– ابزال, اڭگىمەمىزدى ءوزىڭىز ويناپ جۇرگەن «استانا» كلۋبىنان باستاساق. جاڭا ماۋسىم. كوماندا سوڭعى ءۇش جىلدا چەمپيوندىق اتاقتى ەشكىمگە بەرمەي كەلەدى. ەۋروپا ارەناسىنا دا شىعىپ ءجۇر. بيىل الدارىڭىزعا قانداي ماقسات قويدىڭىزدار؟
– وتكەن جىل ءبىز ءۇشىن وتە تابىستى ماۋسىم بولدى دەپ ايتا الامىن. ەل چەمپيونى اتاندىق, كۋبوكقا دا قول جەتكىزدىك, ەۋروپا ليگاسىنىڭ توپتىق كەزەڭىندە سىنعا تۇستىك. بۇل ماۋسىمدى وتكەن جىلعىدان دا ءساتتى اياقتايمىز دەپ ۇمىتتەنەمىن. ەۋروپا ارەناسىنا تاعى دا شىعۋدى كوزدەپ وتىرمىز. ەگەر ماقساتىمىزعا جەتىپ جاتساق, توپتىق كەزەڭمەن شەكتەلىپ قالماي, پلەي-وففقا شىعىپ, جانكۇيەرلەرىمىزدى قۋانتقىمىز كەلەدى.
– بيىل كوماندادان تاڭات نوسەرباەۆ, اگيم يبرايمي, روحەر كانياس, دجوردجە دەسپوتوۆيچ, اسحات تاعىبەرگەن سياقتى بىلىكتى ويىنشىلار كەتتى. قاي فۋتبولشىنىڭ كوماندادا جوقتىعى بىلىنەدى؟ جاڭا كەلگەن فۋتبولشىلار ولاردىڭ ورنىن باسا الىپ جاتىر ما؟
– شىنى كەرەك, العاشىندا كوماندادان كەتكەن فۋتبولشىلاردىڭ ورنى ويسىراپ تۇردى. ماسەلەن, تاڭات باپكەرىمىزدەن كەيىن جىگەر بەرەتىن كاپيتان ەدى. روحەر ورتالىق تۇستاعى مىندەتىن جوعارى دەڭگەيدە اتقاراتىن. ارقايسىسى ءوز پوزيتسياسىنىڭ مىقتىسى بولاتىن. ولار كەتكەننەن كەيىن ءبىراز مىندەت بىزگە جۇكتەلدى. كانياستىڭ پوزيتسياسىنا بەكىتىلگەن كەزدەرىم دە بولدى.
ال قاتارىمىزعا جاڭادان قوسىلعان جىگىتتەر جاتتىعۋ كەزىندە وزدەرىن جاقسى قىرىنان كورسەتىپ ءجۇر. جاڭا ورتاعا كەلە سالىپ بىردەن ءسىڭىسىپ كەتۋ قيىن عوي. ماۋسىم ەندى باستالدى. الداعى ويىنداردا ولاردىڭ ۇلكەن كومەگى تيەدى دەپ سەنەمىن.
– ءبىر سوزىڭىزدە شابۋىل شەبىندە ويناعىم كەلەدى دەگەن ەدىڭىز. بۇل ويىڭىزدى ستانيمير ستويلوۆقا ءبىلدىرىپ كوردىڭىز بە؟ مۇمكىن, «استاناعا» ناعىز قاجەت شابۋىلشى ءوزىڭىز شىعارسىز؟
– بالا كۇنىمنەن شابۋىلشى بولۋدى ارماندايتىنمىن. وسىعان دەيىن بىرنەشە پوزيتسيادا ويناپ كوردىم. بىراق ۋاقىت وتە كەلە قورعاۋشى رەتىندە جاقسى قىرىمنان كورىنە باستاعان سياقتىمىن. باپكەرلەرىم دە سونى بايقاعان بولۋى كەرەك. ونىڭ ۇستىنە «استانادا» شابۋىل شەبىنە جاۋاپتى جىگىتتەر جەتەرلىك. مەن مۇندا قورعانىسقا قاجەتپىن. سوندىقتان, باپكەرىمە بۇل تۋرالى ايتقان جوقپىن.
– بىرەر اي بۇرىن نەمانيا ماكسيموۆيچتىڭ «ۆالەنسياعا» اۋىساتىنى بەلگىلى بولدى. كومانداداعى اسا مىقتى ويىنشىنىڭ يسپانياعا كەتەتىنى ۇجىمعا قالاي اسەر ەتتى؟
– ماكسيموۆيچتىڭ ءدال وسىنداي ۇلكەن كلۋبقا كەتىپ بارا جاتقانىنا قۋانىپ تا, قىزىعىپ تا تۇرمىن. ەكىنشى جاعىنان قيمايمىن دا. قازاقستاننان الەمنىڭ الپاۋىت كوماندالارىنا اۋىسۋ وڭاي ەمەس. بىراق نەمانيا بىزگە ەۋروپانىڭ توپ كلۋبتارىندا ويناۋ مۇمكىن ەكەنىن كورسەتتى. ەرەكشە ءبىر تالپىنىس بەردى. ۇجىمدا ءاربىر جىگىت ەۋروپانىڭ ۇلكەن چەمپيوناتتارىنا اۋىسۋدى ارماندايتىنى انىق. ارىپتەسىمە جاڭا كومانداسىندا ساتتىلىك, ۇلكەن جەتىستىكتەر تىلەيمىن.
– جاقىندا قازاقستان ۇلتتىق قۇراماسىنا جاڭا باپكەر تاعايىندالدى. بىراق ونىڭ قول استىندا وتكىزگەن ەكى ويىندا دا قۇرامامىز ەسە جىبەردى. قۇرامانىڭ ناتيجەسى قاشان جاقسارادى دەپ ويلايسىز؟
– الەمنىڭ ۇزدىكتەرى جينالعان دودالارعا قاتىسۋدى, سولارمەن تەڭ دارەجەدە ويناۋدى ءبارىمىز ارمانداپ كەلەمىز. الاڭدا باپكەرىمىزدىڭ نۇسقاۋلارىن تولىقتاي ورىندايمىز. ءبارى جوسپار بويىنشا ءجۇرىپ جاتقانداي بولادى. گول دا سوعامىز, ءتىپتى العاش ەسەپ اشامىز. قاۋىپتى شابۋىلداردى توقتاتا بىلەمىز. كوبىنە ساتتىلىك جەتىسپەي جاتىر. الداعى ۋاقىتتا قاتەلىكتەرمەن كوپ جۇمىس ىستەپ, جاقسى ناتيجە كورسەتۋگە تىرىسامىز.
– ارمەنيامەن ويىندى مىسالعا الايىقشى. سەرگەي مالىيدىڭ 64-مينۋتتا الاڭنان قۋىلۋى جەڭىلىسكە سەبەپ بولدى دەپ ويلايسىز با؟
– وزدەرىڭىز كورگەندەي, بۇل ماتچتىڭ العاشقى تايمىندا ءجوندى ويناي الماساق تا, كەلەسى بولىكتە ءجيى شابۋىلدارعا شىقتىق. گول سوعاتىن مۇمكىندىكتەرىمىز دە بولدى. بىراق بىزگە جەتىسپەگەنى تاعى دا سول ساتتىلىك. ال جەڭىلىسكە تەك مالىيدى كىنالاۋ دۇرىس دەپ ويلامايمىن. بۇل ناتيجەگە بۇكىل كوماندا جاۋاپتى. وزگە جىگىتتەر ءوز مۇمكىندىكتەرىن ءجوندى پايدالانعاندا جاعداي باسقا باعىتتا ءوربيتىن بە ەدى؟
– كەي لەگيونەرلەر ەلىمىزدىڭ ستاديوندارىن سىناپ, جاساندى الاڭدار ساپاسىنىڭ تومەندىگى تۋرالى ايتادى. وسىعان قاتىستى قانداي پىكىر بىلدىرەسىز؟
– جاساندى الاڭدا ويناۋدىڭ قيىندىعىن تۇسىنەمىن. بىراق قازىرگى اۋا رايىن ەسكەرسەك, بىزگە سينتەتيكالىق الاڭ تيىمدىرەك دەپ ويلايمىن. ارتىق شىعىندى, كۇتىپ-باپتاۋدى تالاپ ەتپەيدى. دەگەنمەن, كەيبىر جاساندى الاڭدار بار, ساپاسى وتە تومەن. ول جەردە جاراقات الىپ قالۋ قاۋپى دە جوعارى. ال تابيعي گازوننىڭ ورنى مۇلدەم بولەك. مەنىڭشە, قازاق فۋتبولىنىڭ ءوسىپ-وركەندەۋى, الەمدىك ارەنالارعا شىعۋى ءۇشىن الاڭدار نەعۇرلىم ساپالى ءارى تابيعي بولۋى كەرەك.
– جاقىندا گراناتكين تۋرنيرىندە ەركەبۇلان سەيداحمەت ەسىمدى جاس ويىنشىمىز كوزگە ءتۇستى. رەسەيدىڭ عانا ەمەس يسپانيانىڭ دا ماماندارى قازىر ونى ءجىتى باقىلاپ وتىر. ەركەبۇلانعا قانداي اقىل-كەڭەس ايتاسىز؟
– گراناتكين تۋرنيرىندە ەركەبۇلان «ۇزدىك شابۋىلشى» اتانعانىن بىلەمىن. مۇنداي تالانتتاردى سكاۋتتار بىردەن نازاردا ۇستايتىنى بەلگىلى. «زەنيت» كومانداسىمەن بىرگە يتاليادا «Viareggio Cup» تۋرنيرىنە قاتىسقانىن ەستىدىم. ءبىر ويىندا ءتورت بىردەي گول سوعىپتى. ەلىمىزدەن وسىنداي دارىندى ويىنشىلاردىڭ شىعىپ جاتقانىنا قۋانامىن. بۇل قازاق فۋتبولىنىڭ دامىپ جاتقانىنىڭ ايقىن بەلگىسى.
ەندى ەركەبۇلان وسى جەتىستىگىنە مارقايىپ قالماي, تىنباي جاتتىعۋى قاجەت. باسقا نارسەنى ىسىرىپ تاستاپ, تەك فۋتبولدى ويلاعانى ءجون. ول ءالى جاس. ۇلكەن الاڭداعى ءومىرى ەندى باستالدى. تاجىريبە جيناۋى قاجەت. ەرەسەكتەر فۋتبولىنا ءسىڭىپ كەتۋ قيىنداۋ. ەگەر تىنباي دايىندالار بولسا, بولاشاعىنان ۇلكەن ءۇمىت كۇتۋگە بولادى. قازاقتى الەمگە تانىتاتىن فۋتبولشىلاردىڭ ءبىرى بولادى دەپ سەنىم ارتامىن. وسىنى تەك ەركەبۇلانعا ەمەس فۋتبولعا قادام باسقان ىنىلەرىمنىڭ بارىنە ايتقىم كەلەدى.
– ابزال, ومىردەگى باستى ارمانىڭىز قانداي؟
– اۋەلى, بيىلعى باستى جوسپارىمدى ايتايىن. جاڭا ماۋسىمدى ويداعىداي اياقتاپ, ۇلتتىق قۇراما ساپىندا, «استانامەن» بىرگە ەۋروپا تۋرنيرلەرىندە ءساتتى ويناپ, كوزگە تۇسكىم كەلەدى. ال نەگىزگى ارمانىم – الەمنىڭ الپاۋىت ۇجىمدارىنىڭ بىرىندە ويناۋ. انگليا, يسپانيا نەمەسە رەسەي چەمپيوناتىندا ويناعىم كەلەدى. ءالى جاسپىن, مۇمكىندىگىم دە كوپ. وسى ماقساتىما جەتۋ ءۇشىن تىرىسىپ ءجۇرمىن. قالعانىن ۋاقىت كورسەتە جاتار.
– سۇحباتىڭىزعا كوپ راحمەت!
ايان ءابدۋالي,
«ەگەمەن قازاقستان»
