– اسلان, «ەرتىس» ساپىنداعى العاشقى رەسمي وينىڭدا مەرگەندىك تانىتتىڭ. جالپى, جاڭا كومانداڭنىڭ العاشقى ماتچى جايلى پىكىرىڭدى بىلسەك...
– مەن ءۇشىن ەرەكشە ماتچ بولدى. باستىسى, ءوز الاڭىمىزدا جانكۇيەر قاۋىمدى قۋانتتىق. كۇننىڭ سالقىندىعىنا قاراماستان, ءبىزدى قولداۋعا كەلگەن پاۆلودارلىقتارعا العىسىمىز شەكسىز. ال «ەرتىستەگى» العاشقى رەسمي ويىندا كوزگە تۇسكەنىمە قۋانىشتىمىن. بۇل گول – مەنى ودان ءارى جىگەرلەندىرە ءتۇستى. «اقجايىقپەن» بولعان ماتچ جايلى ايتار بولسام, ورالدىق كلۋب قورعانىسقا كوپ كوڭىل ءبولدى. الايدا, ءبىز قاجەتتى ءۇش ۇپايدى ەنشىلەدىك. العاشقى ويىندا جەڭىسكە جەتۋ كومانداداعى سەنىمدىلىكتى كۇشەيتەدى.
– نەلىكتەن «ەرتىستى» تاڭدادىڭ؟
– «ەرتىسكە» اۋىسۋ تۋرالى اڭگىمە ءبىر جارىم جىل بۇرىن تۋىنداعان بولاتىن. سەبەبى, مەن الماتىلىق «قايراتتىڭ» ساپىندا نەگىزگى قۇرامعا سيرەك شىعىپ ءجۇردىم. ال ماعان ويىن تاجىريبەسى كەرەك. وسىنى اڭعارسا كەرەك, پاۆلودارلىق كلۋبتىڭ باسشىلىعى حابارلاسىپ, مەنى «ەرتىستەن» كورگىلەرى كەلەتىنىن ايتتى. ءبىز كەلىسىمشارت جايىن ءوزارا اقىلداستىق. «قايرات» كلۋبىمەن كەلىسىمشارتىم اياقتالعان سوڭ, «ەرتىسكە» اۋىستىم. بۇل كوماندانى تاڭداۋىمنىڭ دا وزىندىك سەبەپتەرى بار. بىرىنشىدەن, «ەرتىستىڭ» باپكەرى ديميتار ديميتروۆ – ەل چەمپيوناتىنداعى شەتەلدىك ۇزدىك باپكەرلەردىڭ ءبىرى. ەكىنشىدەن, «ەرتىس» – جاقسى ويىنشىلارمەن جاساقتالعان مىقتى ۇجىم. كلۋب وتكەن ماۋسىمدا چەمپيوناتتى ءۇشىنشى ورىنمەن ءتامامدادى. ال بيىل ەۋروپا ليگاسىندا ەل نامىسىن قورعايدى. مىنە, وسىنىڭ بارلىعى «ەرتىستى» تاڭداۋىما سەبەپشى بولدى.
– كومانداعا بەيىمدەلۋ قيىنعا سوققان جوق پا؟
– جوق. بارلىق ويىنشىلاردى بۇرىننان بىلەمىن. داۆيد لوريامەن «شاحتەر» ساپىندا بىرگە وينادىق. الەكساندر كيسليتسىنمەن بالا كۇنىمنەن تانىسپىن. ءبىر اۋلادا ءوسىپ, ەرجەتتىك. وزگە ويىنشىلارمەن ۇلتتىق قۇراما ساپىندا بىرگە دوپ تەپتىك. ەندى بىرىمەن چەمپيونات بارىسىندا جولىمىز ءتۇيىستى. لەگيونەرلەردەن باسقاسى ءبىر-ءبىرىن سىرتتاي بىلەدى عوي. سوندىقتان, كومانداعا بەيىمدەلۋ قيىنعا تۇسكەن جوق.
– باس باپكەر ديميتار ديميتروۆپەن جۇمىس ىستەگەن قالاي ەكەن؟
– «ەرتىسكە» اۋىسقاندا باپكەردىڭ ءوزى ماعان قىزىعۋشىلىق تانىتقانىن ەستىدىم. ول مەنى ءوز كومانداسىندا كورگىسى كەلەتىنىن ايتىپتى. ارينە, بۇل تۋرالى ەستىگەندە قاتتى تولقىدىم. ديميتارداي مىقتى باپكەردىڭ كوزىنە ەكىنىڭ ءبىرى تۇسە بەرمەيدى دەپ ويلايمىن. ول مەنى ۇنەمى قولدايدى جانە جارتىلاي قورعانىستىڭ ورتاسىن ماعان سەنىپ تاپسىردى. مەن وزىمە ارتىلعان جاۋاپكەرشىلىكتىڭ زور ەكەنىن بىلەمىن. سوندىقتان, ارتىلعان سەنىمدى اقتاۋعا تىرىسامىن.
– وتكەنگە ورالايىقشى. فۋتبولداعى جولىڭ قالاي باستالعان ەدى؟
– بارلىق بالالار سەكىلدى مەن دە اۋلا فۋتبولىنان باستادىم. سوسىن رۋسلان قارجاۋباەۆ جەتەكشىلىك ەتەتىن اۋەسقوي كومانداعا الىندىم. ول مەنىڭ ويىن مانەرىمدى ناقتىلاپ, ماتچ الدىنداعى پسيحولوگيالىق دايىندىقتى ۇيرەتتى. فيزيكالىق ازىرلىگىمنىڭ ىرگەتاسىن قالادى. رۋسلان قارجاۋباەۆتىڭ جەتەكشىلىگىمەن ۇلكەن فۋتبولدىڭ الىپپەسىن ۇيرەندىك. قىستا شاعىن فۋتبولدى سەرىك ەتەتىنبىز. سوندىقتان, مەنى كەيدە «ميني-فۋتبولشى» دەپ اتايتىندار بار. استە, ولاي ەمەس. ءيا, مەنىڭ العاشقى كاسىبي كلۋبىم «تۇلپار» مەن «يكار» كلۋبتارىنىڭ بىرىككەن كومانداسى بولدى. سوڭعىسىنىڭ ساپىندا ءبىر ماۋسىم عانا ونەر كورسەتتىم. سوسىن «گەفەست» قۇراماسىنداعى ءبىرنەشە فۋتبولشىمەن بىرگە «شاحتەردىڭ» قوسالقى قۇرامىنا اۋىستىم. كلۋبپەن كەلىسىمشارتقا وتىردىق. وسىلايشا, فۋتبولشى رەتىندەگى عۇمىرىم باستالدى.
– فۋتبولدا كىمدەرگە قاراپ بوي تۇزەيسىڭ؟
– زينەدين زيداندى قادىر تۇتامىن. سونداي-اق, اندرەا پيرلو, ينەستا مەن ءحاۆيدى جاقسى كورەمىن. ولار – ساپالى فۋتبولدىڭ ەتالوندارى. ءماسەلەن, زيداننىڭ الاڭداعى ويىندى كورە ءبىلۋى, ماتچ بارىسىندا بار كۇشىن سارقا جۇمسايتىنى, قيمىل-قوزعالىسى ۇنايدى. مۇنىڭ ءبارىن سوزبەن جەتكىزۋ مۇمكىن ەمەس. ونى كورۋ كەرەك.
– فۋتبولدان قولىڭ بوساعاندا نەمەن اينالىساسىڭ؟
– بالا-شاعامدى ەرتىپ كينوعا بارامىن. سەرۋەندەيمىز. موتيۆاتسيالىق ادەبيەتتەردى وقىعاندى ۇناتامىن.
– وتباسىڭ جايلى ايتا كەتسەڭ...
– ەكى كىشكەنتايىم بار. تاعى بىرەۋىن كۇتىپ وتىرمىز. ۇلكەن ۇلىم – ءۇش جارىم جاستا. قىزىم – ەكىدە.
– ۇلىڭ اكەسىنىڭ جولىمەن جۇرەر مە ەكەن, الدە ومىرلىك كاسىبىن ءوزى تاڭداي ما؟
– ارينە, تاڭداۋدى ۇلىمنىڭ وزىنە قالدىرامىن. باستىسى, جاقسى ادام بولىپ قالىپتاسسا بولعانى. ءوز-وزىنە سەنىمدى بولىپ, ومىردە باعىنبايتىن بەلەس جوق ەكەنىن جاقسى تۇسىنسە ەكەن دەيمىن. مەنىڭ مىندەتىم – بالالارىما دۇرىس تاربيە دارىتۋ, ومىردە جول تاڭداۋدا باعىت-باعدار بەرۋ.
– بيىلعى ماۋسىمدا الدىڭا قانداي ماقسات-مىندەت قويىپ وتىرسىڭ؟
– مەيلىنشە, كوپ گول سوعۋ, جاقسى پاستار بەرۋ. باستىسى – كوماندانىڭ تابىسىنا ۇلەس قوسۋ جانە ەۋرودودادا ناتيجەلى ونەر كورسەتۋ.
– اڭگىمەڭە راحمەت.
اڭگىمەلەسكەن
فارحات امىرەنوۆ
پاۆلودار
