جيىنعا توراعالىق ەتكەن ايماق باسشىسى ەرلان قوشانوۆ العى سوزىندە: – وبلىستىڭ ميلليونداعان جۇرتشىلىعى, ءاربىر تۇرعىنى – پرەزيدەنتتىڭ بارلىق ستراتەگيالىق باستامالارىن جۇزەگە اسىرۋداعى تىرەگى ەكەنىن ەرەكشە سەزىنەدى. سوندىقتان ءبىز جەدەل اكتيۆ جينالىسىن شاقىرىپ, حالىققا, جەرگىلىكتى بيلىككە, بۇقاراعا – ەلباسىمىز نۇرسۇلتان ءابىش ۇلى نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنىڭ ماڭىزىن ءتۇسىندىرۋ ءۇشىن جينالدىق. بۇگىن جاريالانعان ماقالا – ەلباسىنىڭ «قازاقستاننىڭ ءۇشىنشى جاڭعىرۋى» جولداۋىمەن ۇندەستىك تاۋىپ, ءبىزدىڭ الدىمىزدا رۋحاني دامۋ, جاھاندىق جاڭعىرۋ جولىندا ۇلكەن ءارى تاريحي مىندەتتەر قويىپ وتىر, – دەدى.
العاشقى ءسوزدى قازاقستان جازۋشىلار وداعىنىڭ قاراعاندى وبلىستىق فيليالىنىڭ ديرەكتورى, بەلگىلى اقىن سەرىك اقسۇڭقار ۇلى سويلەدى. – ەلباسى بۇل ماقالاسى ارقىلى دۇنيە ءجۇزىندەگى ەڭ دامىعان وتىز ەلدىڭ قاتارىنا قوسىلۋعا ۇمتىلعان قازاقتىڭ ءسوز قولدانىسىنا «ۇلتتىق سانا» دەگەن تىركەستى ەنگىزدى. ءۇش ءجۇز جىلدىق بوداندىق ەتىمىزدەن ءوتىپ سۇيەگىمىزگە جەتكەن تۇستا ەر ماحامبەت پەن مۇزارت مۇقاعاليدىڭ رۋحى ارقامىزعا قايتا قونعانداي بولدى. بۇل ماقالا ءىرى وقيعالاردىڭ باستاۋى بولادى ءالى, – دەدى.
سونىمەن قاتار, ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ ساياساتتانۋ جانە الەۋمەتتانۋ كافەدراسىنىڭ مەڭگەرۋشىسى, ساياسي عىلىمدار كانديداتى, دوتسەنت داستان كوشەرباەۆ ءوز ويىن ورتاعا سالىپ, ماقالادا كورسەتىلگەن ءار رەفورماعا بايلانىستى پىكىر ءبىلدىردى.
اتالمىش باسقوسۋدان قاراعاندىلىق بەلسەندى جاستار دا قالىس قالعان جوق. قاراعاندى وبلىسى جاستار رەسۋرستىق ورتالىعىنىڭ اقپاراتتى قامتاماسىز ەتۋ جانە الەۋمەتتىك تەحنولوگيا ءبولىمىنىڭ باسشىسى ەرجان حاميتوۆ ءمىنبەرگە شىعىپ: – ەلباسى اتاپ ايتقانداي: مەملەكەت پەن ۇلت قۇرىشتان قۇيىلىپ, قاتىپ قالعان دۇنيە ەمەس, ۇنەمى دامىپ وتىراتىن ءتىرى اعزا ىسپەتتى. ماقالاداعى «جاڭا جاعدايدا جاڭعىرۋعا دەگەن ىشكى ۇمتىلىس – ءبىزدىڭ دامۋىمىزدىڭ ەڭ باستى قاعيداسى. ءومىر ءسۇرۋ ءۇشىن وزگەرە ءبىلۋ كەرەك. وعان كونبەگەندەر تاريحتىڭ شاڭىنا كومىلىپ قالا بەرەدى» دەگەن ءسوز – ءدال جاعدايدى ءدوپ باسقان قوعام دياگنوزى. قاراعاندى وبلىسىنىڭ ءاربىر تۇرعىنى جاڭعىرۋ پروتسەسىنە ءوز ۇلەسىن قوسۋعا دايىن دەگەن سەنىمدەمىن, – دەپ جينالعان قاۋىمدى جىگەرلەندىرە جالىندى ءسوز ايتتى.
بايانداما جاساۋشىلاردىڭ قاتارىندا وبلىستىق ءماسليحاتتىڭ دەپۋتاتتارى, قازاقستان حالقى اسسامبلەياسىنىڭ وكىلدەرى دە بولدى. قايسىسى بولسىن, بۇگىنگى كۇننىڭ باستى نازارىنداعى ماڭىزدى ماسەلەنى جان-جاقتى تالقىلاۋدا ىشكى ويلارىن ىركىپ قالمادى.
«ماڭگىلىك ەل» يدەياسىنىڭ مازمۇنىن جان-جاقتى ايقىنداي ءتۇسكەن بۇل ماقالا شىن مانىندە ەل دامۋىنىڭ رۋحاني باعىتىنداعى باستى تەمىرقازىق بولۋى شارت.
بۇل كەلەلى كەڭەستىڭ قورىتىندى ورتاق پىكىرى بولدى.
ميراس اسان,
«ەگەمەن قازاقستان»
قاراعاندى وبلىسى
