«حالىقارالىق كورمەگە قاتىسۋعا نيەت تانىتقان مەملەكەتتەردەن ءوتىنىش قابىلداۋ ءراسىمى رەسمي تۇردە اياقتالدى. قازىرگى تاڭدا قوس تاراپ اراسىندا جۇرگىزىلگەن جۇمىستاردىڭ ناتيجەسىن شىعارۋدامىز. بۇعان دەيىن بۇقارالىق اقپارات قۇرالدارىن جاريالانعانداي, ەلوردادا وتەتىن ەكسپو-2017 كورمەسىنە ناقتى 115 ەل قاتىساتىن بولدى. بۇلاردىڭ باسىم بولىگى كورمە اۋماعىندا ورنالاسقان پاۆيلوندارىندا دايىندىق جۇمىستارىن باستاپ كەتتى. سونداي-اق, 20 ءىرى حالىقارالىق ۇيىمنىڭ ءوتىنىشى رەسىمدەلدى. ايتا كەتەرلىگى, بيىلعى كورمەگە قاتىساتىن مەملەكەتتەر مەن ۇيىمدار سانى رەكوردتىق كورسەتكىشكە جەتكەن. مۇنداي دەرەكتى حالىقارالىق كورمەلەر بيۋروسى دا راستادى», دەدى جيىندا ي.ورازاقوۆ.
«استانا ەكسپو-2017» ۇلتتىق كومپانياسى وكىلى حالىقارالىق شاراداعى پاۆيلوندار قاتىسۋشى مەملەكەتتەرگە تەگىن بەرىلەتىندىگىن جەتكىزدى. جوعارىداعى 115 مەملەكەتتىڭ بارلىعى دا وزدەرىنە تيەسىلى ورىنداردى يەمدەنگەن. حالىقارالىق كورمەلەر بيۋروسىنىڭ تالابىنا سايكەس, بۇل ارنايى كەلىسىمشارت نەگىزىندە جۇرگىزىلەدى. ياعني, بارلىق ەل پاۆيلونداردى ارەنداسىز الا الادى. بىراق, ءار مەملەكەت ءوز پاۆيلوندارىن جانە اۋماعىن جابدىقتاۋ, قاجەتتى قۇرىلىس جۇمىستارىن جۇرگىزۋ اقىسىن موينىنا الادى. «ءاربىر قاتىسۋشى مەملەكەت وزدەرىنە تيەسىلى پاۆيلونداردى الدى. ورىنداردىڭ اۋماعى كوڭىلدەرىنەن شىقتى. ءبىز كورمەگە قاتىساتىن ەلدەرگە ءتيىستى جاعدايلاردىڭ بارلىعىن جاساۋعا تىرىستىق. تەك قانا گرەكيا مەن ليۋكسەمبۋرگتىڭ پاۆيلوندارى بىرىكتىرىلگەن. ءبىر پاۆيلوندا ورنالاسقان وسى ەلدەر عانا اۋماقتى 270 شارشى مەتردەن ءبولىپ الدى», دەدى دەپارتامەنت ديرەكتورىنىڭ ورىنباسارى.
يليا ورازاقوۆ شاراعا قاتىساتىن ەلدەر پاۆيلوندارداعى دايىندىق جۇمىستارىن ءساۋىر ايىنىڭ سوڭىنا دەيىن جۇرگىزەتىندىگىن ايتتى. ويتكەنى, ولارعا ودان كەيىنگى ەكسپوزيتسيالاردى دايىنداۋ فيزيكالىق تۇرعىدان قيىنعا تۇسەتىن كورىنەدى. ماماننىڭ ايتۋىنشا, حالىقارالىق ۇيىمدار كورمەگە قاتىسۋعا ءالى دە ءوتىنىش بەرە الادى ەكەن. مۇندا ەسكەرەتىن ءبىر جايت, جوعارىدا اتالعان 20 ءىرى حالىقارالىق ۇيىمنىڭ عانا جەكە پاۆيلوندارى بولادى. ال 6 ۇيىمنىڭ پاۆيلونى جوق. كەشىگىپ ءوتىنىش بەرگەندەر وسىلار سياقتى كونفەرەنتسيا, شەبەرلىك سىنىبى, ءتۇرلى تاقىرىپتا دوڭگەلەك ۇستەلدەر ۇيىمداستىرادى.
«قازىرگى تاڭدا ءبىز جاڭا كەزەڭگە قادام باستىق. ەندى كورمەگە قويىلاتىن ەكسپوزيتسيالارعا باسا ءمان بەرەتىن بولامىز, − دەدى الداعى جۇمىستار باعىتىنا توقتالعان يليا ورازاقوۆ. – كورمەگە قاتىساتىن ءاربىر مەملەكەت كەلگەن قوناقتاردى وزدەرىنىڭ يننوۆاتسيالىق ونىمدەرىمەن, مادەنيەتىمەن, شوۋلارىمەن تاڭعالدىراتىن بولادى. ءبىز بۇعان كۇمان كەلتىرمەيمىز. سەبەبى, ۇيىمداستىرۋشىلار بۇدان بىلاي كورمەگە قويىلاتىن جوبالاردىڭ مازمۇنىنا نازار اۋدارادى».
«استانا ەكسپو-2017» ۇلتتىق كومپانياسى وكىلىنىڭ مالىمەتىنشە, ولاردى ىرىكتەۋ بويىنشا ناقتى تالاپتار بار. كەيبىر ەكسپوزيتسيالار قابىلدانباعان كورىنەدى. ال كەيبىر ەلدەرگە كورمەنىڭ تاقىرىبى اياسىندا قويىلاتىن جوبالار بويىنشا جۇمىستى ودان ءارى جالعاستىرۋ قاجەتتىگى ەسكەرتىلگەن.
كورمەگە قاتىساتىن مەملەكەتتەر الەمدەگى بارلىق ەنەرگيا كوزدەرى نەگىزىندە جوبالارىن ۇسىنادى. ول – گيدرو, جەل, جەر, كۇن, كينەتيكا جانە باسقا دا ەنەرگيا كوزدەرى بولۋى مۇمكىن.
اسحات رايقۇل,
«ەگەمەن قازاقستان»
