كەزدەسۋ بارىسىندا قازاقستان پرەزيدەنتىنە مينيسترلىكتىڭ قازىرگى قىزمەتى, قورعانىسقا ارنالعان مەملەكەتتىك تاپسىرىستى قالىپتاستىرۋ جانە اقپاراتتىق قاۋىپسىزدىك سالاسىندا اتقارىلىپ جاتقان جۇمىستار, سونداي-اق سالانى ودان ءارى دامىتۋ جوسپارلارى جونىندە باياندالدى.
نۇرسۇلتان نازارباەۆ مينيسترلىكتىڭ الدىنا قويىلعان قورعانىس ونەركاسىبى دەڭگەيىن كوتەرۋ جانە ونى تەحنولوگيالىق تۇرعىدان جاڭعىرتۋ مىندەتتەرىنىڭ ساپالى ىسكە اسىرىلۋىنا قاتىستى ماسەلەلەرگە نازار اۋداردى. ب.اتامقۇلوۆ مەملەكەت باسشىسىنا قورعانىسقا ارنالعان مەملەكەتتىك تاپسىرىستى قالىپتاستىرۋدىڭ قازىرگى الگوريتمىن جەتىلدىرۋ ۇدەرىسى, سونداي-اق «قازاقستاننىڭ كيبەرقالقانى» تۇجىرىمداماسىن ازىرلەۋ بارىسى تۋرالى مالىمدەدى.
بۇدان بولەك, قورعانىس جانە اەروعارىش ونەركاسىبى ءمينيسترى ەلباسىعا بيىل استانا قالاسىنداعى بىرەگەي كاسىپورىن - عارىش اپپاراتتارىن قۇراستىرۋ جانە سىناقتان وتكىزۋ كەشەنى قۇرىلىسىنىڭ اياقتالاتىنىن حابارلادى. قازاقستاندىق ماماندار سپۋتنيك جاساۋ بارىسىندا جوبالاۋدان قۇراستىرۋعا جانە سىناق وتكىزۋگە دەيىنگى جۇمىستاردىڭ بارىنە قاتىساتىن بولادى.
قازاقستان پرەزيدەنتى كەزدەسۋ قورىتىندىسى بويىنشا بىرقاتار تاپسىرما بەردى.
