ءبىر قىزىعى, شەبەرلىك ءدارىسى سيپاتىندا وتكەن كەزدەسۋگە ۇلدار عانا ەمەس, كۇرەسپەن اينالىساتىن قىزدار دا كەلىپتى. جەتكىنشەكتەردىڭ بارلىعى دەرلىك الماتىداعى №15 بالالار مەن جاسوسپىرىمدەر سپورت مەكتەبىندە گرەك-ريم كۇرەسىمەن تەگىن اينالىسادى.
بۇل كەزدەسۋدىڭ باستاماشىسى دا ايگىلى بالۋانداردىڭ ءوزدەرى ەكەن. شەبەرلىك سىنىبىنا مۇرىندىق بولىپ جۇرگەن ءداۋلەت تۇرلىحانوۆتىڭ ويىنشا, بولاشاق وليمپيادا جۇلدەگەرلەرى وسى كەزدەسۋدىڭ ورتاسىندا وتىرۋى ءمۇمكىن.
سونىمەن, جاس سپورتشىلار ايگىلى بالۋانداردىڭ ءاربىر قيمىلىن قالت جىبەرمەي قاداعالاپ, قىزىعا باقىلادى. كاسىپقوي سپورتشىلار كۇرەس ونەرىنىڭ قىر-سىرىن ۇيرەتىپ قانا قويماي, بولاشاق چەمپيونداردىڭ قاتە ءادىستەرىن تۇزەپ, ولاردى ەپتىلىككە باۋلىدى.
– اتاقتى بالۋاندار جۇرگىزگەن شەبەرلىك سىنىبى بارىمىزگە ۇنادى. ولار بىزگە گرەك-ريم كۇرەسىنىڭ ءتۇرلى ءادىس-تاسىلدەرىن ۇيرەتتى. مەن بۇل سپورت سەكتسياسىنا كەلىپ ءجۇرگەنىمە ءتورت-اق كۇن بولدى. سونىڭ وزىندە ازداپ بولسا دا شىنىعىپ قالدىم, – دەيدى توعىز جاستاعى ەرنات سابىربەكوۆ.
بالۋاندارمەن وتكەن كەزدەسۋدەن كەيىن بالالاردىڭ بارلىعىنىڭ دا اسەرى وسىنداي.
بۇل بالالارعا قاراعاندا, بەس جىلدان بەرى كۇرەسپەن اينالىسىپ كەلە جاتقان مارينا زاكشەۆسكايا كادىمگىدەي كاسىپقوي سپورتشى. قازاقستاننىڭ ءتورت ءدۇركىن چەمپيونى, ەكى دۇركىن ازيا جۇلدەگەرى جانە الەم چەمپيوناتىنىڭ قولا ءجۇلدەسىن جەڭىپ العان. سوعان قاراماستان, مارينا دا كۇرەستىڭ ءوزى بۇرىن بايقاماعان ءمۇلدە باسقا ءادىستەرىن كورگەنىن ايتادى.
– قازىرگى كۇندەرى ءبىز حالىقارالىق جارىستارعا دايىندالىپ ءجۇرمىز. ال ءبىزدىڭ سۇيىكتى سپورتشىمىز داۋلەت تۇرلىحانوۆ ءوتكىزگەن شەبەرلىك ساعاتتارى بىزگە ءمىندەتتى تۇردە كومەكتەسەدى, – دەيدى مارينا.
ەڭ باستىسى, «حالىق ارەنا» مۇنان بىلايعى جەردە ءار 10 كۇن سايىن وسىنداي شەبەرلىك سىنىپتارىن ۇيىمداستىرىپ, وعان وليمپيادا چەمپيوندارىن, الەم ءجانە ەۋروپا چەمپيوناتتارىنىڭ جۇلدەگەرلەرىن, حالىقارالىق تۋرنيرلەردىڭ جەڭىمپازدارىن شاقىرىپ تۇرماق.
كەزدەسۋ سوڭىنا قاراي تانىمال سپورتشىلار بالالارمەن سۇحباتتاسىپ, اقىل-كەڭەستەرىن ايتىپ, ازيا مەن ۋنيۆەرسيادا تاعىلىمى جايلى باياندادى. سپورتتىڭ پايداسى تۋرالى ءسوز قوزعادى.
ايناش ەسالي,
«ەگەمەن قازاقستان»
الماتى
