قوعام تىنىشتىعىن كۇزەتۋدە قىرشىن كەتكەن بوزداقتىڭ رۋحى كونە تاراز شاھارىندا تاعى ءبىر شارىقتادى. 3 ءساۋىر باتىردىڭ تۋعان كۇنىنە وراي داڭق الاڭىندا ميتينگ ۇيىمداستىرىلىپ, وعان وبلىس جانە قالا تۇرعىندارى, وبلىستىق بالالار مەن جاسوسپىرىمدەر «پوليتسيا اكادەمياسى» ورتالىعىنىڭ كۋرسانتتارى, سونداي-اق «ايبىن» اسكەري-پاتريوتتىق كلۋبىنىڭ مۇشەلەرى قاتىستى. جينالعان كوپشىلىك اۋەلى حالىق قاhارمانى عازيز بايتاسوۆتى ءبىر مينۋت ۇنسىزدىكپەن ەسكە الىپ, رۋحىنا تاعزىم ەتتى. سودان كەيىن تاراز قالاسىنىڭ اكىمى رۇستەم داۋلەت, وبلىستىق ىشكى ىستەر دەپارتامەنتىنىڭ باستىعى تىلەگەن ماتكەنوۆ جانە عازيز بايتاسوۆتىڭ جۇبايى گۇلجامال تاجيەۆا باستاعان بىرقاتار ازاماتتار داڭق الاڭىندا ورناتىلعان باتىردىڭ ەسكەرتكىشىنە گۇل شوقتارىن قويدى.
ءوز سوزىندە پوليتسيا گەنەرال-مايورى تىلەگەن سوۆەت ۇلى عازيز بايتاسوۆتىڭ ەرلىگى ءاردايىم جاس ۇرپاققا ۇلگى ەكەنىن, ەر ەسىمىنىڭ ەشقاشان ۇمىتىلمايتىنىن اتاپ ءوتتى. ال باتىردىڭ جارى گۇلجامال تاجيەۆا عازيز بايتاسوۆتىڭ ەرلىگىنە قۇرمەت كورسەتىپ وتىرعان ازاماتتارعا العىسىن ءبىلدىردى. «عازيز بۇگىن ورتامىزدا بولعاندا 46 جاسقا تولاتىن ەدى. بىراق ونىڭ جاساعان ەرلىگى وزىنەن كەيىنگى پوليتسيا قىزمەتكەرلەرىنە ۇلگى بولدى. ەرلىك ەشقاشان ۇمىتىلمايدى. ول ومىرىمەن ەرتە قوشتاسسا دا, وتانىن, حالقىن, جەرلەستەرىن قورعادى», دەدى گۇلجامال ماحامبەتقىزى.
ايتا كەتەيىك, تاراز قالاسىندا ورنالاسقان ورتا جانە جوعارى وقۋ ورىندارىندا, جالپى ءبىلىم بەرەتىن ورتا مەكتەپتەردە حالىق قاھارمانى عازيز بايتاسوۆتىڭ ەرلىگىن ناسيحاتتاۋعا ارنالعان «ەرلىك ساعاتتارى» وتكىزىلۋدە. بۇل باستاما جاستاردى پاتريوتتىق رۋحتا تاربيەلەپ, تۋعان ەل تۇلعالارىن تەرەڭىرەك بىلۋگە باۋليدى.
حاميت ەسامان,
«ەگەمەن قازاقستان»
جامبىل وبلىسى
