وبلىستىق اۋىل شارۋاشىلىعى باسقارماسىنىڭ بەرگەن مالىمەتتەرىنە سۇيەنسەك, بيىل وڭىردەگى ەگىس القاپتارىنىڭ كولەمى 1321,5, ونىڭ ىشىندە ءداندى جانە ءداندى – بۇرشاق داقىلدارى 605, مالازىقتىق داقىلدار 298,6, كارتوپ 21,3, كوكونىس داقىلدارى 12,3 مىڭ گەكتاردى قۇرايدى دەپ جوسپارلانىپ وتىر. تۇقىم قورى دا جەتكىلىكتى. وبلىس بويىنشا ءداندى داقىلدار تۇقىمىنا – 95,2, مايلى داقىلدارعا – 4,3, ءبىر جىلدىق جانە كوپ جىلدىق شوپتەرگە − 1, كارتوپقا 59,8 مىڭ توننا سۇرانىس ءتۇسىپتى. ءداندى ءجانە ءداندى بۇرشاق داقىلدارى تۇقىمىنىڭ 68,5 مىڭ تونناسى تەكسەرۋگە جىبەرىلىپ, ونىڭ 64 مىڭ تونناسىنىڭ ساپاسى تەكسەرۋدەن ءوتىپ, تەكسەرىلگەن تۇقىمنىڭ 63,9 مىڭ تونناسى كونديتسيالى بولىپ شىعىپتى.
– كوكتەمگى ەگىس جۇمىستارىنا قاجەتتى جەر وڭدەۋ جانە ەگىستىك تەحنيكالارى جەتكىلىكتى. تراكتورلاردىڭ دايىندىعى – 92, جەر وڭدەۋ تەحنيكالارىنىڭ دايىندىعى – 95, ەگىستىك تەحنيكالارىنىڭ دايىندىعى 96 پايىزدى قۇرايدى. وبلىستاعى كوكتەمگى ەگىس جۇمىستارىن ءجۇرگىزۋگە 26,0 مىڭ توننا ديزەل وتىنى قاجەت. بۇگىنگى كۇنى ايماقتىڭ اۋىلشارۋاشىلىق قۇرىلىمدارىندا 9,9 مىڭ توننا جانار-جاعارماي بار. قازىرگى ۋاقىتتا ەنەرگەتيكا مينيسترلىگى پاۆلودار مۇناي – حيميا زاۋىتىنان 1 تونناسى 127 مىڭ تەڭگەدەن 25,0 مىڭ توننا ديزەل وتىنىن ءبولدى, ونىڭ ىشىندە ناۋرىز, ءساۋىر ايلارىنا 8 مىڭ جانە مامىر ايىنا 9 مىڭ توننا ديزەل وتىنى ءبولىندى, – دەيدى وبلىستىق اۋىل شارۋاشىلىعى باسقارماسىنىڭ باسشىسى قونىسباي تولەۋبەكوۆ.
باسقارما باسشىسى وڭىردەگى وسىمدىك شارۋاشىلىعىن قولداۋ ماقساتىندا بيىل وبلىستىق بيۋدجەتتەن 3 ملرد 160,2 ملن تەڭگە سۋبسيديا ءبولىنىپ وتىرعانىن, وبلىستىڭ اۋىلشارۋاشىلىق تاۋارىن وندىرۋشىلەر مەن مينەرالدى تىڭايتقىشتاردى ءوندىرۋشى وتاندىق زاۋىتتار اراسىندا 34 مىڭ توننا تىڭايتقىشقا 1,67 ملرد تەڭگە سۋبسيديا ءبولۋ جونىندە شارت جاسالعانىن ايتتى. سونىمەن قاتار, «اگرارلىق نەسيە كورپوراتسياسى» اق ارقىلى كوكتەمگى ەگىس جانە جيىن-تەرىم جۇمىستارىن ەكىنشى دەڭگەيلى بانك كەپىلدىگىمەن 3 پايىز جىلدىق ءمولشەرلەمەمەن تىكەلەي قارجىلاندىرۋ جانە كرەديتتىك سەرىكتەستىكتەردى 4 پايىز جىلدىق ءمولشەرلەمەمەن قارجىلاندىرۋ بويىنشا دا ءتيىستى جۇمىستاردىڭ باستالعانىن جەتكىزدى.
شارۋالار نە دەيدى؟ كوكتەمگى ەگىسكە ءازىر مە؟ ۇلان اۋدانى تاۆريا اۋىلىنداعى بيداي جانە كۇنباعىس وسىرۋمەن شۇعىلداناتىن, 5 مىڭ گەكتار القابى بار «يزۋمرۋد» جشس-ءنىڭ وكىلى ەۆگەني زەنوك بىلتىر وڭىرگە قىستىڭ ەرتە ءتۇسۋى سالدارىنان الا جازداي بەل جازباي وسىرگەن كۇنباعىسىنىڭ ءبىرشاما بولىگىنىڭ قار استىندا قالعانىن ايتادى.
– بيىل بىلتىرعىداي ەمەس, قار قالىڭ. سوندىقتان جەر ىلعالدى بولاتىن شىعار دەگەن ءۇمىتىمىز بار. كوكتەمگى دالا جۇمىستارىنا تەحنيكالارىمىز 100 پايىز دايىن دەۋگە بولادى. تەك اۋا-رايىنىڭ قاباعىنا قاراپ وتىرمىز. كۇن جىلىنسا, جەر دەگدىسە جۇمىسقا كىرىسۋگە دايىنبىز, − دەگەن ول جانار جاعارمايدىڭ جەتكىلىكتى ەكەندىگىن, ەگىس جۇمىستارىنا جاڭا تەحنولوگيالاردى قولدانىپ جاتقاندىقتارىن تىلگە تيەك ەتتى.
وبلىستىڭ شالعايىنداعى ءۇرجار, تارباعاتاي اۋداندارىنىڭ ديقاندارى دا سوقا-سايماندارىن دايارلاپ, جەر اياعىنىڭ كەڭىگەنىن كۇتىپ وتىر. ءۇرجار اۋداندىق كاسىپكەرلىك جانە اۋىل شارۋاشىلىعى ءبولىمىنىڭ باسشىسى ءتاۋىرجان شومانوۆ كوكتەمگى ەگىسكە اۋدان بويىنشا 7139 توننا جازدىق ءداندى داقىلدار تۇقىمى دايىندالىپ, ونىڭ 7308 تونناسى «قازاگرەكس» اق زەرتحاناسىندا تەكسەرىلۋدەن وتكىزىلگەنىن, مۇنىڭ 6687 تونناسى ەكىنشى, 621 تونناسى ءۇشىنشى كلاسقا جاتقىزىلعانىن ايتتى.
– ەگىستىك جەرلەردىڭ قۇنارىن ارتتىرۋعا ەرەكشە كوڭىل ءبولىپ وتىرمىز. بيىل 26 اۋىلشارۋاشىلىق قۇرىلىمى 4880 توننا مينەرالدى تىڭايتقىشتار ساتىپ الۋعا ءوتىنىم بەردى. قازىر اۋدانداعى شارۋا قوجالىقتارىنىڭ يەلىگىندە 2216 دانا اۋىلشارۋاشىلىق تراكتورلارى بار. ونىڭ 1824 داناسى دوڭعالاقتى, 258-ءى شىنجىر تاباندى تەحنيكالار. شارۋاشىلىقتاردىڭ ماشينا-تراكتور پاركىن جاڭالاۋ كۇن تارتىبىنەن تۇسكەن ەمەس. كوكتەمگى دالا جۇمىستارىن جۇرگىزۋگە اۋىلدىق وكرۋگتەردەن 4540 توننا ديزەل وتىنىنا تاپسىرىستار بەرىلدى. وبلىستىق اۋىل شارۋاشىلىعى باسقارماسىنان اۋدانعا 3060 توننا جەڭىلدەتىلگەن ديزەل وتىنى ءبولىندى, – دەيدى ءتاۋىرجان شومانوۆ.
تارباعاتاي اۋدانىنىڭ شارۋا قوجالىقتارى بيىل 791 گەكتار جەرگە بيداي, 768 گەكتارعا ارپا, 360 گەكتارعا كوكونىس, 430 گەكتارعا قىتاي بۇرشاعىن, 160 گەكتارعا جۇگەرى, 1000 گەكتارعا كوپجىلدىق ءشوپ ەگۋدى جوسپارلاپ وتىر. اعىمداعى ەگىس ناۋقانىنا 4800 توننا جانار-جاعارماي, 68 توننا تىڭايتقىش ءازىرلەنگەن. 106 «بەلارۋس», 30 «دت» تراكتورى, 40 تۇقىم سەپكىش تەحنيكا ساقاداي ساي.
ازامات قاسىم,
«ەگەمەن قازاقستان»
شىعىس قازاقستان وبلىسى
