ەندىگى جەردە «قازاقفيلم» كينوستۋدياسىندا «ەڭ سۇلۋ قىز» اتتى كوركەم ءفيلمنىڭ ءتۇسىرىلىم الدىنداعى جۇمىستارى باستالدى. بۇل كارتينا – رەجيسسەر قاناعات ءمۇستافيننىڭ «16 قىز» كومەديالىق ءفيلمىنىڭ جالعاسى. وتكەن جىلى «16 قىز» ءفيلمى پروكاتتا ەڭ تابىستى كارتينالار قاتارىنان تابىلعان-دى.
جاڭا ءفيلمدى مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى «Kanaidarproduction» جانە «شەشەنفيلم» ستۋديالارى تۇسىرەتىن بولادى.
ءفيلمنىڭ سيۋجەتى ءسۇر بويداق ساماتتى دوستارىنىڭ ۇيلەندىرمەكشى بولعان شىرعالاڭىنا قۇرىلادى. قالىڭدىق ىزدەپ ۇلكەن قالاعا كەلگەن جىگىتتەر شىم-شىتىرىق وقيعالارعا ۇرىنادى.
قازىرگى تاڭدا ءتۇسىرۋ توبى رەكۆيزيتتەر دايىنداپ, كوستيۋمدەر مەن لوكاتسيا تاڭداۋ ۇستىندە. سونداي-اق, جۋىق ارادا ءتۇسىرۋ توبى قوسالقى رولدەرگە كاستينگ جاريالاماق.
ءفيلمنىڭ پروديۋسەرى ايدارحان ادىلباەۆ ءتۇسىرۋ توبى العاشقى «16 قىز» كومانداسىنان قالعانىن ايتادى.
– بۇل توپ رەجيسسەرمەن جۇمىس ىستەپ, ءتىل تابىسىپ ۇلگەردى. ەستەرىڭىزدە بولسا, «16 قىزدا» ءبىرىنشى پلاندا بەرىك ايتجانوۆ ايداعان ۆولگا «گاز-21» كولىگى ەدى, بۇل جولى مين ءداۋىرىنىڭ كونە قۇمىراسى بولماق. بۇل فيلمدە كورەرمەندەردى وتكىر ازىلدەر جانە تارتىمدى وقيعالارمەن بايىتۋعا تىرىستىق».
قىسقاسى, جاڭا كومەديادا دا كورەرمەندەر بۇرىنعىداي بەرىك ايتجانوۆ, اشا ماتاي, قۋانىش دولداەۆ, عاني قۇلجانوۆ, سايات مەرەكەنوۆ جانە داۋرەن ايدارقۇلوۆ سىندى اكتەرلارمەن قاۋىشادى. جاڭا كارتيناعا قوسىلعان جاڭا كەيىپكەرلەردى قارلىعاش مۇحامەتجانوۆا, مۇرات بيسەنبين, جاننا قۋانىشەۆا, فارحات ابدرايىموۆ, اسان ءماجيت پەن ەربولات توعىزاقوۆ سومدايدى.
ايناش ەسالي,
«ەگەمەن قازاقستان»
الماتى
