القالى جيىندا سىرتقى ىستەر مينيسترلەرى قازاقسان پرەزيدەنتى ن.نازارباەۆتىڭ 2015 جىلى بۋرابايدا وتكەن تمد ءسامميتى كەزىندە ۇسىنعان ۇيىمدى زاماناۋي احۋالعا بەيىمدەۋ تۋرالى باستاماسىن دامىتۋعا قاتىستى بىرقاتار ۋاعدالاستىققا قول جەتكىزدى. اتاپ ايتار بولساق, تمد ەكونوميكالىق سوتىن رەفورمالاۋ ماسەلەسى ماقۇلداندى. ەندىگى ۋاقىتتا بۇل ورگان وڭتايلاندىرىلعان فورماتتاعى «ad hoc» پرينتسيپى بويىنشا جۇمىس ىستەيدى. ياعني, بۇل پرينتسيپ بويىنشا سۋديالار تۇراقتى ەمەس نەگىزدە جۇمىسقا كوشەدى, اپپارات سانى ايتارلىقتاي قىسقارادى, ناتيجەسىندە وعان جۇمسالاتىن بيۋدجەت شىعىندارى دا ۇنەمدەلەدى دەگەن ءسوز.
دەلەگاتسيالار باسشىلارى قۇقىق قورعاۋ قىزمەتى سالاسىنداعى بىرقاتار قۇجاتتاردى ماقۇلدادى. مينيسترلەر ماقۇلداعان قۇقىقتىق, ۇيىمداستىرۋ جانە اقپاراتتىق-تالداۋ ماسەلەلەرىن جۇزەگە اسىرۋ ءجونىندەگى شارالار كەشەنى تمد-عا مۇشە ەلدەردىڭ ءوزارا قارىم-قاتىناسىن كۇشەيتە تۇسۋگە باعىتتالعان.
قالىپتاسقان ءداستۇر بويىنشا كەڭەس بارىسىندا مادەني-گۋمانيتارلىق ماسەلەلەرگە كوڭىل اۋدارىلدى. «دوستاستىقتىڭ مادەني استانالارى» باعدارلاماسىنىڭ جوباسىن تاراپتار ءبىراۋىزدان قولداعانىن ايتا كەتۋ كەرەك. مۇنداي مارتەبەنى 2018 جىلى ارمەنياداعى گوريس قالاسى, 2019 جىلى بەلارۋستىڭ برەست قالاسى يەلەنەتىنى بەلگىلى. قازاقستان تاراپى 2020 جىلى دوستاستىقتىڭ مادەني استاناسى مارتەبەسىن شىمكەنت شاھارىنا بەرۋدى ۇسىندى. وسى ورايدا, استانا قالاسى – 2012 جىلى, الماتى 2014 جىلى دوستاستىقتىڭ مادەني استاناسى اتانعانىن ايتا كەتەيىك.
شاعىن فورماتتا وتكەن كەزدەسۋلەر اياسىندا سىرتقى ساياسات ۆەدومستۆولارىنىڭ باسشىلارى ايماقتىق جانە جاھاندىق كۇن تارتىبىندە تۇرعان وزەكتى ماسەلەلەردى تالقىلادى. قايرات ءابدىراحمانوۆ ارىپتەستەرىنە ەلىمىزدىڭ بۇۇ قاۋىپسىزدىك كەڭەسىنە مۇشە رەتىندەگى العاشقى 100 كۇن ءىشىندە اتقارعان جۇمىس بارىسى تۋرالى, ەلباسى ن.نازارباەۆتىڭ وسى دۇنيەجۇزىلىك ۇيىمنىڭ جوعارى ورگاندارىنىڭ مۇشەلەرىنە ارناعان مالىمدەمەسىندە كورسەتىلگەن باسىمدىقتار تۋرالى بايانداپ بەردى.
وتىرىس قورىتىندىسى بويىنشا تمد سىرتقى ىستەر مينيسترلەرىنىڭ كەڭەسى حريستيان, مۇسىلمان جانە باسقا دا كونفەسسيالار وكىلدەرىنە قاتىستى كەمسىتۋشىلىككە جانە توزىمسىزدىككە جول بەرمەۋ تۋرالى مالىمدەمە قابىلدادى. بۇل قۇجاتتا ەلوردادا وتەتىن الەمدىك جانە ءداستۇرلى دىندەر كوشباسشىلارى سەزدەرىنىڭ ەرەكشە ماڭىزعا يە ەكەندىگى كورسەتىلگەن.
قايرات ءابدىراحمانوۆتىڭ شارا بارىسىندا قىرعىزستاندىق ارىپتەسى ەرلان ابدىلداەۆپەن كەلىسسوز جۇرگىزگەنىن ايتا كەتەيىك. بۇل كەزدەسۋ 1997 جىلدىڭ ءساۋىر ايىندا الماتىدا قول قويىلعان قازاقستان مەن قىرعىزستاننىڭ ماڭگىلىك دوستىعى تۋرالى شارتتىڭ 20 جىلدىعىمەن تۇسپا-تۇس ءوتتى. ەكى تاراپ اتالعان قۇجاتتا كورىنىس تاپقان قۇندىلىقتاردى نەگىزگە الىپ, ءوزارا قارىم-قاتىناستى ودان ءارى نىعايتا تۇسۋگە مۇددەلى ەكەندىكتەرىن جەتكىزدى.
ق.ءابدىراحمانوۆ تاجىكستاننىڭ سىرتقى ىستەر ءمينيسترى سيرودجيددين اسلوۆپەن دە كەزدەسۋ وتكىزدى.
وسى كۇنى قازاقستان سىرتقى ساياسات ۆەدومستۆوسىنىڭ باسشىسى ورتالىق ازيا مەملەكەتتەرى سىرتقى ىستەر مينيسترلەرىنىڭ كەزەكتى كەزدەسۋىنە دە قاتىسىپ, ايماقتاعى ىنتىماقتاستىقتى دامىتۋدىڭ باسىم باعىتتارى, حالىقارالىق جانە ايماقتىق ۇيىمدار اياسىندا ءوزارا ارىپتەستىكتى نىعايتۋ ماسەلەلەرى توڭىرەگىندە پىكىر الماستى.
«ەگەمەن-اقپارات»
