ەرتەڭ ۇلكەن قالالارعا وقۋعا بارعاندا, تەحنيكالىق بىلىمنەن كەنجە قالىپ قويمايدى.
اۋدان ورتالىعىنداعى شاكەن ايمانوۆ اتىنداعى مەكتەپ-ينتەرناتتا شالعايداعى اۋىلداردان كەلگەن وقۋشىلار ءبىلىم الادى. مەكتەپتە قازاق كينوسىنىڭ جارىق جۇلدىزى ش.ايمانوۆ اتىنداعى مۋزەي بار. ۇستازدار مەن وقۋشىلار شاكەن اتالارىنا تاعزىم جاساپ, بىلتىر كينو مايتالمانىنىڭ تۋعان جەرى ايمانبۇلاقتاعى قىستاۋعا بەلگىتاس قويدى. جىل سايىن رۋحاني-تانىمدىق شاكەن وقۋلارى ءوتىپ تۇرادى. مەكتەپتىڭ وقۋشىلارى ءشاكەن اتالارى سياقتى بولاشاقتا ءانشى, اكتەر, كينورەجيسسەر بولعىسى كەلەدى.
وسىنداي دارىندى جەتكىنشەكتەر ءوسىپ كەلە جاتقان مەكتەپ-ينتەرناتتا روبوت قۇراستىرۋعا ارنالعان تەحنيكالىق كابينەتتىڭ اشىلۋى وقۋشىلار ءۇشىن كۇتپەگەن قۋانىش بولدى. وبلىس ورتالىعىنداعى مەملەكەتتىك پەداگوگيكالىق ينستيتۋتتىڭ رەكتورى, حيميا عىلىمدارىنىڭ دوكتورى, ءوزى دە وسى باياناۋىل اۋىلىندا ءوسكەن التىنبەك نۇح ۇلى وقۋشىلاردىڭ ادەبيەت, ونەرمەن قاتار تەحنيكاعا, عىلىمعا دەگەن تانىم-ءتۇسىنىكتەرىن دامىتۋ ءۇشىن كابينەتتى اشۋعا دەمەۋشىلىك كورسەتىپتى.
– روبوتتى تەحنيكا ەلىمىزدە ەندى عانا دامىپ كەلەدى. ەندى مىنە, اۋىلدارعا جەتتى, ارنايى ۇيىرمە اشىلىپ, روبوت قۇراستىرۋ ءىسىن باستادىق, – دەيدى مەكتەپ ۇستازدارى.
ءانۋار جاراسباەۆ ەسىمدى وقۋشى روبوتتى پايدالانىپ, بولاشاقتا اۋىلعا كومەكتەسكىسى كەلەتىنىن, عاجايىپ «اندرويد» جاساعىسى كەلەتىنىن جەتكىزدى.
روبوت قۇراستىرۋعا ارنالعان كابينەت اشىلعان كۇنى-اق باياناۋىلدىق وقۋشىلار وزدەرىنىڭ العاشقى دايىندىقتارىن كورسەتتى. ينفورماتيكا ءپانىن دە جاقسى مەڭگەرگەندەرىن بايقاتتى. ياعني, روبوتتى ۇيالى تەلەفونمەن باسقارۋ ءادىسىن ءجانە بەلگىلى شەڭبەردەن كەدەرگىلەردى تاۋىپ شىعارۋ, سونداي-اق سينحروندى روبوتتاردى بيلەتۋدى وڭاي مەڭگەردى. ەندى جاڭا يننوۆاتسيالىق ءپان بالالاردىڭ شىعارماشىلىق قابىلەتتەرىن دامىتۋدى, بايلانىس ادىستەرىن جەتىلدىرۋدى, تەحنيكالىق ساۋاتتىلىقتى قالىپتاستىرادى. جالپى, ءبىلىم جۇيەسىندەگى نەگىزگى تاپسىرمالار اقپارات جيىنتىعى مەن ادىستەمەلەردىڭ توپتاماسىن مەڭگەرۋگە, سونداي-اق ويلاۋ تەحنولوگياسىن جەتىلدىرىپ, ءتاجىريبە ءجۇزىندە قولدانۋعا جول اشادى. وبلىس ورتالىعىنداعى مەكتەپتەردە «روبوت تەحنيكاسى» فاكۋلتاتيۆتىك كۋرستارى ءجۇرگىزىلۋدە. روبوت تەحنيكاسى كابينەتتەرىن جابدىقتاۋ ءۇشىن جەرگىلىكتى بيۋدجەتتەن 33,6 ميلليون تەڭگە بولىنگەن.
فاريدا بىقاي,
«ەگەمەن قازاقستان»
پاۆلودار وبلىسى,
باياناۋىل اۋدانى
