دۇنيە ءجۇزى تسيفرلىق تەحنولوگياعا كوشىپ جاتقاندا, كىتاپ جارمەڭكەسىن وتكىزىپ, ەلدى ءداستۇرلى وقۋ جۇيەسىنە شاقىرۋ اعىسقا قارسى جۇزگەنمەن بىردەي بولۋى مۇمكىن. الايدا, بۇل شارا باسپا سالاسىنىڭ ماماندارى دا ىزدەنىپ, كوشتەن قالماي كەلە جاتقانىنا كوز جەتكىزدى. تەك ءماتىنىنىڭ مازمۇندىلىعىمەن عانا ەمەس, سىرتقى بەزەندىرىلۋىمەن, زاماناۋي تەحنيكا مەن تەحنولوگيانى, ءتۇرلى ماتەريالداردى باسپا ونىمدەرىنە ورنىمەن قولدانا بىلگەننىڭ ارقاسىندا كىتاپ اتاۋلى ۇزاتىلار قىزداي بولىپ, ەرەكشە تارتىمدى دۇنيەگە اينالا تۇسكەنىن دە اڭعارۋ قيىن ەمەس ەدى.
قاتارى كەمىسە دە, تالعامى وسە تۇسكەن وقىرمان كورمە اياسىندا ءوز قاجەتتىلىگىنە وراي ءتۇرلى باسپا ونىمدەرىن ساتىپ الىپ جاتتى. مۇنىڭ ءوزى كىتاپتىڭ قۇندىلىقتار قاتارىنان تۇسپەيتىنىن دالەلدەي تۇسكەندەي ەدى.
جالپى, كورمەنى ۇيىمداستىرۋداعى نەگىزگى ماقسات اقپاراتتى تەحنولوگيا شارىقتاپ دامىپ جاتقان زاماندا تۇتىنۋشىعا ەلىمىزدىڭ باسپا ىسىندەگى جەتىستىكتەرىن, جارىق كورىپ جاتقان كىتاپتاردى كەڭىنەن تاراتۋعا ىقپال ەتۋ, وتاندىق كىتاپ باسپاسى سالاسىن نىعايتىپ, باسپا جۇمىسىنىڭ سۋبەكتىلەرى اراسىندا تاجىريبە الماسۋعا جاعداي جاساۋ بولعان. كوزدەلگەن ماقساتقا وراي, جينالعان قاۋىم شارا بارىسىندا ەلىمىزدىڭ عانا ەمەس, رەسەي, بەلارۋس, قىرعىزستان, ءۇندىستان, تۇركيا ەلدەرىنىڭ باسپا سالاسىنداعى جەتىستىكتەرىن تاماشالاپ, ءوز تالعامىنا ساي كىتاپتارعا قول جەتكىزدى.
بۇدان بولەك, كورمە اياسىندا «ۇلتتىڭ ساپالى ادام كاپيتالىن قالىپتاستىرۋداعى كىتاپحانالاردىڭ ءرولى» اتتى كونفەرەنتسيا, گرۋزيا, ۋكراينا, قازاقستاننىڭ ايگىلى گروسسمەيستەرلەرى قاتىسقان «حودجا ناسرەددين» اتتى ءى حالىقارالىق شاحمات ءتۋرنيرى جانە جازۋشى, كينودراماتۋرگ سماعۇل ەلۋبايمەن, ساياساتتانۋشى, «ۇلت تاعدىرى» قوعامدىق قوزعالىسىنىڭ جەتەكشىسى دوس كوشىممەن, «قازاقستاننىڭ رۋحاني مۇراسى» ۇلتتىق كوميتەتىنىڭ ءتورايىمى حانزادا ازىمحانوۆامەن كەزدەسۋلەر ۇيىمداستىرىلدى. سونىمەن قاتار, اقىن ا.احمەتبەك ۇلىنىڭ «كوك تۋدىڭ جەلبىرەگەنى», م.سارسەكەنىڭ قانىش ساتباەۆ تۋرالى كىتابىنىڭ, ل.بابكوۆانىڭ «مۋزىكا قۇپيالارى», تاعى باسقا كىتاپتاردىڭ تۇساۋكەسەرى بولىپ ءوتتى.
ءنازيرا سايلاۋقىزى
الماتى
